06th Sep2022

ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ຕີລາຄາສູງຕໍ່ສາຍພົວພັນການທູດລາວ-ຫວຽດນາມ ຄົບຮອບ 60 ປີ

by Peaung Thanonkeo

ໂອກາດວັນສ້າງຕັ້ງສາຍພົວພັນທາງການທູດ ລາວຫວຽດນາມ ຄົບຮອບ 60ປີ ວັນທີ 5 ກັນຍາ 2022 ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ໃຫ້ສໍາພາດຕໍ່ສື່ມວນຊົນ  ໂດຍທ່ານໄດ້ກ່າວເຖິງຄວາມໝາຍ, ຄວາມສຳຄັນ ຂອງການສ້າງຕັ້ງສາຍພົວພັນການທູດ ລາວ-ຫວຽດນາມ, ຫວຽດນາມ-ລາວ ທີ່ເກີດຂຶ້ນແມ່ນໄດ້ມາຍ້ອນໝາກຜົນຂອງໄຊຊະນະອັນໃຫຍ່ຫຼວງ ແຫ່ງການຕໍ່ສູ້ອັນດຸເດືອດ ຂອງການປະຕິວັດຂອງສອງປະເທດ.

ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດກ່າວວ່າ: ສອງປະເທດລາວ-ຫວຽດນາມ ເປັນບ້ານໃກ້ເຮືອນຄຽງຕິດຈອດກັນດ້ວຍສາຍພູສາຍນໍ້າທາງທຳມະຊາດ, ປະຊາຊົນສອງຊາດ ໄດ້ດໍາລົງຊີວິດຢູ່ຮ່ວມກັນຢ່າງສັນຕິສຸກມາແຕ່ດຶກດຳບັນ. ນັບແຕ່ທ້າຍສະຕະວັດທີ 19, ຕົ້ນສະຕະວັດທີ 20 ສອງປະເທດໄດ້ຕົກຢູ່ໃນຊາຕາກໍາອັນດຽວກັນ ຄື : ປະເທດຊາດສູນເສຍເອກະລາດ, ປະຊາຊົນຖືກກົດຂີ່ຂູດຮີດແສນສາຫັດ ພາຍໃຕ້ແອກປົກຄອງຂອງພວກຈັກກະພັດຕ່າງດ້າວ.

ນັບແຕ່ພັກກອມມູນິດອິນດູຈີນ ໄດ້ກໍາເນີດເກີດຂຶ້ນ, ໂດຍມີປະທານ ໂຮ່ຈິມິນ ຜູ້ຍິ່ງໃຫຍ່ ເປັນຜູ້ກໍ່ຕັ້ງນັ້ນ, ຕໍ່ມາກໍ່ໄດ້ເກີດມີພັກກອມມູນິດຫວຽດນາມ, ມີພັກປະຊາຊົນປະຕິວັດລາວ ແລະ ພັກປະຊາຊົນກໍາປູເຈຍ ນຳພາ, ໄດ້ຄຽງບ່າຄຽງໄຫຼ່ກັນ ຕໍ່ສູ້ຕ້ານສັດຕູໂຕດຽວກັນຢ່າງດຸເດືອດ, ຂ້ຽວຂາດ ແລະ ໄດ້ຍາດເອົາເອກະລາດແຫ່ງຊາດ ແລະ ສິດເສລີພາບມາໃຫ້ປະຊາຊົນສາມຊາດອິນດູຈີນ ໄດ້ຢ່າງສົມບູນ, ສຳລັບຢູ່ປະເທດລາວ, ພາຍໃຕ້ການນຳພາຂອງພັກປະຊາຊົນລາວ ໃນເມື່ອກ່ອນ ອັນມີປະທານ ໄກສອນ ພົມວິຫານ ເປັນຜູ້ນຳພານັ້ນ, ບໍ່ວ່າຍາມໃດກໍ່ໄດ້ຖືມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມສຳພັນສູ້ຮົບກັບພັກກອມມູນິດຫວຽດນາມ, ກອງທັບຫວຽດນາມ ແລະ ປະຊາຊົນຫວຽດນາມ ເປັນກຳລັງແຮງຕັດສິນທຸກໄຊຊະນະຂອງຕົນ. ດັ່ງນັ້ນ, ມັນຈຶ່ງເປັນບໍ່ເກີດແຫ່ງມິດຕະພາບທີ່ຍິ່ງໃຫຍ່ຄວາມສາມັກຄີພິເສດຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ເຖິງເທົ່າທຸກວັນນີ້.

ຖ້າຈະເວົ້າເຖິງຄວາມໝາຍ, ຄວາມສຳຄັນ ຂອງການສ້າງຕັ້ງສາຍພົວພັນການທູດ ລາວ-ຫວຽດນາມ, ຫວຽດນາມ-ລາວ ທີ່ເກີດຂຶ້ນໃນວັນທີ 05 ກັນຍາ 1962, ເຊິ່ງໄດ້ວຽນມາບັນຈົບຄົບຮອບ 60 ປີ ພໍດີ ທີ່ສອງຊາດພວກເຮົາໃຫ້ຄວາມສໍາຄັນ ແລະ ພ້ອມກັນສະເຫຼີມສະຫຼອງ ໂດຍຖືເອົາປີ 2022 ເປັນປີສະຫຼອງສອງເຫດການທີ່ເປັນເຫດການໃຫຍ່ຂອງສອງປະເທດເຮົານັ້ນ, ການຕົກລົງສ້າງຕັ້ງສາຍພົວພັນການທູດ ລະຫວ່າງສາທາລະນະລັດ ປະຊາທິປະໄຕ ຫວຽດນາມ ກັບ ຣາຊາອານາຈັກລາວ ໃນເວລານັ້ນ, ແມ່ນໄດ້ມາຍ້ອນໝາກຜົນຂອງໄຊຊະນະອັນໃຫຍ່ຫຼວງຂອງການຕໍ່ສູ້ອັນດຸເດືອດ ຂອງການປະຕິວັດ ຂອງສອງປະເທດພວກເຮົາໃນເວລານັ້ນ, ຊຶ່ງໄດ້ເຮັດໃຫ້ ສາທາລະນະລັດ ປະຊາທິປະໄຕ ຫວຽດນາມ ມີບົດບາດອິດທິພົນ ຕໍ່ໂລກຢ່າງກວ້າງຂວາງ. ສ່ວນຢູ່ລາວ ໄດ້ມີການເຊັນສັນຍາເຊີແນວ ກ່ຽວກັບລາວຂຶ້ນໃນ ປີ 1962, ອັນໄດ້ນຳໄປສູ່ການສ້າງຕັ້ງລັດຖະບານປະສົມສາມຝ່າຍ ໄດ້ແກ່ ຝ່າຍລັດຖະບານວຽງຈັນ, ຝ່າຍແນວລາວຮັກຊາດ ແລະ ກຳລັງຝ່າຍເປັນກາງຮັກຊາດ ຂຶ້ນທີ່ວຽງຈັນ. ໃນເວລານັ້ນ, ຍ້ອນການຕໍ່ສູ້ທາງດ້ານການເມືອງ ການທູດຂອງກຳລັງຮັກຊາດ ໃນລັດຖະບານປະສົມ 3 ຝ່າຍ ຈຶ່ງເຮັດໃຫ້ສາມາດສ້າງຕັ້ງສາຍພົວພັນການທູດລະຫວ່າງ ຣາຊາອານາຈັກລາວ ກັບ ສາທາລະນະລັດ ປະຊາທິປະໄຕ ຫວຽດນາມ ຢ່າງເປັນທາງການນີ້ໃນວັນທີ 05 ກັນຍາ 1962.

ນີ້ເປັນເຫດການສໍາຄັນ ແລະ ເປັນບາດລ້ຽວໃໝ່ ຂອງໄຊຊະນະທາງການທູດ ຂອງກໍາລັງປະຕິວັດຂອງສອງພັກ, ສອງຊາດ ຢ່າງແທ້ຈິງ ເພາະວ່າຢູ່ນະຄອນຫຼວງວຽງຈັນກ່ອນນັ້ນ ມີສະຖານທູດ ຂອງລັດຖະບານຫຸ່ນໄຊງ່ອນ ຕັ້ງຢູ່ພຽງແຫ່ງດຽວ ເພາະຝ່າຍວຽງຈັນ ແລະ ຝ່າຍຕາເວັນຕົກ ບໍ່ຍອມຮັບຮູ້ ລັດຖະບານໃດໆ ຂອງຫວຽດນາມ ນອກຈາກລັດຖະບານຫຸ່ນໄຊງ່ອນ, ແຕ່ພາຍຫຼັງ ວັນທີ 05 ກັນຍາ 1962, ລັດຖະບານແຫ່ງ ສາທາລະນະລັດ ປະຊາທິປະໄຕ ຫວຽດນາມ ໄດ້ມີສະຖານເອກອັກຄະລັດຖະທູດຂອງຕົນ ຕັ້ງຢູ່ນະຄອນຫຼວງວຽງຈັນ ຢ່າງສະຫງ່າຜ່າເຜີຍ. ສ່ວນຢູ່ນະຄອນຫຼວງຮ່າໂນ້ຍ ກໍ່ມີສະຖານທູດ ແຫ່ງ ຣາຊາອານາຈັກລາວຕັ້ງຢູ່ຄຽງຄູ່ກັບສຳນັກງານຜູ້ຕາງໜ້າສູນກາງແນວລາວຮັກຊາດ.

ການສ້າງຕັ້ງສາຍພົວພັນການທູດ ລະຫວ່າງ ລາວ-ຫວຽດນາມ ຈຶ່ງຖືເປັນເຫດການປະຫວັດສາດ ທີ່ເປັນຂີດໝາຍສໍາຄັນໃນການພົວພັນລະຫວ່າງສອງປະເທດ ລາວ-ຫວຽດນາມ, ແມ່ນໝາກຜົນຂອງການຕໍ່ສູ້ໃນສະໜາມຮົບທາງການເມືອງ, ການທູດ ໄປຄຽງຄູ່ກັບການຊັ່ງຊາກຳລັງໃນສະໜາມຮົບທາງການທະຫານ ຂອງກຳລັງປະຕິວັດ ຂອງສອງປະເທດ ລາວ-ຫວຽດນາມ; ເປັນການຕອບສະໜອງຄວາມຮຽກຮ້ອງຕ້ອງການຂອງການປະຕິວັດຂອງສອງປະເທດ; ຮັບຮູ້ ແລະ ໄດ້ມາເຊິ່ງຄວາມຖືກຕ້ອງທາງດ້ານກົດໝາຍ ແລະ ໄດ້ເປັນພື້ນຖານໃຫ້ແກ່ການສືບທອດ ໃຫ້ແກ່ສອງປະເທດພາຍຫຼັງການສະຖາປະນາ ສປປ ລາວ ແລະ ພາຍຫຼັງ ທີ່ຫວຽດນາມ ໄດ້ທ້ອນໂຮມປະເທດຊາດ ໃຫ້ເປັນອັນໜຶ່ງອັນດຽວ ແລະ ສະຖາປະນາສາທາລະນະລັດ ສັງຄົມນິຍົມຫວຽດນາມ ຈົນເທົ່າທຸກວັນນີ້.

ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດກ່າວວ່າ:  ນໍ້າໃຈມິດຕະພາບ, ຄວາມສາມັກຄີ ແລະ ການຮ່ວມມື ລະຫວ່າງ ລາວ-ຫວຽດນາມ ມີທັງຄວາມເປັນສະຫາຍ, ຄວາມເປັນອ້າຍນ້ອງ, ຄວາມເປັນມິດທີ່ໃກ້ຊິດ ແລະ ຍັງມີຄວາມສາມັກຄີທີ່ຜູກພັນແໜ້ນແຟ້ນອີກດ້ວຍ… ທັງໝົດເຫຼົ່ານີ້ ມັນໄດ້ກາຍເປັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ທີ່ກຳລັງດຳລົງຢູ່ ແລະ ຈະດຳລົງຢູ່ກັບປະຊາຊົນສອງຊາດເຮົາຕະຫຼອດໄປ. ດັ່ງນັ້ນ, ເພື່ອເຮັດໃຫ້ຄວາມສຳພັນ ທີ່ຫາຍາກ ໄດ້ສືບຕໍ່ດຳລົງຄົງຢູ່ ແລະ ພັດທະນາຕໍ່ໄປ,

ລາວ-ຫວຽດນາມ ຈະສືບຕໍ່ຈັບມືກັນແໜ້ນ, ພ້ອມກັນກ້າວເດີນ, ສືບຕໍ່ຊ່ວຍເຫຼືອ, ສະໜັບສະໜູນ ເຊິ່ງກັນແລະກັນ, ເຕີມເຕັມໃຫ້ແກ່ກັນທາງດ້ານບົດຮຽນ, ປະສົບການ, ຄວາມຮູ້, ຄວາມສາມາດ ໃຫ້ແກ່ກັນ, ສ້າງເງື່ອນໄຂໃຫ້ແກ່ກັນແລະກັນ ເພື່ອພັດທະນາເສດຖະກິດ-ສັງຄົມ ຂອງແຕ່ລະປະເທດ, ນຳໃຊ້ທ່າແຮງ ແລະ ຈຸດພິເສດຂອງແຕ່ລະປະເທດ ເພື່ອຂຸດຄົ້ນອອກມາ ນຳໄປສູ່ຄວາມຈະເລີນກ້າວໜ້າ ຮ່ວມກັນ ເພື່ອຜົນປະໂຫຍດຂອງປະຊາຊົນຂອງພວກເຮົາທັງສອງປະເທດ; ສືບຕໍ່ຜັນຂະຫຍາຍ ບັນດາຂໍ້ຕົກລົງຂອງການນຳ ຂອງສອງພັກ, ຂໍ້ຜູກພັນ ແລະ ສັນຍາຂອງສອງລັດຖະບານ ແຕ່ລະໄລຍະ ໃຫ້ເປັນຮູບປະທຳ ນຳເອົາຜົນປະໂຫຍດຕົວຈິງມາສູ່ສອງປະເທດ ແລະ ພະຍາຍາມສ້າງກຳລັງແຮງທາງດ້ານການຮ່ວມມືຮອບດ້ານ ທາງດ້ານເສດຖະກິດ ໃຫ້ມີປະສິດທິຜົນສູງຂຶ້ນເລື້ອຍໆ ໃຫ້ສົມຄູ່ກັບການພົວພັນທາງດ້ານການເມືອງ ລະຫວ່າງ ລາວ-ຫວຽດນາມ, ຫວຽດນາມ-ລາວ ດັ່ງທີ່ເຄີຍຕີລາຄາມາແລ້ວນັ້ນ; ສືບຕໍ່ເອົາໃຈໃສ່ໃນການຮ່ວມມືດ້ານວັດທະນະທໍາ-ສັງຄົມ,ຍົກລະດັບຄຸນະພາບ ການຮ່ວມມືດ້ານການກໍ່ສ້າງຊັບພະຍາກອນມະນຸດ, ຮ່ວມມືກັນແກ້ໄຂບັນດາໜໍ່ແໜງ ທີ່ຈະພາໃຫ້ເກີດປະກົດການຫຍໍ້ທໍ້ ຕາມຊາຍແດນຂອງສອງປະເທດ, ເຮັດໃຫ້ເປັນຊາຍແດນແຫ່ງສັນຕິພາບ, ມີຄວາມສະຫງົບສຸກ, ສ້າງເງື່ອນໄຂໃຫ້ປະຊາຊົນຢູ່ລຽບຕາມຊາຍແດນ ມີການພັດທະນາ, ໃຫ້ປະຊາຊົນສອງປະເທດ ໄປມາຫາສູ່ກັນ ແລະ ທຳມາຫາກິນຮ່ວມກັນ; ສືບຕໍ່ໃຫ້ຄວາມຮູ້, ຄວາມເຂົ້າໃຈ ຢ່າງເລິກເຊິ່ງ ເຖິງປະຫວັດຄວາມເປັນມາຂອງນໍ້າໃຈມິດຕະພາບ, ຄວາມສາມັກຄີ ທີ່ບໍລິສຸດຜຸດຜ່ອງຂອງສອງຊາດ ແລະ ໃຫ້ມະຫາຊົນຂອງສອງປະເທດ ເປັນຜູ້ປົກປັກຮັກສາໄວ້ໃຫ້ໝັ້ນຄົງຍາວນານ, ຕີຖອຍເຈດຕະນາ ແລະ ການກະທຳ ຂອງຜູ້ບໍ່ຫວັງດີ ເພື່ອມ້າງເພທຳລາຍຄວາມສຳພັນຂອງສອງຊາດພວກເຮົາ.

ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ກ່າວຕືມອີກວ່າ: ພວກເຮົາມີຄວາມປິຕິຊົມຊື່ນເປັນຢ່າງຍິ່ງ ທີ່ເຫັນວ່າສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ທີ່ເປັນມູນເຊື້ອ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ຫວຽດນາມ ໄດ້ຮັບການຖະນຸຖະໜອມ ແລະ ເພີ່ມພູນຄູນສ້າງ ຜ່ານຫຼາຍຮຸ້ນຄົນ, ຮອດປັດຈຸບັນຍັງສືບຕໍ່ຂະຫຍາຍຕົວຢ່າງຕໍ່ເນື່ອງ ແລະ ນຳເອົາຜົນປະໂຫຍດທີ່ເປັນຮູບປະທຳ ແລະ ແທດຕົວຈິງມາສູ່ປະຊາຊົນສອງຊາດ ລາວ-ຫວຽດນາມ.

ໃນໂອກາດນີ້, ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ໄດ້ເຊີນຊວນປະຊາຊົນລາວ ແລະ ປະຊາຊົນຫວຽດນາມ ທຸກຊັ້ນຄົນ ຈົ່ງພ້ອມກັນສານຕໍ່ພາລະກິດຂອງບັນພະບູລຸດ, ຄົນຮຸ່ນກ່ອນ, ອອກແຮງເພີ່ມພູນຄູນສ້າງສາຍພົວພັນພິເສດລາວ-ຫວຽດນາມ ໃຫ້ແຕກດອກອອກຜົນ ແລະ ຂຽວສົດງົດງາມຕະຫຼອດໄປ. ຂໍໃຫ້ໄວໜຸ່ມ ລາວ-ຫວຽດນາມ ຈົ່ງເປັນຜູ້ສືບທອດທີ່ດີ, ເປັນຜູ້ພິທັກປົກປ້ອງ, ຖະນຸຖະໜອມ ສາຍພົວພັນພິເສດລາວ-ຫວຽດນາມ ໃຫ້ໝັ້ນຄົງຈົນເທົ່າໃດໆ; ຈົ່ງຮ່ວມມື, ຮ່ວມແຮງ, ຮ່ວມໃຈກັນ, ຮັກແພງສາມັກຄີ, ຊ່ວຍເຫຼືອເຊິ່ງກັນແລະກັນບົນຈິດໃຈສະຫາຍອ້າຍນ້ອງ, ພ້ອມກັນປົກປັກຮັກສາໝາກຜົນຂອງການປະຕິວັດ, ພ້ອມກັນສ້າງສາພັດທະນາປະເທດຊາດໃຫ້ຮັ່ງມີ, ເຂັ້ມແຂງຕາມເປົ້າໝາຍອຸດົມການຂອງສອງພັກ; ຈົ່ງຮ່ວມກັນສ້າງຂະບວນການປະກອບສ່ວນເຂົ້າໃນບັນດາກິດຈະກໍາສະເຫຼີມສະຫຼອງ ປີສາມັກຄີມິດຕະພາບ ລາວ-ຫວຽດນາມ ປີ 2022 ໃຫ້ມີເນື້ອໃນເລິກເຊິ່ງ ແລະ ປະສົບຜົນສໍາເລັດຢ່າງຈົບງາມ.

ໃນໂອກາດວັນຊາດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ວັນທີ02 ກັນຍາ ຄົບຮອບ 77 ປີ ທີ່ຫາກໍ່ຜ່ານມານີ້, ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານການສູນກາງພັກ ປະທານປະເທດ ຍັງໄດ້ສະແດງຄວາມຊົມເຊີຍຢ່າງສຸດໃຈ ແລະ ສະແດງຄວາມພາກພູມໃຈຕໍ່ໝາກຜົນຕ່າງໆ ທີ່ສະຫາຍ ຫວຽດນາມ ຍາດມາໄດ້ ຕະຫຼອດໄລຍະ 77 ປີ ຜ່ານມາ; ອວຍພອນໃຫ້ ສສ ຫວຽດນາມ ພາຍໃຕ້ການນຳພາອັນສະຫລາດສ່ອງໃສຂອງພັກກອມມູນິດຫວຽດນາມ ອັນມີສະຫາຍເລຂາທິການໃຫຍ່ ຫງວຽນ ຟູ ຈ້ອງ ເປັນຜູ້ນຳພາ, ປະຊາຊົນຫວຽດນາມອ້າຍນ້ອງ ຈະສືບຕໍ່ຍາດໄດ້ ຜົນສຳເລັດໃໝ່ ໃຫຍ່ຫລວງກວ່າເກົ່າ, ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ່ 13 ຂອງພັກ ຢ່າງມີໄຊ, ສືບຕໍ່ພາລະກິດແຫ່ງການປ່ຽນແປງໃໝ່ ຢ່າງແຂງແຮງ, ຫັນປະເທດຫວຽດນາມເປັນປະເທດອຸດສາຫະກຳຕາມທິດທັນສະໄໝ, ບັນລຸເປົ້າໝາຍເຮັດໃຫ້ ປະຊາຊົນຮັ່ງມີ, ປະເທດຊາດມັ່ງຄັ່ງເຂັ້ມແຂງ, ປະຊາທິປະໄຕ, ຍຸຕິທຳ ແລະ ສີວິໄລ.

ພ້ອມນີ້, ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ຍັງໄດ້ອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ຫວຽດນາມ-ລາວ ຈົ່ງໝັ້ນຄົງຂະໜົງແກ່ນ ແລະ ສວຍສົດງົດງາມຕະຫຼອດກາລະນານ.

Off

Comments are closed.