13th Sep2022

ເປີດຊຸດຝຶກອົບຮົມວຽກງານຄຸ້ມຄອງ-ປ້ອງກັນກໍາລັງໄລຍະສັ້ນຄັ້ງທີ 1.

by somchan

ກົມປ້ອງກັນກໍາລັງ ກົມໃຫຍ່ການເມືອງ ປກສ ເປີດຊຸດຝຶກອົບຮົມວຽກງານຄຸ້ມຄອງ-ປ້ອງກັນກໍາລັງໄລຍະສັ້ນຄັ້ງທີ 1 ປະຈຳປີ 2022 ໃນວັນທີ 12 ກັນຍາ 2022 ນີ້ ໂດຍການເປັນປະທານຂອງ ພ້ອ ຈັນທາ ວັນນະແສງ ຫົວຫນ້າກົມປ້ອງກັນກໍາລັງ ເປັນກຽດເຂົ້າຮ່ວມຂອງ ພົຕ ວັນທອງ ກອງມະນີ ຮອງລັດຖະມົນຕີ 

ຫົວຫນ້າກົມໃຫຍ່ການເມືອງ ປກສມີບັນດາ ນາຍ ແລະ ພົນຕໍາຫລວດຢູ່ບັນດາກົມ ກອງອ້ອມຂ້າງກະຊວງ, ກົມກອງທ້ອງຖີ່ນຜູ້ທີ່ເຮັດວຽກງານກວດກາ-ປ້ອງກັນກໍາລັງເຂົ້າຮ່ວມ.

ພັອ ຈັນທາ ວັນນະແສງ ຫົວຫນ້າກົມປ້ອງກັນກໍາລັງ ໄດ້ກ່າວວ່າຊຸດຝຶກອົບຮົມຄັ້ງນີ້ ມີຈໍານວນພົນເຂົ້າຮ່ວມທັງຫມົດ 50 ສະຫາຍ ມາຈາກບັນດາກອງບັນຊາການ ປກສ ແຂວງ 19 ສະຫາຍ,  ອ້ອມຂ້າງກະຊວງ 31 ສະຫາຍ. ກໍານົດເວລາຝຶກອົບຮົມ 05 ວັນ ນັບແຕ່ວັນທີ 12 – 16 ກັນຍາ 2022 ຈຸດປະສົງເພື່ອຍົກສູງລະດັບຄວາມຮັບຮູ້ທາງດ້ານນິຕິກໍາ ແລະ ຫຼັກການ ໃນການຈັດຕັ້ງປະຕິບັດວຽກງານປ້ອງກັນກໍາລັງ ໃຫ້ແກ່ນາຍ ແລະ ພົນຕໍາຫຼວດ ນັບແຕ່ສູນກາງລົງຮອດທ້ອງຖິ່ນ ໄດ້ຮັບຮູ້ – ເຂົ້າໃຈເລິກເຊິ່ງ ແລະ ມີ ຄວາມເປັນເອກະພາບໃນການຈັດຕັ້ງປະຕິບັດ ແນ່ໃສ່ເຮັດໃຫ້ວຽກງານປ້ອງກັນກໍາລັງ ເປັນເສນາທິການໃຫ້ແກ່ຄະນະພັກ-ຄະນະບັນຊາ ໃນກໍາລັງປ້ອງກັນຄວາມສະຫງົບ, ຮັບປະກັນຄວາມໂປ່ງໃສ, ເຂັ້ມແຂງທາງດ້ານການເມືອງ-ແນວຄິດ, ການຈັດຕັ້ງໃນຖັນແຖວນາຍ ແລະ ພົນຕໍາຫຼວດ ໃນກໍາລັງປ້ອງກັນຄວາມສະຫງົບ ປະກອບສ່ວນກໍ່ສ້າງກໍາລັງປ້ອງກັນຄວາມສະຫງົບ ປະຕິບັດນັບມື້ ນັບເຂັ້ມແຂງ ທັນສະໄຫມ ຕອບສະຫນອງຕໍ່ຄວາມຮຽກຮ້ອງຕ້ອງການຂອງຫນ້າທີ່ໃນສະພາບການໃຫມ່, ຕ້ານທຸກການມ້າງເພ, ເລລ່ຽມ, ກົນອຸບາຍ ແລະ ການເຄື່ອນໄຫວຂອງພວກກຸ່ມຄົນບໍ່ດີ ຮັບປະກັນຄວາມປອດໄພຕໍ່ກັບຄວາມລັບຂອງຊາດ, ຄວາມລັບພາຍໃນພັກ-ລັດ, ຄວາມລັບຂອງກໍາລັງປ້ອງກັນຄວາມສະຫງົບ, ຄວາມລັບຂອງແຕ່ລະກົມກອງທ້ອງຖິ່ນ ແລະ ວຽກງານອື່ນໆ.

ເອກສານທີ່ນໍາມາຝຶກອົບຮົມປະກອບມີ: ຈັນຍາທໍາ ແລະ ຈັນຍາບັນຂອງນາຍ ແລະ ພົນຕໍາຫຼວດ, ຝຶກຝົນຫຼໍ່ຫຼອມຄຸນສົມບັດສິນທໍາປະຕິວັດຂອງພະນັກງານ-ນັກຮົບ ໃນໄລຍະໃຫມ່, ຂໍ້ຕົກລົງ ວ່າດ້ວຍລະບຽບວິໄນຂອງກໍາລັງ ປກສ ແລະ ຂໍ້ຫ້າມຕໍ່ນາຍ ແລະ ພົນຕໍາຫຼວດ, ຄໍາສັ່ງກະຊວງ ປກສ ວ່າດ້ວຍການນໍາໃຊ້ສື່ສັງຄົມອອນລາຍໃນກໍາລັງ ປກສ, ວຽກງານຄຸ້ມຄອງ-ປ້ອງກັນກໍາລັງ, ຄໍາສັ່ງວ່າດ້ວຍການເພີ່ມທະວີວຽກງານປ້ອງກັນກໍາລັງໃນສະພາບການໃຫມ່, ຄໍາແນະນໍາຂອງກົມໃຫຍ່ການເມືອງ ປກສ ກ່ຽວກັບການຈັດຕັ້ງປະຕິບັດຄໍາສັ່ງວ່າດ້ວຍການເພີ່ມທະວີວຽກງານປ້ອງກັນກໍາລັງໃນສະພາບການໃຫມ່,ລະບຽບພັກ,ເພີ່ມທະວີວຽກງານປ້ອງກັນພັກໃນໄລຍະໃຫມ່,ວຽກງານກວດກາຊອກຫາ ການເມືອງພາຍໃນ,ວຽກງານກໍາ ແລະ ຄຸ້ມຄອງສະພາບການເມືອງພາຍໃນກອງທັບ, ວຽກງານປ້ອງກັນການເມືອງພາຍໃນທີ່ຄັດເລືອກ-ນໍາໃຊ້ ຕົວອັກສອນຫຍໍ້ ແລະ ເລກລະຫັດ ບັນດາກົງຈັກການຈັດຕັ້ງຂອງກະຊວງ ປກສ ( ສະບັບປັບປຸງ ), ຂໍ້ຕົກລົງລັດຖະມົນຕີກະຊວງ ປກສ ວ່າດ້ວຍ ການ ອະນຸມັດໃຫ້ກົມປ້ອງກັນກໍາລັງຜະລິດບັດປະຈໍາຕົວພາຍໃນກໍາລັງ ປກສ, ຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງລະບອບບັນຊາຫົວຫນ້າດຽວໃນກໍາລັງ ປກສ, ຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກໍາມະການວິໄນກໍາລັງ ປກສ, ຂັ້ນຕອນການສ້າງເອກະສານໃນການສະເຫນີວິໄນ.

Off

Comments are closed.