11th Feb2016

ຫ້ອງວ່າການກະຊວງ ປກສ ຈັດກອງປະຊຸມສະຫຼຸບວຽກງານ ປະຈຳປີ 2015

by somchan

ຫ້ອງວ່າການກະຊວງ ປກສ ໄດ້ຈັດກອງປະຊຸມ ສະຫຼຸບວຽກງານ ປະຈຳປີ 2015 ແລະ ທິດທາງແຜນການປີ 2016 ໃນວັນທີ 11 ກຸມພາ 2016 ພາຍໃຕ້ ການເປັນປະທານຂອງ ພົຈວ ບຸນທ່ຽງ ຈັນທະມຸງຄຸນ ຄະນະພັກກະຊວງ ຫົວໜ້າຫ້ອງວ່າການກະຊວງ ປກສ ເປັນກຽດເຂົ້າຮ່ວມໂດຍ ພົນຕີ ກົງທອງ ພົງວິຈິດ ຮອງເລຂາຄະນະບໍລິຫານງານພັກກະຊວງ ລັດຖະມົນຕີຊ່ວຍວ່າການກະຊວງ ປກສ ມີຄະນະຫ້ອງວ່າການ ຄະນະກົມ ຫ້ອງອ້ອມຂ້າງຫ້ອງວ່າການເຂົ້າຮ່ວມ.

ພັອ ກຽງຄຳ ອິນແພງທະວົງ ຮອງຫົວໜ້າຫ້ອງວ່າການກະຊວງ ປກສ ໄດ້ໃຫ້ຮູ້ວ່າ: ໃນ 1 ປີ ຜ່ານມາ ຫ້ອງວ່າການກະຊວງ ປກສ ໄດ້ເປັນເຈົ້າການໃນການຄົ້ນຄ້ວາສັງລວມສະພາບການ ເກັບກຳຂໍ້ມູນຂ່າວສານຕ່າງໆທັງພາຍໃນ ແລະ ຕ່າງປະເທດ ປະຈຳວັນ, ປະຈຳອາທິດ ແລະ ປະຈຳເດືອນ ລາຍງານຂັ້ນເທິງເປັນປົກກະຕິ, ທັງເປັນໃຈກາງປະສານງານກັບທຸກກົມກອງ, ອົງການຢູ່ສູນກາງ ແລະ ທ້ອງຖິ່ນ ໃນການຕິດຕາມກວດກາການປະຕິບັດແນວທາງນະໂຍບາຍຂອງພັກ-ລະບຽບກົດໝາຍຂອງລັດ, ເປັນໃຈກາງປະສານງານປ້ອງກັນການມາຢ້ຽມຢາມ ແລະ ເຮັດວຽກງານທາງການຂອງການນຳຂັ້ນສູງຂອງປະເທດຕ່າງໆ ປ້ອງກັນກອງປະຊຸມລະດັບຕ່າງໆ ທັງພາຍໃນ ແລະ ຕ່າງປະເທດ ໄດ້ມີຄວາມສະຫງົບປອດໄພດີ ໄດ້ສ້າງເງື່ອນໄຂອຳນວຍສະດວກໃຫ້ການນຳກະຊວງ, ຄະນະຜູ້ແຕ່ລະຂັ້ນຂອງກະຊວງ ແລະ ທ້ອງຖິ່ນ ໄປຢ້ຽມຢາມພົບປະແລກປ່ຽນບົດຮຽນ, ໄປຝຶກອົບຮົມທັງພາຍໃນ ແລະ ຕ່າງປະເທດ, ເປັນເຈົ້າການຮັບແຂກຕ່າງປະເທດ ແລະ ອົງການສາກົນ ການນຳຂັ້ນສູງທີ່ມາຢ້ຽມຢາມ, ເຮັດວຽກນຳກະຊວງ, ເປັນເສນາທິການໃຫ້ຄະນະນຳກະຊວງໃນການຄົ້ນຄ້ວາບັນດານິຕິກຳ, ລະບຽບກົດໝາຍຕ່າງໆ ທີ່ພົວພັນເຖິງຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນຂອບເຂດທົ່ວປະເທດ. ພ້ອມທັງເອົາໃຈໃສ່ໃນການຮັບສົ່ງຂໍ້ມູນຂ່າວສານ, ມະຕິຄຳສັ່ງ, ແຈ້ງການ, ໜັງສືທາງການດ່ວນຕ່າງໆຂອງຂັ້ນເທິ່ງ ແຕ່ສູນກາງລົງຮອດທ້ອງຖິ່ນຂຶ້ນສູ່ສູນກາງ, ຮັບປະກັນເຕັກນິກປິດລັບ ແລະ ວອ່ງໄວທັນເວລາ ສາມາດສະໜອງໄດ້ຕາມຄວາມຮຽກຮ້ອງຕ້ອງການຂອງຂັ້ນເທິງ.

Off

Comments are closed.