13th Sep2022

ພິທີປະກາດຍົກຍ້າຍ, ແຕ່ງຕັ້ງຫົວຫນ້າ-ຮອງຫົວຫນ້າ ກອງບັນຊາການ ປກສ ແຂວງຫົວພັນ.

by somchan

ທ້າຍອາທິດຜ່ານມານີ້ ຢູ່ທີ່ກອງບັນຊາການ ປກສ ແຂວງຫົວພັນ ກະຊວງປ້ອງກັນຄວາມສະຫງົບ ໄດ້ຈັດພິທີປະກາດການຍົກຍ້າຍ, ແຕ່ງຕັ້ງຫົວຫນ້າ-ຮອງຫົວຫນ້າ ກອງບັນຊາການ ປກສ ແຂວງຫົວພັນ, ໂດຍການເປັນກຽດເຂົ້າຮ່ວມຂອງ ພົນເອກ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ, 

ທ່ານ ວັນໄຊ ແພງຊຸມມາ ເຈົ້າແຂວງ ແຂວງຫົວພັນ, ມີຄະນະພັກ-ຄະນະນໍາ ກະຊວງປ້ອງກັນຄວາມສະຫງົບ, ພະນັກງານການນໍາແຂວງຫົວພັນ, ຄະນະພັກ-ຄະນະບັນຊາ ກອງບັນຊາການ ທະຫານແຂວງ, ກອງບັນຊາການ ປກສ ແຂວງ, ຫົວຫນ້າຄະນະຫ້ອງອ້ອມຂ້າງ, ກອງບັນຊາການ ປກສ 10 ເມືອງ ຕະຫຼອດຮອດພະນັກງານ ຫຼັກແຫຼ່ງ, ນາຍ ແລະພົນຕໍາຫຼວດເຂົ້າຮ່ວມ.

ພົຈວ ຄອນສະຫວັນ ສົມພາໄຊ ຄະນະພັກກະຊວງ, ຮອງຫົວຫນ້າກົມໃຫຍ່ການເມືອງ, ຫົວຫນ້າກົມພະນັກງານ ກົມໃຫຍ່ການເມືອງ ກະຊວງປ້ອງກັນຄວາມສະຫງົບ ໄດ້ຜ່ານຄໍາສັ່ງຂອງ ນາຍົກລັດຖະມົນຕີ ວ່າດ້ວຍການຍົກຍ້າຍ ພົຈວ ແອນ ອຸ່ນອານົງນຸດ ຫົວຫນ້າກອງບັນຊາການ ປກສ ແຂວງຫົວພັນ ໄປຮັບຫນ້າທີ່ ໃຫມ່ ຢູ່ກະຊວງປ້ອງກັນຄວາມສະຫງົບ, ຜ່ານດຳລັດຂອງ ນາຍົກລັດຖະມົນຕີ ວ່າດ້ວຍການແຕ່ງຕັ້ງ ພ້ອ ເພັດສອນ ອິນສຸພັນ ເປັນຫົວຫນ້າກອງບັນຊາການ ປກສ ແຂວງຫົວພັນ ແລະ ຜ່ານຂໍ້ຕົກລົງຂອງລັດຖະມົນຕີກະຊວງປ້ອງກັນຄວາມສະຫງົບ ວ່າ ດ້ວຍການຕົກລົງແຕ່ງຕັ້ງ ພັທ ຄໍາແພງ ແກ້ວມູນທອງ ເປັນຮອງກອງບັນຊາການ ທັງເປັນຫົວຫນ້າ ຫ້ອງຕໍາຫຼວດ ກອງບັນຊາການ ປກສ ແຂວງຫົວພັນ.

ໂອກາດດັ່ງກ່າວ ພົນເອກ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ, ລັດຖະມົນຕີ ກະຊວງປ້ອງກັນຄວາມສະຫງົບ ຍັງໄດ້ໃຫ້ກຽດໂອ້ລົມ ໂດຍທ່ານໄດ້ກ່າວວ່າ: ການປະກາດ ຍົກຍ້າຍ ແລະ ແຕ່ງຕັ້ງ ຫົວຫນ້າ, ຮອງກອງບັນຊາການ ປກສ ແຂວງຫົວພັນ ໃນຄັ້ງນີ້ແມ່ນເພື່ອເປັນ ການປັບປຸງການຈັດຕັ້ງໃຫ້ເຂົ້າສູ່ລະບົບ ແລະ ປະຕິບັດຕາມການຈັດຕັ້ງມອບຫມາຍເຊີ່ງເປັນສິ່ງທີ່ມີ ຄວາມຫມາຍຄວາມສໍາຄັນໃນການຕັດສິນໄຊຊະນະ ໃນການປະຕິບັດຫນ້າທີ່ການເມືອງ, ໃຫ້ມີຄຸນນະພາບ ແລະ ໄດ້ຮັບປະສິດທິຜົນສູງ, ເປັນການປັບປຸງກົງຈັກການຈັດຕັ້ງໃຫ້ມີຄວາມເຂັ້ມແຂງ, ສາມາດຕອບສະຫນອງໄດ້ກັບຄວາມຮຽກຮ້ອງຕ້ອງການຂອງຫນ້າທີ່ການເມືອງໃນໄລຍະໃຫມ່, ພ້ອມ ນີ້, ພົນເອກ ວິໄລ ຫຼ້າຄໍາຟອງ ຍັງໄດ້ເນັ້ນຫນັກໃຫ້ບັນດາສະຫາຍທີ່ໄດ້ຮັບຫນ້າທີ່ໃຫມ່ ໃຫ້ສຸມໃສ່ ສຶກສາອົບຮົມການເມືອງແນວຄິດໃຫ້ພະນັກງານ, ນາຍ ແລະ ພົນຕໍາຫຼວດ ຢ່າງເລີກເຊີ່ງເຖີງຖອງ, ເພີ່ມທະວີຄວາມຮັບຜິດຊອບໃນການນໍາພາ ບັນຊາກໍ່ສ້າງພັກ, ກໍ່ສ້າງກໍາລັງ ໃຫ້ຫນັກແຫນ້ນເຂັ້ມແຂງ, ເສີມຂະຫຍາຍຄວາມສາມັກຄີພາຍໃນໃຫ້ແຫນ້ນແຟ້ນ, ເປັນແບບຢ່າງນໍາຫນ້າ, ມີຈັນຍາບັນ ຈັນຍາທໍາ, ມີຄວາມສະດຸງໄວໃນການແກ້ໄຂບັນໃຫ້ຖືກຕ້ອງ, ພາວະວິໄສ, ມີແບບແຜນການນໍາພາ, ມີຄວາມເປັນເອກະພາບເປັນຫມູ່ຄະນະ, ມີສະຕິເປັນເຈົ້າການນໍາພາ ຊີ້ນໍາກໍາລັງໃຫ້ເຕີບໃຫຍ່ ເຂັ້ມແຂງ ແລະ ທັນສະໄຫມ ຂື້ນເປັນກ້າວໆ.

Off

Comments are closed.