14th Sep2022

ສະຫລອງວັນສ້າງຕັ້ງສາຍພົວພັນການທູດ ລາວ-ຮົງກາຣີ ຄົບຮອບ 60 ປີ

by somchan

ໃນຕອນຄໍ່າຂອງວັນທີ 12 ກັນຍາ 2022, ກະຊວງການຕ່າງປະເທດ ແຫ່ງ ສປປ ລາວ ຮ່ວມກັບ ສະຖານເອກອັກຄະລັດຖະທູດ ແຫ່ງ ຣົງກາຣີ ປະຈໍາລາວ, ໄດ້ຈັດພິທີສະເຫລີມສະຫລອງ ຄົບ ຮອບ 60 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ຮົງກາຮີ ຂຶ້ນຢ່າງ ເປັນທາງການ ທີ່ນະຄອນຫລວງວຽງຈັນ, ໃຫ້ກຽດເຂົ້າຮ່ວມຂອງທ່ານ ສະເຫລືມໄຊ ກົມມະສິດ ຮອງ ນາຍົກ ລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະ ທ່ານ ຊານຕໍ່ ຊິໂພສ ເອກອັກຄະ ລັດຖະທູດ ວິສາມັນຜູ້ມີອໍານາດເຕັມ ແຫ່ງ ຮົງກາຣີ ປະຈໍາ ສປປ ລາວ, ມີບັນດາ ຮອງ ລັດຖະມົນຕີ, ບັນດາທູຕານຸທູດປະຈໍາ ສປປ ລາວ ແລະ ແຂກຖືກເຊີນຈາກພາກສ່ວນຕ່າງໆ ເຂົາຮ່ວມຢ່າງພ້ອມພຽງ.

ໃນໂອກາດນີ້ ທ່ານ ສະເຫລີມໄຊ ກົມມະສິດ ແລະ ທ່ານ ຊານພໍ້ ຊີ ໂພສ ໄດ້ກ່າວຄໍາເຫັນສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສໍາເລັດແຫ່ງການພົວພັນຮ່ວມມືໃນໄລຍະ 60 ປີຜ່ານມາ ລະຫວ່າງ ສອງ ລັດຖະບານ ກໍຄື ປະຊາຊົນສອງຊາດ ລາວ-ຮົງກາຣີ. ໃນໄລຍະໃຫມ່ນີ້ ການພົວພັນຮ່ວມມືລະຫວ່າງ ສອງປະ ເທດ ແມ່ນມີບາດກ້າວຂະຫຍາຍຕົວຕໍ່ເນື່ອງ, ໄດ້ມີການແລກປ່ຽນຢ້ຽມຢາມຂອງຄະນະຜູ້ ແທນ ໃນລະດັບຕ່າງໆຢ່າງປົກກະຕິ ທັງພາກລັດ ແລະ ເອກະຊົນ, ການຮ່ວມມືໃນຂົງເຂດຕ່າງໆ ໄດ້ ຮັບການຮັດແຫນ້ນ, ສອງປະເທດມີຄວາມເຊື່ອຫມັ້ນ ແລະ ສືບຕໍ່ສະຫນັບສະຫນູນ ເຊິ່ງກັນ ແລະ ກັນ ໃນ ເວທີພາກພື້ນ ແລະ ສາກົນ ບົນພື້ນຖານການເປັນປະເທດຄູ່ຮ່ວມມືຍຸດທະສາດ, ນອກນັ້ນ, ການ ພົວພັນຮ່ວມມືຂອງສອງປະ ເທດ ຍັງສືບຕໍ່ເສີມຂະຫຍາຍໃນຫລາຍດ້ານ ເຊັ່ນ: ດ້ານການເງິນ, ເສດຖະກິດ-ການຄ້າ, ການສຶກສາ, ກະສິກໍາ, ວັດທະນະທໍາ, ການທ່ອງທ່ຽວ ແລະ ດ້ານອື່ນໆ ເຊິ່ງ ເປັນການປະກອບສ່ວນ ທີ່ສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມ ມືທີ່ມີມາແຕ່ຍາວນານນັ້ນ ມີຄວາມຫມັ້ນຄົງຫນັກແຫນ້ນ ແລະ ມີຫມາກຜົນຕົວຈິງຍິ່ງໆຂຶ້ນ, ໂອກາດດຽວ ກັນນີ້, ທັງສອງຝ່າຍ ກໍ່ໄດ້ສະແດງຄວາມມຸ່ງຫວັງທີ່ຈະສືບຕໍ່ເສີມສ້າງ ແລະ ຮັດແຫນ້ນສາຍພົວພັນ ຮ່ວມມືທີ່ດີໃນປັດຈຸບັນ ລະຫວ່າງສອງປະເທດ ໃຫ້ເຕີບໃຫຍ່ຂະຫຍາຍຕົວຂຶ້ນສູ່ລະດັບໃຫມ່ໃນຕໍ່ຫນ້າ ແລະ ພິທີສະເຫລີມສະຫລອງໃນຄັ້ງນີ້ ແມ່ນເຕັມໄປດ້ວຍບັນຍາກາດ ແຫ່ງໄມຕີຈິດມິດຕະພາບອັນ ອົບອຸ່ນ.

ການສະເຫລີມສະຫລອງຄົບຮອບ 60 ປີ ແຫ່ງການສ້າງຕັ້ງສາຍພົວພັນການທູດ ລາວ-ຮົງກາຣີ ໃນຄັ້ງນີ້, ສອງຝ່າຍ ຍັງຈັດຫລາຍກິດຈະກໍາຮ່ວມກັນ ເພື່ອສ້າງໃຫ້ມີຂະບວນການຟົດຟື້ນ ເປັນຕົ້ນ ແມ່ນ ຈັດພິທີປູກຕົ້ນໄມ້ມິດຕະພາບ ລາວ-ຮົງກາຣີ ຢູ່ ສວນສາທາລະນະເຈົ້າອານຸວົງ ແລະ ຈັດ ກິດຈະກໍາແຂ່ງຂັນກິລາຕີດອກປີກໄກ່ມິດຕະພາບ ເພື່ອເປັນການຮັດແຫນ້ນຄວາມສາມັກຄີ ແລະ ເສີມ ສ້າງສາຍພົວພັນມິດຕະພາບ ລາວ-ຮົງກາຣີ ເຊີ່ງການແຂ່ງຂັນແມ່ນເຕັມໄປດ້ວຍ ບັນຍາກາດແຫ່ງໄມຕີຈິດມິດຕະພາບ ແລະ ເບີກບານມ່ວນຊື່ນ ສ່ອງແສງໃຫ້ເຫັນສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງສອງປະເທດ ລາວ-ຮົງກາຣີທີມີມາຢ່າງຍາວນານ.

 

Off

Comments are closed.