08th Sep2022

ຮອງປະທານປະເທດ ຕ້ອນຮັບທູດມາເລເຊຍ ປະຈຳລາວ ເຂົ້າອຳລາ

by Peaung Thanonkeo

ໃນວັນທີ 8 ກັນຍາ 2022 ນີ້, ທ່ານນາງ ປານີ ຢາທໍ່ຕູ້ ຮອງປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມອຳລາຂອງ ທ່ານ ໂມ​ຮາ​ມັດ ໄອ​ນີ ອາ​ຕັນ (MohdAiniAtan) ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງມາເລເຊຍ ປະຈຳ ສປປ ລາວ ໃນໂອກາດ ສຳເລັດການປະຕິບັດໜ້າທີ່ ການທູດ ຢູ່ ສປປ ລາວ.

ໂອກາດດັ່ງກ່າວ, ທ່ານນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍມາ​ຍັງ ທ່ານ ໂມ​ຮາ​ມັດ ໄອ​ນີ ອາ​ຕັນ ທີ່ໄດ້ສຳເລັດການປະຕິບັດໜ້າທີ່ການທູດ ຢ່າງຈົບງາມ, ເຊິ່ງໄດ້ປະກອບສ່ວນ ເຂົ້າໃນການຮັດແໜ້ນ ສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ມາເລເຊຍ, ທັງໄດ້ປະກອບສ່ວນ ເຂົ້າໃນການສົ່ງເສີມການພົວພັນຮ່ວມມື ລະຫວ່າງສອງປະເທດ ກໍຄືການພັດທະນາເສດຖະກິດ-ສັງຄົມ ຢູ່ ສປປລາວ, ພ້ອມນີ້,ທ່ານຮອງປະທານປະເທດ ຍັງໄດ້ອວຍພອນໃຫ້ທ່ານທູດຈົ່ງກັບຄືນປະເທດດ້ວຍຄວາມສະຫວັດດີພາບ ແລະ ປະສົບຜົນສຳເລັດ ໃນພາລະກິດໃໝ່ຂອງຕົນ.

ທ່ານ ໂມ​ຮາ​ມັດ ໄອ​ນີ ອາ​ຕັນ ກໍໄດ້ສະແດງຄວາມຂອບໃຈ ມາ​ຍັງທ່ານຮອງປະທານປະເທດ ທີ່ໄດ້​ໃຫ້ການຕ້ອນຮັບຢ່າງອົບອຸ່ນ, ພ້ອມທັງສະແດງຄວາມຂອບໃຈ ຕໍ່ລັດຖະບານ ກໍຄືບັນດາການນຳຂອງພັກ-ລັດຂອງ ສປປ ລາວ ຕະຫລອດຮອດປະຊາຊົນລາວບັນດາເຜົ່າ ທີ່ໄດ້ໃຫ້ການສະໜັບສະໜູນ, ຮ່ວມມືທີ່ດີ ແລະ ອໍານວຍຄວາມສະດວກທຸກຢ່າງ ຕະຫລອດໄລຍະການປະຕິບັດໜ້າທີ່ ວຽກງານຂອງຕົນ ຈົນໄດ້ຮັບຜົນສຳເລັດເປັນຢ່າງດີ. ພ້ອມທັງ ສະແດງຄວາມເຊື້ອໝັ້ນວ່າ ທ່ານທູດມາເລເຊຍ ຄົນໃໝ່ທີ່ຈະມາປະຕິບັດໜ້າທີ່ໃນຕໍ່ໜ້າແທນທີ່ຕົນຈະສືບຕໍ່ສຸມທຸກເຫື່ອແຮງ, ສະຕິປັນຍາຂອງຕົນ ເພື່ອປະກອບສ່ວນເຂົ້າໃນການເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ໃຫ້ນັບມື້ນັບໄດ້ຮັບ ການເພີ່ມພູນຄູນສ້າງ ​ແລະ ຂະຫຍາຍຕົວຂຶ້ນໄປເລື້ອຍໆ.

 

Off

Comments are closed.