15th Sep2022

ກອງບັນຊາການປ້ອງກັນທີ່ຕັ້ງ ຮັບຟັງໂຄສະນາສຶກສາອົບຮົມ ຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ

by somchan

ຫ້ອງກວດກາ ແລະ ຄວບຄຸມຢາເສບຕິດ ກົມໃຫຍ່ຕຳຫຼວດ ກະຊວງ ປ້ອງກັນຄວາມສະຫງົບ ໄດ້ລົງໂຄສະນາສຶກສາອົບຮົມ ຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃຫ້ ນາຍ ແລະ ພົນຕຳຫຼວດ ພາຍໃນກອງບັນຊາການປ້ອງກັນທີ່ຕັ້ງ  ໃນວັນທີ 14 ກັນຍາ 2022, ຢູ່ ໂດຍການເຂົ້າຮ່ວມຂອງ ພັອ ຄຳແກ້ວ ມະໂນລາ ຮອງຫົວໜ້າກອງບັນຊາການ ປ້ອງກັນທີ່ຕັ້ງ,  ພັອ ວົງເພັດ ແສນວົງສາ ຮອງຫົວໜ້າຫ້ອງກວດກາ ແລະ ຄວບຄຸມຢາເສບຕິດ ກົມໃຫຍ່ຕຳຫຼວດ ກະຊວງ ປ້ອງກັນຄວາມສະຫງົບ, ມີບັນດາຄະນະພັກ-ຄະນະນຳກອງບັນຊາການ, ພະນັກງານນາຍ ແລະ ພົນຕຳຫຼວດ 4 ຫ້ອງ 3 ກອງພັນ, ກອງຮ້ອຍເອກະລາດ ແລະ ສູນຝຶກອົບຮົມ ເຂົ້າຮ່ວມ.

ໃນໂອກາດນີ້ທີມງານໂຄສະນາຫ້ອງກວດກາ ແລະ ຄວບຄຸມຢາເສບຕິດ ກົມໃຫຍ່ຕຳຫຼວດ ກະຊວງ ປ້ອງກັນຄວາມສະຫງົບ ກໍ່ໄດ້ພັດປ່ຽນກັນຂຶ້ນນໍາສະເໜີກ່ຽວກັບຜົນຮ້າຍ-ໄພອັນຕະລາຍ, ການຄວບຄຸມ, ສະກັດກັ້ນ ແລະ ຕ້ານຢາເສບຕິດ, ໄດ້ນໍາສະເໜີໃຫ້ຄວາມຮູ້ກ່ຽວກັບ ກົດໝາຍວ່າດ້ວຍຢາເສບຕິດ ແລະ ປະມວນກົດໝາຍອາຍາ ພ້ອມທັງເປັນການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໃຫ້ເປັນຮູບປະທໍາ ແລະ ປະກົດຜົນເປັນຈິງ, ໂດຍທຸກຄົນຕ້ອງເປັນເຈົ້າການນໍາກັນໃນການຕ້ານ ແລະ ສະກັດກັ້ນບັນຫາຢາເສບຕິດ ເພື່ອເຮັດໃຫ້ສັງຄົມມີຄວາມສະຫງົບສຸກ.

ໃນໂອກາດນີ້, ທີມງານໂຄສະນາຫ້ອງການກວດກາ ແລະ ຄວບຄຸມຢາເສບຕິດ ກົມໃຫຍ່ຕຳຫຼວດ ກະຊວງ ປ້ອງກັນຄວາມສະຫງົບ ຍັງໄດ້ມອບໂປສເຕີ ຈຳນວນ 10 ແຜ່ນ, ແຜນພັບ ຈຳນວນ 30 ແຜ່ນ ແລະ ປຶ້ມກົດຫມາຍວ່າດ້ວຍຢາເສບຕິດອີກຈຳນວນ 5 ຫົວ ໃຫ້ກອງບັນຊາການ ປ້ອງກັນທີ່ຕັ້ງ ຕາງໜ້າມອບໂດຍ ພັອ ວົງເພັດ ແສນວົງສາ ຮອງຫົວໜ້າຫ້ອງການກວດກາ ແລະ ຄວບຄຸມຢາເສບຕິດ ກົມໃຫຍ່ຕຳຫຼວດ ກະຊວງ ປ້ອງກັນຄວາມສະຫງົບ ແລະ ຕາງໜ້າຮັບໂດຍ ພັອ ຄຳແກ້ວ ມະໂນລາ ຮອງຫົວໜ້າກອງບັນຊາການ ປ້ອງກັນທີ່ຕັ້ງ.

Off

Comments are closed.