13th Sep2022

ເປີດການຝຶກຊ້ອມຮ່ວມກອບກູ້ໄພພິບັດ 3 ກອງທັບ ກໍາປູເຈຍ-ລາວ-ຫວຽດນາມ.

by somchan

ໃນວັນທີ 10 ກັນຍາ 2022 ນີ້, ຢູ່ທີ່ອ່າງນ້ໍາຫຸມ ໄດ້ມີການຝຶກຊ້ອມຮ່ວມກອບກູ້ໄພພິບັດ ລະຫວ່າງ 3 ກອງທັບ ລາວ-ຫວຽດນາມ-ກໍາປູເຈຍ ພາຍຫຼັງທີ່ທຸກເຫລົ່າຮົບ 3 ກອງທັບໄດ້ມີການກະກຽມວຽກງານທາງດ້ານແຜນທີ່-ແຜນຮ່າງ ຕະຫລອດໄລຍະເວລາ 1 ເດືອນທີ່ຜ່ານມາ, ໂດຍການ ເຂົ້າຮ່ວມຂອງ ພົນຕີ ຈັນທອງ ສອນຕະອາດ ຮອງລັດຖະມົນຕີກະຊວງປ້ອງກັນປະເທດ ສປປ ລາວ, ມີ ພົນຕີ ແປນ ໂສກ ຮິດວິເຢຍ ຫົວຫນ້າຫ້ອງການເສນາຮ່ວມ ກອງທັບແຫ່ງຣາຊະອານາຈັກກໍາປູເຈຍ, ພັນເອກ ພິເສດ ຟ້າມວັນຢາ ຮອງຫົວຫນ້າເສນາທິການກອງບັນຊາການທະຫານເຂດ 4 ກອງທັບ ສສ ຫວຽດນາມ, ມີຄະນະນໍາກະຊວງປ້ອງກັນປະເທດ, ບັນດາກົມກອງຕ່າງໆອ້ອມຂ້າງກະຊວງ, ຄະນະນໍາຂອງກໍາລັງທະຫານ 3 ຊາດ ລາວ-ຫວຽດນາມ-ກໍາປູເຈຍ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ເນື້ອໃນຂອງການຝຶກຊ້ອມຂອງ 3 ກອງທັບ ໃນຄັ້ງນີ້ ໄດ້ເເບ່ງອອກເປັນ 2 ພາກຄື: ການຊອກຄົ້ນ-ກອບກູ້ຜູ້ປະສົບໄພທາງນໍ້າ ໂດຍເເບ່ງອອກເປັນ 3 ຈຸຄື: ຈຸທີ 1 ໃຊ້ເຮືອລາດຕະເວນ ຈໍານວນ 6 ລໍາ ເພື່ອຊອກຫາຜູ້ປະສົບໄພທີ່ຕົກຄ້າງຢູ່ຕາມຈຸດຕ່າງໆ, ຈຸທີ 2 ຊອກຄົ້ນກອບກູ້ຜູ້ປະສົບໄພທີ່ຈົມຢູ່ໃຕ້ນ້ໍາດ້ວຍນັກດໍານໍ້າ, ສ່ວນຈຸທີ 3 ກອບກູ້ ແລະ ຍົກຍ້າຍຜູ້ປະສົບໄພ ຫຼື ຜູ້ບາດເຈັບ ດ້ວຍເຮືອໄປຫາເຂດທີ່ປອດໄພ, ຫລັງຈາກນັ້ນ ທະຫານອາກາດໄດ້ນໍາໃຊ້ເຮືອບີນ Z-9 ບີນ ລາດຕະເວນຊອກຄົ້ນຜູ້ປະສົບໄພຕາມຈຸດຕ່າງໆທີ່ເຮືອບໍ່ສາມາດເຂົ້າເຖິງ, ເຮືອບິນ Mi -17 ບິນ ຢ່ອນນັກກອບກູ້ລົງຊ່ວຍເຫລືອຜູ້ປະສົບໄພທີ່ຢູ່ຈຸດສູງເຂດທຸລະກັນດານ ແລະ ພື້ນທີ່ນ້ໍາຖວ້ມທີ່ມີສິ່ງ ກີດຂວາງ, ຕົ້ນໄມ້ຫັກທັບຖົມ ລວມເຖິງວຽກງານວິຊາສະເພາະປິ່ນອ້ອມຕ່າງໆ.

ໂອກາດດຽວກັນນີ້, ພົນຕີ ຈັນທອງ ສອນຕະອາດ ຮອງລັດຖະມົນຕີກະຊວງປ້ອງກັນປະເທດ ຫົວຫນ້າຄະນະຊີ້ນໍາການຝຶກຊ້ອມກອບກູ້ໄພພິບັດຮ່ວມ 3 ກອງທັບ ໄດ້ກ່າວວ່າ: ການຝຶກຊ້ອມກອບກູ້ໄພພິບັດຮ່ວມກັນ 03 ກອງທັບໃນຄັ້ງນີ້ ຖືວ່າເປັນຄັ້ງທໍາອິດ ແລະ ສຸດທີ່ມີຄວາມຫມາຍສໍາຄັນຫຼາຍ ເນື່ອງຈາກວ່າ 03 ກອງທັບ ລາວ-ຫວຽດນາມ-ກໍາປູເຈຍ ຈະໄດ້ຍົກລະດັບຄວາມຮູ້ຄວາມສາມາດ ແລະ ຄວາມຊໍານິຊໍານານ ໃນການກະກຽມຄວາມພ້ອມກອບກູ້ໄພພິບັດໃນທຸກເງື່ອນໄຂ ແລະ ໃນທຸກສະຖານະການທີ່ອາດຈະເກີດຂຶ້ນ ແລະ ຍັງເປັນການແລກປ່ຽນບົດຮຽນ, ປະສົບການ ດ້ານວິຊາສະເພາະ ແລະ ດ້ານວັດທະນະທໍາ, ຮີດຄອງປະເພນີຮ່ວມກັນ, ເສີມສ້າງຄວາມສາມັກຄີ, ສາຍພົວພັນມິດຕະພາບ ແລະ ຄວາມເຂົ້າອົກເຂົ້າໃຈເຊິ່ງກັນ ແລະ ກັນ ໃຫ້ນັບມື້ນັບແຫນ້ນແຟ້ນຍິ່ງໆຂຶ້ນ, ທັງເປັນການຍົກສູງຄວາມຮັບຜິດຊອບ, ຄວາມເປັນເຈົ້າການປະຕິບັດລະບຽບວິໄນ, ມະຕິຄໍາສັ່ງ ແລະ ແຜນການຝຶກຊ້ອມ ໃຫ້ເຂັ້ມງວດ, ສິ່ງສໍາຄັນເເມ່ນເປັນການເພີ່ມທະວີການຮັກສາຄວາມສາມັກຄີເຊິ່ງກັນ ແລະ ກັນ, ຮັບປະກັນຄວາມປອດໄພໃນທຸກດ້ານ. ນອກຈາກນີ້, ທ່ານຍັງໄດ້ສະເເດງຄວາມຍ້ອງຍໍຕໍ່ຄະນະຮັບຜິດຊອບລວມທີ່ໄດ້ເອົາໃຈໃສ່ໃນການກະກຽມຄວາມພ້ອມຮອບດ້ານ ແລະ ເນັ້ນຫນັກໃຫ້ທຸກເຫລົ່າຮົບ ເວົ້າສະເພາະເເມ່ນກໍາລັງເພື່ອນມິດກໍ່ຄື ລາວ-ຫວຽດນາມ-ກໍາປູເຈຍ ໃຫ້ເອົາໃສ່ໃນການຝຶກຊ້ອມ ເພື່ອເເນ່ໃສ່ຮັບປະກັນໄດ້ວຽກງານຄວາມປອດໄພ ແລະ ບັນລຸຜົນສໍາເລັດຢ່າງຮອບດ້ານ.

 

Off

Comments are closed.