07th Sep2022

ພິທີໄຂສົກຮຽນໃໝ່ປີ 2022-2023 ຂອງວິທະຍາຄານຕໍາຫຼວດປະຊາຊົນ

by Peaung Thanonkeo

ວິທະຍາຄານຕຳຫຼວດປະຊາຊົນ ກະຊວງປ້ອງກັນຄວາມສະຫງົບ ໄດ້ຈັດພິທີໄຂສົກຮຽນໃໝ່ປີ 2022-2023. ໃນວັນທີ 7 ກັນຍາ 2022 ນີ້ ໂດຍການເປັນປະທານຂອງ ພັອ ປອ ໂອໄດ ທິລັນດາ ຮອງຫົວໜ້າອຳນວຍການ ວິທະຍາຄານຕຳຫຼວດປະຊາຊົນ, ມີຄະນະອຳນວຍການ, ຄູອາຈານ ແລະ ນັກສຶກສາເຂົ້າຮ່ວມ.

ພັທ ອິນທະນົງ ເທບພະສຸວັນ ຫົວໜ້າຫ້ອງຄຸ້ມຄອງຫຼັກສູດການສຶກສາ ວິທະຍາຄານຕຳຫຼວດປະຊາຊົນ ໄດ້ກ່າວໄຂສົກຮຽນເຊີ່ງທ່ານໄດ້ລາຍງານສະພາບຈຸດພິເສດຂອງນັກສຶກສາ ແລະ ແຜນການສຶກສາ, ຄົ້ນຄ້ວາ, ຮ່ຳຮຽນຄື: ນັກສຶກສາປະລິນຍາໂທ ຮຸ່ນທີ 14 ລວມມີ 18 ສະຫາຍ, ຍິງ 3 ສະຫາຍ, ໃຊ້ເວລາຄົ້ນຄ້ວາຕາມຫຼັກສູດໃນສົກຮຽນປີ 2022-2023, ລວມມີ 20 ໜ່ວຍກິດມີ 7 ວິຊາຮຽນ, ນັກສຶກສາປະລິນຍາຕີກໍ່ສ້າງຮຸ່ນທີ 24, 25 ມີນັກສຶກສາ 310 ສະຫາຍ, ຍິງ 64 ສະຫາຍ, ນັກສຶກສາ ຮຸ່ນທີ24 ປີຮຽນທີ 3 ມີ 36 ໜ່ວຍກິດ 13 ວິຊາຮຽນ, ຮຸ່ນທີ 25 ປີຮຽນທີ 2 ມີ 30 ໜ່ວຍກິດ 14 ວິຊາຮຽນ, ນັກສຶກສາຕໍ່ເນື່ອງປະລິນຍາຕີ ຮຸ່ນທີ 16 ມີນັກສຶກສາທັງໝົດ 69 ສະຫາຍ, ຍິງ 5 ສະຫາຍ, ມີ 34 ໜ່ວຍກິດ 16 ວິຊາຮຽນ, ນັກສຶກສາປະລິນຍາຕີພາສາອັງກິດ ຮຸ່ນທີ 3 ມີນັກສຶກສາ 33 ສະຫາຍ, ຍິງ 14 ສະຫາຍ, ມີ 34 ໜ່ວຍກິດ 8 ວິຊາຮຽນ.

ເພື່ອເຮັດໃຫ້ຫຼັກສູດການສອນ-ການຮຽນໄດ້ຮັບຜົນສຳເລັດ, ຄະນະພັກ-ຄະນະນຳ ແຕ່ລະຂັ້ນຕະຫຼອດຮອດບັນດານັກສຶກສາທຸກຄົນຕ້ອງໄດ້ເຊື່ອມຊືມກຳແໜ້ນ ແລະ ຈັດຕັ້ງປະຕິບັດທິດທາງແຜນການປະຈຳປີຂອງກະຊວງປ້ອງກັນຄວາມສະຫງົບກໍຄືທິດທາງແຜນການຂອງວິທະຍາຄານຕຳຫຼວດປະຊາຊົນວາງອອກໃຫ້ບັນລຸຕາມຈຸດປະສົງ ຄາດໝາຍທີ່ວາງໄວ້.

ໂອກາດດັ່ງກ່າວ ພັອ ປອ ໂອໄດ ທິລັນດາ ຮອງຫົວໜ້າອຳນວຍການວິທະຍາຄານຕຳຫຼວດປະຊາຊົນ ໄດ້ມີຄຳເຫັນໂອ້ລົມຕໍ່ພິທີ ເຊີ່ງທ່ານໄດ້ເນັ້ນໜັກໃຫ້ນັກສຶກທຸກຮຸ່ນ ຕ້ອງໄດ້ຕັດສິນໃຈຫັນເຂົ້າສູ່ການປະຕິບັດຂໍ້ກຳນົດກົດລະບຽບຂອງ ວິທະຍາຄານຕຳຫຼວດປະຊາຊົນ ວາງອອກຢ່າງເຂັ້ມງວດ, ຕ້ອງຕັ້ງໃຈຄົ້ນຄ້ວາ, ຮ່ຳຮຽນ, ຝຶກຝົນຫຼໍ່ຫຼອມ ແລະ ເຂົ້າຮ່ວມຂະບວນການຕ່າງໆ ເປັນໜ້າທີ່ການເມືອງຂອງນັກສຶກສາ, ຫ້າມບໍ່ໃຫ້ມີການປະພຶດໃດໆທີ່ລະເມີດຕໍ່ລະບຽບ, ກົດໝາຍຂອງລັດ, ຂອງກຳລັງ ປກສ ກໍຄືຂໍ້ກຳນົດຂອງ ວິທະຍາຄານຕຳຫຼວດປະຊາຊົນວາງອອກ, ສຳລັບຄູ-ອາຈານ, ພະນັກງານພາຍໃນວິທະຍາຄານຕຳຫຼວດປະຊາຊົນ ຕ້ອງເອົາໃຈໃສ່ປັບປຸງ ແລະ ພັດທະນາຄຸນນະພາບການສອນ-ການຮຽນໃຫ້ໄດ້ຕາມມາດຖານການສຶກສາທີ່ກະຊວງສຶກສາທິການ ແລະ ກິລາວາງອອກ ໂດຍສະເພາະແມ່ນ 5 ຫຼັກມູນ 10 ມາດຖານ ແລະ 50 ຕົວຊີ້ວັດ, ຢາກເຮັດໄດ້ແນວນັ້ນຕ້ອງສຸມໃສ່ຄົ້ນຄ້ວາ ແລະ ສ້າງຕຳລາຮຽນໃຫ້ເປັນຮູບປະທຳ.

Off

Comments are closed.