13th Sep2022

ການແຂ່ງຂັນ ກິລາຍິ່ງປືນ ຊິງຂັນເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ.

by somchan

ສູນກາງຊາວໜຸ່ມປະຊາຊົນ ປະຕິວັດລາວ ໄດ້ຈັດການແຂ່ງຂັນກິລາຍິງປືນສັ້ນ ຊີງຂັນເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ໃນວັນທີ 12 ກັນຍາ 2022ນີ້, 

ທີ່ສະໜາມຝຶກຊອ້ມກິລາຍິງປືນ 5 ເມສາ, ໂດຍການເຂົ້າຮ່ວມເປັນກຽດມີ ທ່ານ ນວນທອງ ສຸວັນວິໄຊ ຮອງເລຂາຄະນະບໍລິຫານງານ ສູນກາງຊາວໜຸ່ມ ປະຊາຊົນ ປະຕິວັດລາວ, ພົຈວ ຄໍາສາຍ ຈັນທະວົງ ຄະນະພັກກະຊວງ, ຮອງຫົວໜ້າກົມໃຫ່ຍການເມືອງປ້ອງກັນຄວາມສະຫງົບ, ມີບັນດາ ຄະນະພັກ-ຄະນະນຳ, ຄະນະບໍລິຫານງານ ສູນກາງຊາວໜຸ່ມ ປະຊາຊົນ ປະຕິວັດລາວ, ຄະນະຊາວໜຸ່ມບັນດາແຂວງ, ກະຊວງ, ອົງການ, ນະຄອນຫຼວງ, ສະມາຄົມນັກທຸລະກິດໜຸ່ມແຫ່ງຊາດ, ຕະຫລອດຮອດອະນຸກຳມະການ, ນັກກິລາ ແລະ ແຂກຖືກເຊີນເຂົ້າຮ່ວມ.

ທ່ານ ນາງ ມີນາ ສີວິໄລ ຫົວໜ້າກົມຂະບວນການຊາວໜຸ່ມ, ສູນກາງຊາວໜຸ່ມ ປະຊາຊົນ ປະຕິວັດລາວໄດ້ກ່າວວ່າ: ການແຂ່ງຂັນກິລາຍິງປືນໃນຄັ້ງນີ້, ແມ່ນເພື່ອແນໃສ່ສ້າງຂະບວນການຂໍ່ານັບຮັບຕ້ອນ ແລະ ຂໍ่ານັບຊົມເຊີຍ ວັນສໍາຄັນຕ່າງໆຂອງພັກ- ຂອງຊາດເວົ້າລວມ, ເວົ້າສະເພາະແມ່ນການສ້າງຂະບວນການຂ່ຳນັບຊົມເຊີຍວັນສ້າງຕັ້ງ ລັດຖະທຳມະນູນແຫ່ງສປປລາວ ຄົບຮອບ 31 ປີ (ວັນທີ 15 ສິງຫາ 1991 – 15 ສິງຫາ 2022) ແລະ ວັນສະຖາປະນາ ສປປ ລາວ ຄົບຮອບ 47 ປີ (ວັນທີ 2 ທັນວາ 1975 – ວັນທີ 2 ທັນວາ 2022) ທັງເປັນການປຸກລະດົມທຶນເຂົ້າໃນຂະບວນຊາວໜຸ່ມເດີນຕາມຮອຍໄຊຊະນະຂອງບັ້ນຮົບເມືອງນໍ້າບາກ ທີ່ ແຂວງ ຫຼວງພະບາງ ໃຫ້ມີບັນຍາກາດຟົດຟື້ນມ່ວນຊື່ນ ແລະ ເພື່ອເປັນການຝຶກທັກສະໃນການນໍາໃຊ້ອາວຸດປືນຂັ້ນພື້ນຖານ, ທັງເປັນການຮັດແໜ້ນຄວາມສາມັກຄີ ລະຫວ່າງ ຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ ກັບບັນດາຄະນະຊາວໜຸ່ມບັນດາແຂວງ, ກະຊວງ, ອົງການ, ນະຄອນຫຼວງ, ສະມາຄົມນັກທຸລະກິດໜຸ່ມແຫ່ງຊາດ, ຄະນະພັກ-ຄະນະນຳກະຊວງປ້ອງກັນຄວາມສະຫງົບ ແລະ ບັນດາຄະນະບໍລິຫານງານຊາວ  ໜຸ່ມອ້ອມຂ້າງກະຊວງຕ່າງໆໃຫ້ນັບມື້ນັບແໜ້ນແຟ້ນຍິ່ງຂຶ້ນ, ເພື່ອໃຫ້ພະນັກງານການນໍາໄດ້ທົບທວນຄືນການນໍາໃຊ້ອາວຸດໃຫ້ມີຄວາມຊໍານິ, ຊໍານານ ປ້ອງກັນຕົວ ແລະ ແກ້ໄຂກໍລະນີສຸກເສີນໃຫ້ມີປະສິດທິຜົນສູງ ແລະ ເພື່ອຮັກສາຄວາມສາມັກຄີອັນແໜ້ນແຟ້ນ ລະຫວ່າງສະມາຊິກຊາວໜຸ່ມທົ່ວປະເທດ ແລະ ເພື່ອເປັນການແລກປ່ຽນບົດຮຽນ ເຊິ່ງກັນ ແລະ ກັນ ພ້ອມກັນພັດທະນາສີມືຂອງຕົນໃຫ້ດີຂຶ້ນເລື້ອຍໆ. 

ຊື່ງການແຂ່ງຂັນໃນຄັ້ງນີ້ມີນັກກິລາເຂົ້າຮ່ວມທັງໝົດ 40 ກວ່າຄົນ ທີ່ມາຈາກ 21 ພາກສ່ວນອ້ອມຂ້າງສູນກາງ ແລະ ທ້ອງຖິ່ນ,  ຜ່ານການແຂ່ງຂັນ ຊະເລີດອັນດັບທີ1 ໄດ້ແກ່ ທ່ານ ສຸລິພົນ ມິ່ງບຸບຜາ ຮອງເລຂາຄະນະບໍລິຫານງານຊາວໜຸ່ມກະຊວງ ພະລັງງານ ແລະ ບໍ່ແຮ່, ອັນດັບທີ 2  ໄດ້ແກ່ ພົຈວ ຄໍາສາຍ ຈັນທະວົງ ຮອງຫົວໜ້າກົມໃຫຍ່ການເມືອງ ກະຊວງ ປກສ, ອັນດັບທີ 3  ທ່ານ ນວນທອງ ສຸວັນວິໄຊ ຮອງເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ແລະ ອັນດັບທີ 4 ທ່ານ ບຸນເພັງ ແສງຄຳແກ້ວ ຄະນະສະຫະພັນນັກຮົບເກົ່າແຫ່ງຊາດລາວ. ໃຫ້ກຽດມອບຫຼຽນ ແລະ ຂັນລາງວັນໃຫ້ແກ່ນັກກິລາ ໂດຍ ທ່ານ ນວນທອງ ສຸວັນວິໄຊ ຮອງເລຂາຄະນະບໍລິຫານງານ ສູນກາງຊາວໜຸ່ມ ປະຊາຊົນ ປະຕິວັດລາວ ແລະ ພົຈວ ຄໍາສາຍ ຈັນທະວັງ ຄະນະພັກກະຊວງ ຮອງຫົວໜ້າກົມໃຫ່ຍການເມືອງປ້ອງກັນຄວາມສະຫງົບ.

Off

Comments are closed.