05th Sep2022

ກະຊວງ ປກສ ເອົາໃຈໃສ່ຊ່ວຍເຫຼືອ ແລະ ປະຕິບັດນະໂຍບາຍ ຢ່າງສົມກຽດ ຕໍ່ນາຍຕໍາຫຼວດ ທີ່ເສຍສະຫຼະຊີວິດ ເລືອດເນື້ອ ເພື່ອປະເທດຊາດ ແລະ ປະຊາຊົນ

by Peaung Thanonkeo

ໃນໂອກາດທີ່ ທົ່ວພັກ-ລັດ, ທົ່ວກຳລັງປະກອບອາວຸດ ແລະ ປວງຊົນລາວທັງຊາດ ສຸມໃສ່ຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ປີ 2021-2023, ກະຊວງປ້ອງກັນຄວາມສະຫງົບໃນນາມທີ່ເປັນເຈົ້າການມະຫາພາກ, ເປັນໃຈການປະສານງານ ແລະ ຈັດຕັ້ງປະຕິບັດໂດຍກົງ, ເວລາໃດກຳລັງປ້ອງກັນຄວາມສະຫງົບ ນັບທັງສຸນກາງ ແລະ ທ້ອງຖິ່ນກໍ່ໄດ້ເອົາໃຈໃສ່ປະຕິບັດໜ້າທີ່ ທີ່ໄດ້ຮັບມອບໝາຍຢ່າງເດັດຂາດ, ເຂັ້ມງວດ ແລະ ມີຄວາມຮັບຜິດຊອບສູງ ທຸ້ມເທເຫື່ອແຮງ ສະຕິປັນຍາ ເຂົ້າໃນການປະຕິບັດໜ້າທີ່ ຢ່າງບໍ່ຮູ້ອິດ ຮູ້ເມື່ອຍ ໃນການແກ້ໄຂບັນຫາຢາເສບຕິດ  ເພື່ອຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ການດຳລົງຊີວິດທີ່ດີຂອງປະຊາຊົນລາວບັນດາເຜົ່າ.

ຕະຫຼອດໄລຍະທີ່ຜ່ານມາ ກຳລັງປ້ອງກັນຄວາມສະຫງົບ ໄດ້ສະກັດກັ້ນ ແລະ ແກ້ໄຂ ຫຼາຍກໍລະນີ, ກັກຕົວ ແລະ ດຳເນີນຄະດີຕໍ່ຜູ້ຖືກຫາໄດ້ຫຼາຍຄົນ, ຢຶດຂອງກາງຢາເສບຕິດຈຳນວນຫຼວງຫຼາຍ; ເຊິ່ງມັນໄດ້ກາຍເປັນຜົນງານສະແດງໃຫ້ເຫັນເຖິງຄວາມຕັດສິນໃຈຢ່າງເດັດຂາດຂອງກຳລັງປ້ອງກັນຄວາມສະຫງົບ. ແຕ່ຜົນງານເຫຼົ່ານັ້ນ, ບໍ່ໄດ້ມາຢ່າງ່າຍດາຍຄືດັ່ງເກັບດອກໄມ້ໃນສວນ ມັນແລກມາດ້ວຍຊີວິດ ເລືອດເນື້ອຂອງນາຍ ແລະ ພົນຕຳຫຼວດ ຜູ້ພິທັກສັນຕິລາດ ທີ່ເກັ່ງກ້າເສຍສະຫຼະເພື່ອຜົນປະໂຫຍດລວມຂອງຊາດ ເພື່ອຄວາມສະຫງົບຂອງສັງຄົມ ແລະ ເພື່ອຄວາມຢູ່ດີມີສຸກຂອງປະຊາຊົນລາວທັງຊາດ ດັ່ງເຫດການທີ່ເກີດຂຶ້ນໃນວັນທີ 1 ກັນຍາ 2022 ເວລາ ປະມານ 10 ມ ເຈົ້າໜ້າທີ່ ປກສ ເມືອງວຽງຄຳ ແຂວງຫຼວງພະບາງ ໄດ້ລົງແກ້ໄຂເປົ້າໝາຍຊື້-ຂາຍ ຢາເສບຕິດ ຢູ່ບ້ານຫ້ວຍເຈາະ ກຸ່ມສາມສຸມ ເປົ້າໝາຍໄດ້ ແກະລະເບີດໃສ່ ເຈົ້າໜ້າທີ່ກຳລັງປະຕິບັດໜ້າທີ່ເຮັດໃຫ້ເຈົ້າໜ້າທີ່ເສຍຊີວິດ 3 ສະຫາຍ ແລະ ບາດເຈັບ 4 ສະຫາຍ, ສ່ວນເປົ້າໝາຍທີ່ກໍ່ເຫດ ຄື ທ້າວ ຄົວວ່າ ທໍ່ ແມ່ນເສຍຊີວິດຄາທີ່.  (ປ່ອຍສຽງດົນຕີ)

ຕໍ່ກັບເຫດການທີ່ເກີດຂຶ້ນ ການຈັດຕັ້ງທຸກຂັ້ນແມ່ນໄດ້ຮີບຮ້ອນໃຫ້ການຊ່ວຍເຫຼືອຕາມຂັ້ນຕອນ ເປັນຕົ້ນແມ່ນສົ່ງຜູ້ໄດ້ຮັບບາດເຈັບໄປປິ່ນປົວຢູ່ໂຮງໝໍທ້ອງຖິ່ນຢ່າງວ່ອງໄວ; ຈາກນັ້ນ, ຄະນະນຳກະຊວງປ້ອງກັນຄວາມສະຫງົບໄດ້ຊີ້ນຳໃຫ້ເອົາເຮືອບິນໄປຮັບຜູ້ຖືກບາດເຈັບສາຫັດເພື່ອມາປິ່ນປົວຢູ່ນະຄອນຫຼວງວຽງຈັນ.

ດ້ວຍຄວາມເປັນຫ່ວງເປັນໄຍ ແລະ ເອົາໃຈໃສ່ຂອງການນຳພັກ-ລັດ, ກໍ່ຄືການນຳກະຊວງປ້ອງກັນຄວາມສະຫງົບ; ໃນວັນທີ 3 ກັນຍາ 2022 ທ່ານ ພົອ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ ໄດ້ລົງຢ້ຽມຢາມ ຜູ້ໄດ້ຮັບເຈັບຢູ່ໂຮງໝໍ 103  ເພື່ອເປັນກຳລັງໃຈໃນການປິ່ນປົວໃຫ້ຫາຍດີໂດຍໄວ.

ພ້ອມດຽວກັນນັ້ນ, ໃນລະຫວ່າງວັນທີ 2-5 ກັນຍາ 2022 ນີ້ ທ່ານ ພົຕ ວັນທອງ ກອງມະນີ ກຳມະການສູນກາງພັກ, ຮອງລັດຖະມົນຕີ, ຫົວໜ້າກົມໃຫຍ່ການເມືອງ ກະຊວງປ້ອງກັນຄວາມສະຫງົບ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແບ່ງເບົາຄວາມເສົ້າໂສກ, ເສຍໃຈ ຕໍ່ຄອບຄົວ, ຍາດພີ່ນ້ອງ, ລູກ-ເມຍ ຂອງນາຍຕຳຫຼວດ ທີ່ເສຍຊີວິດ 3 ສະຫາຍ.

ທ່ານຮອງລັດຖະມົນຕີ ໄດ້ຕາງໜ້າໃຫ້ກະຊວງ ປກສ ໄດ້ປະຕິບັດນະໂຍບາຍຢ່າງສົມກຽດຕໍ່ນາຍຕໍາຫຼວດທີ່ໄດ້ຮັບບາດເຈັບ ແລະ ເສຍຊີວິດ ຄື: ມອບຫຼຽນພິລະອາດຫານຊັ້ນ I ໃຫ້ຜູ້ລະ 1 ໜ່ວຍ, ເລື່ອນຊັ້ນໃຫ້ຜູ້ເສຍຊີວິດ ຈາກຮ້ອຍຕີ ຂຶ້ນ ຮອ 2 ສະຫາຍ ຄື ຮອ ອາລິນ ວິໄລພອນ ແລະ ຮອ ອິນປອນ ຈັນທະລັງສີ ແລະ ເລື່ອນຊັ້ນ ສິບເອກ ຂຶ້ນເປັນ ຮຕ 1 ສະຫາຍ ຄື ຮຕ ຊາຍ ພະລືໄຊ, ພ້ອມທັງມອບເງິນນະໂຍບາຍຈຳນວນໜຶ່ງ ແລະ ໄດ້ເຂົ້າຮ່ວມງານຊາປະນາກິດສົບຂອງນາຍຕຳຫຼວດທັງ 03 ສະຫາຍ ຢ່າງສົມກຽດ.

ການປະຕິບັດນະໂຍບາຍໃນເບື້ອງຕົ້ນຕໍ່ ຜູ້ໄດ້ຮັບບາດເຈັບ ແລະ ເສຍຊີວິດ ມີດັ່ງນີ:

ກະຊວງປ້ອງກັນຄວາມສະຫງົບ, ກອງບັນຊາການ ປກສ ແຂວງຫຼວງພະບາງ, ບັນດາຫ້ອງ, ບັນດາເມືອງ, ຫ້ອງວ່າການປົກຄອງເມືອງວຽງຄຳ, ກອງບັນຊາການ ປກສ ເມືອງວຽງຄຳ ໄດ້ສົມທົບກັນປະຕິບັດນະໂຍບາຍໃນເບື້ອງຕົ້ນຕໍ່ຄອບຄົວຜູ້ເສຍຊີວິດ 3 ຄອບຄົວ; ຄອບຄົວລະ 79 ລ້ານກີບ ແລະ ປະຕິບັດນະໂຍບາຍໃນເບື້ອງຕົ້ນຕໍ່ຜູ້ໄດ້ຮັບບາດເຈັບ 4 ສະຫາຍ, ສະຫາຍລະ 31 ລ້ານກີບ. ນອກນັ້ນ, ກະຊວງປ້ອງກັນຄວາມສະຫງົບ ກໍ່ຄືການຈັດຕັ້ງທຸກຂັ້ນ ຍັງໃຫ້ຄຳໝັ້ນສັນຍາ ຈະສືບຕໍ່ໃຫ້ການຊ່ວຍເຫຼືອ ຄອບຄົບຜູ້ເສຍຊີວິດ ແລະ ຜູ້ທີ່ໄດ້ຮັບບາດເຈັບ ທາງດ້ານວັດຖຸ-ຈິດໃຈ ຢ່າງເຕັມທີ່ ສືບຕໍ່ປິ່ນປົວຜູ້ໄດ້ຮັບບາດເຈັບໃຫ້ສຸດຄວາມສາມາດ ແລະ ໃຫ້ຫາຍດີໂດຍໄວ.

ຄວາມສູນເສຍທີເກີດຂຶ້ນຍ້ອນຢາເສບຕິດ ມັນໄດ້ສ້າງຄວາມເຈັບປວດທໍລະມານໃຫ້ ພໍ່ແມ່ປະຊາຊົນ, ຄອບຄົວ, ສັງຄົມ ລວມທັງເຈົ້າໜ້າທີ່ຜູ້ພິທັກສັນຕິລາດ ທີ່ໄດ້ອຸດທິດທັງຊີວິດເລືອດເນື້ອເພື່ອສະກັດກັ້ນ ແລະ ແກ້ໄຂບັນຫາຢາເສບຕິດ…. ຕາບໃດທີ່ບັນຫາດັ່ງກ່າວນີ້ບໍ່ໝົດໄປ ພວກເຮົາຍັງຕ້ອງປະເສີນໜ້າກັບຄວາມທ້າທາຍອັນໃຫຍ່ຫຼວງ ນັ້ນກໍ່ຄືປະກົດການຫຍໍ້ທໍ້ໃນສັງຄົມ. ດັ່ງນັ້ນ, ການແກ້ໄຂບັນຫາຢາເສບຕິດຈຶ່ງແມ່ນພັນທະ ໜ້າທີ່ຂອງພົນລະເມືອງລາວທຸກຄົນ ພວກເຮົາຕ້ອງຖືເອົາວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດເປັນຄວາມຮັບຜິດຊອບຂອງທຸກພາກສ່ວນ ເພື່ອພ້ອມກັນສະກັດກັ້ນ ແລະ ແກ້ໄຂ ຢາເສບຕິດໃຫ້ໝົດໄປຈາກສັງຄົມລາວ.

 

 

 

Off

Comments are closed.