07th Sep2022

ປກສ ເມືອງ ທ່າພະບາດ ຍຶດຄັນຊາອັດແທ່ງ 1.600 ກິໂລກຼາມ

by Peaung Thanonkeo

ເຈົ້າໜ້າທີ່ ພະແນກຕຳຫຼວດ ກອງບັນຊາການ ປກສ ເມືອງທ່າພະບາດ ແຂວງບໍລິຄຳໄຊ ໃຫ້ຮູ້ ວ່າ: ໃນຕອນເຊົ້າ ວັນທີ 06 ກັນຍາ 2022 ນີ້ເຈົ້າໜ້າທີ່ໄດ້ຈັດຕັ້ງປະຕິບັດໜ້າທີ່ວຽກງານຕິດ ກວດກາຄວາມເປັນລະບຽບຮຽບຮ້ອຍປະຈຳຢູ່ປ້ອມດ່ານກວດກາທາງແບ່ງບ້ານທວຍ ເມືອງທ່າພະບາດ ແຂວງບໍລິຄຳໄຊ ຜ່ານການກວດກາພົບເຫັນລົດຕ້ອງສົງໄສເປັນລົດບັນທຸກ 06 ລໍ້, ຍີ່ຫໍ ສະກັດ ໂຣເວີ ສີແດງ ໝາຍເລກ ທະບຽນ ບກ 2636 ອຸດົມໄຊ ຈຶ່ງໄດ້ກວດຄົ້ນ ພົບເຫັນຢາເສບຕິດປະເພດກັນຊາອັດແທ່ງຊຸກເຊື່ອງໄວ້ໃນລົດຄັນດັ່ງກ່າວ ຈຳນວນ 90 ແກັດ ມີນ້ຳໜັກ 1.600 ກິໂລກຼາມ ທີ່ປະປົນມານໍາທູບຫອມ ຈຶ່ງໄດ້ຢຶດຂອງກາງ ແລະ ກັກຕົວພວກຖືກຫາໄດ້ 04 ຄົນ ຄື: ທ້າວ ຂາວ, ທ້າວ ເດ, ທ້າວ ແຂກ ແລະ ທ້າວ ນ້ອຍ ຢູ່ບ້ານ ໂພນຈະເລີນ ເມືອງປາກກະດິງ ແຂວງບໍລິຄຳໄຊ.

ຜ່ານການສືບສວນ-ສອບສວນເບື້ອງຕົ້ນ ພວກກ່ຽວທັງ 04 ຄົນ, ໄດ້ຮັບສາລະພາບວ່າ: ເວລາ 15 ໂມງ ຂອງວັນທີ 5 ກັນຍາ 2022 ໄດ້ເອົາຄັນຊາຈຳນວນດັ່ງກ່າວຂຶ້ນລົດບັນທຸກ 6 ລໍ້ສີແດງ ໝາຍເລກທະບຽນ ບກ 2636 ອຸດົມໄຊ ເຊິ່ງເປັນລົດຂອງ ທ້າວ ກໍ (ນາມສົມມຸດ) ຢູ່ບ້ານ ໂພນຈະເລີນ ເມືອງປາກກະດິງ ແຂວງບໍລິຄຳໄຊ ຮອດເວລາປະມານ 23 ໂມງ ຂອງວັນດຽວກັນ ພວກກ່ຽວທັງ 04​ ຄົນ ໄດ້ຂັບຂີ່ລົດຄັນດັ່ງກ່າວລົງໜ້າມາທາງນະຄອນຫຼວງວຽງຈັນ ໂດຍແມ່ນທ້າວ ນ້ອຍ ແລະ ທ້າວ ຂາວ ປ່ຽນກັນຂັບ, ເມື່ອມາຮອດປ້ອມກວດກາທາງແບ່ງບ້ານທວຍ ເມືອງທ່າພະບາດ ແຂວງບໍລິຄຳໄຊ ເຈົ້າໜ້າທີ່ໄດ້ລັດລົດເພີ່ນຂໍອະນຸຍາດທໍາການກວດກາຈິ່ງພົບເຫັນຢາເສບຕິດປະເພດກັນຊາອັດແຫ່ງ ຈຳນວນດັ່ງກ່າວ ຈຶ່ງຖືກເຈົ້າໜ້າທີ່ກັກຕົວ.

ປະຈຸບັນຄະດີດັ່ງກ່າວ ຢູ່ໃນຂັ້ນຕອນການສືບສວນ-ສອບສອບຕະຫຍາຍຜົນຫາພັກພວກຮ່ວມ ຂະບວນການມາດຳເນີນຄະດີຕາມລະບຽບກົດໝາຍ.

Off

Comments are closed.