15th Sep2022

ປະກາດ ຮັບຮອງ 12 ບ້ານເມືອງແກ້ວອຸດົມ ເປັນບ້ານວັດທະນະທໍາ

by somchan

ພິທີປະກາດຮັບຮອງເອົາ 12 ບ້ານຢູ່ ເມືອງແກ້ວອຸດົມ ແຂວງ ວຽງຈັນ ເປັນບ້ານວັດທະນະທໍາ ຈັດຂຶ້ນໃນວັນທີ 13 ກັນຍາ 2022 ພາຍໃຕ້ການເປັນປະທານຂອງ ທ່ານ ທອງສະຫວັນ ວົງສໍາພັນ ຮອງເລຂາພັກແຂວງວຽງຈັນ, ມີ ທ່ານ ພັນທະນາສອນ ພິນພັກດີ ຮອງຫົວໜ້າກົມ ສິລະປະ-ວັດທະນະທຳກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ແສງແກ້ວ ສູນທະວົງສາ ຮອງຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງວຽງຈັນ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ທ່ານ ນາງ ຄູນຄຳ ຫລວງອາໄພ ເລຂາພັກບ້ານ, ນາຍບ້ານຖິ່ນແກ້ວ ໄດ້ຕາງໜ້າໃຫ້ 12 ບ້ານທີ່ໄດ້ຖືກຮັບຮອງເອົາເປັນບ້ານວັດທະນະທໍາ ໄດ້ລາຍງານສະພາບລວມ ຊຶ່ງໃຫ້ຮູ້ວ່າ:  ຜ່ານການນຳພາ-ຊີ້ນຳ ຂອງຄະນະຮັບຜິດຊອບ ການສ້າງຄອບຄົວ ແລະ ສ້າງບ້ານວັດທະນະທຳ ໄດ້ປະເມີນທັງໝົດ 3 ຮອບ ເຊິ່ງເຫັນວ່າທັງ 12 ບ້ານ ສາມາດຮັບຮອງເປັນບ້ານວັດທະນະທໍາໄດ້, ໃນ 12 ບ້ານທີ່ຖືກຮັບຮອງ ມີພົນລະເມືອງທັງໝົດ 8.980 ຄົນ, ຍິງ 4.562 ຄົນ, ມີ 1.769 ຄອບຄົວ ໃນນັ້ນ, ສາມາດປະເມີນໄດ້ຕາມມາດຖານທັງໝົດ 1.700 ຄອບຄົວ, ປະຊາຊົນສ່ວນຫລາຍມີອາຊີບເປັນຊາວກະສິກອນກວມ 70%, ເປັນນັກທຸລະກິດ 10%, ເປັນພະນັກງານກວມ 20%, ມີພື້ນຖານທີ່ໝັ້ນຄົງ, ມີຄວາມພ້ອມໃນການພັດທະນາ ແລະ ການສົ່ງເສີມການຜະລິດເປັນສິນຄ້າເຊັ່ນ: ປູກຝັງ-ລ້ຽງສັດ, ຫັດຖະກຳ, ອຸດສາຫະກຳ, ຄ້າຂາຍ ແລະ ບໍລິການອື່ນໆ.

ໂອກາດນີ້, ທ່ານ ທອງສະຫວັນ ວົງສຳພັນ ໄດ້ສະແດງຄວາມຍ້ອງຍໍຊົມເຊີຍຕໍ່ 12ບ້ານ ທີ່ຖືກຮັບຮອງເປັນບ້ານວັດທະນະທຳ, ພ້ອມທັງເນັ້ນ ໃຫ້ຜູ້ຮັບຜິດຊອບຊີ້ນຳການສ້າງບ້ານວັດທະທຳຂອງເມືອງ ສືບຕໍ່ກໍ່ສ້າງບ້ານທີ່ຍັງບໍ່ໄດ້ ໃຫ້ໄດ້ຮັບການຮັບຮອງໃນຕໍ່ໜ້າ ແລະ ບ້ານທີ່ໄດ້ຮັບຮອງແລ້ວ ໃຫ້ຮັກສາມູນເຊື້ອບ້ານວັດທະນະທຳນີ້ໄວ້ໃຫ້ໝັ້ນຄົງຕະຫລອດໄປ.

Off

Comments are closed.