15th Sep2022

ກົມໃຫຍ່ການເມືອງ ປກສ ເຊື່ອມຊຶມ 3 ເອກະສານສໍາຄັນ

by somchan

ໃນວັນທີ 15 ກັນຍາ 2022, ກົມໃຫຍ່ການເມືອງ ປກສ ໄດ້ຈັດພິທີເຊື່ອມຊຶມ 3 ເອກະສານສໍາຄັນຄື: ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 4 ສະໄຫມທີ XI, ວັນຄ້າຍວັນເກີດຂອງທ່ານ ປະທານ ສຸພານຸວົງ ຄົບຮອບ 113 ປີ ( 13 ກໍລະກົດ 1909-13 ກໍລະກົດ 2022) ແລະ ວັນລັດຖະທໍາມະນູນແຫ່ງຊາດ ຄົບຮອບ 31 ປີ (15 ສິງຫາ 1991-13 ສິງຫາ 2022)  ປາຖະກະຖາໂດຍ ສະຫາຍ ພັອ ປອ ຫຸມພັນ ຜິວເຂັມ ພອນ ຄະນະປະຈໍາພັກກົມໃຫຍ່ການເມືອງ ປກສ, ຫົວຫນ້າກົມພັກ, ມີບັນດາຄະນະພັກ-ຄະນະກົມ, ຄະນະຫ້ອງ, ພະ ແນກ ແລະ ພະນັກງານ-ນັກຮົບ ອ້ອມຂ້າງກົມໃຫຍ່ການເມືອງ ເຂົ້າຮ່ວມ.

ຈຸດປະສົງຂອງການເຊື່ອມຊຶມເອກະສານຄັ້ງນີ້, ເພື່ອເຮັດໃຫ້ຄະນະພັກ-ຄະນະບັນຊາຂັ້ນຕ່າງໆ ໃນກໍາລັງປ້ອງກັນຄວາມສະຫງົບ ໄດ້ຮັບຮູ້ເຂົ້າໃຈ, ເຊື່ອມຊຶມ ແລະ ກໍາແຫນ້ນເນື້ອໃນມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກ ຄັ້ງທີ 4 ສະໄຫມທີ XI ຢ່າງກວ້າງຂວາງ, ທົ່ວເຖິງ ແລະ ເລິກເຊິ່ງ, ເປັນບ່ອນອີງໃນການຜັນຂະຫຍາຍໃຫ້ເປັນແຜນງານ, ໂຄງການລະອຽດ ຕິດພັນກັບວຽກງານວິຊາສະເພາະຂອງກົມກອງ, ທ້ອງຖິ່ນ ໃນກໍາລັງປ້ອງກັນຄວາມ ສະຫງົບ, ບົນຈິດໃຈຍູ້ແຮງການຈັດຕັ້ງຜັນຂະຫຍາຍໃຫ້ເປັນຂະບວນຟົດຟື້ນ, ກວ້າງຂວາງ ແລະ ແຂງແຮງ, ສ້າງການຫັນປ່ຽນທາງດ້ານຄວາມຮັບຮູ້, ທັດສະນະແນວຄິດ ແລະ ການກະທໍາ ແນໃສ່ສົ່ງເສີມດ້ານດີ, ແກ້ໄຂຄວາມບົກຜ່ອງ, ຂໍ້ຄົງຄ້າງ ແລະ ສິ່ງທ້າທາຍຕ່າງໆ ໃນໄລຍະຜ່ານມາ, ສ້າງຄວາມເຊື່ອຫມັ້ນຂອງນາຍ ແລະ ພົນຕໍາຫຼວດ ຕໍ່ການນໍາພາຂອງ ພັກ ແລະ ການບໍລິຫານຄຸ້ມຄອງຂອງລັດ.

ພ້ອມນີ້, ກໍ ໃຫ້ເຫັນໄດ້ຜົນສໍາເລັດ, ຜົນງານອັນຍິ່ງໃຫຍ່ຂອງທ່ານ ປະທານ ສຸພານຸວົງ, ຮ່າຮຽນເອົາຄຸນສົມບັດ, ສິນທໍາ ປະຕິວັດ ຄວາມເປັນແບບຢ່າງທີ່ເຫຼື້ອມໃສສັດທາຂອງເພິ່ນ ເປັນພື້ນຖານໃນການເສີມສ້າງຄຸນທາດການເມືອງ, ມູນເຊື້ອ ຄວາມສາມັກຄີຂອງປະຊາຊົນບັນດາເຜົ່າ, ປັບປຸງກໍ່ສ້າງພັກໃຫ້ເຂັ້ມແຂງທຸກດ້ານ ເປັນເຈົ້າການຍົກສູງສະຕິລະວັງຕົວຕໍ່ ກົນອຸບາຍມ້າງເພຂອງອິດທິກໍາລັງປໍລະປັກ, ຕີຖອຍບັນດາປະກົດການຫຍໍ້ທໍ້ຕ່າງໆໃນສັງຄົມ, ຮັບປະກັນສະຖຽນລະ ພາບທາງດ້ານການເມືອງຢ່າງຫນັກແຫນ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ພ້ອມທັງປຸກລະດົມນ້ໍາ ໃຈຮັກຊາດ, ຮັກລະບອບໃຫມ່, ເປັນເຈົ້າຕົນເອງ, ເຊີດຊູບົດບາດການນໍາພາຂອງພັກ, ສ້າງຄວາມເຂັ້ມແຂງດ້ວຍຕົນເອງ ຄຽງຄູ່ກັບການປຸກລະດົມຂະບວນການແຂ່ງຂັນຮັກຊາດ ແລະ ພັດທະນາ.

ນອກຈາກນີ້, ກໍເພື່ອເປັນການເພີ່ມທະວີສະຕິເຄົາລົບ ແລະ ປະຕິບັດລະບຽບກົດຫມາຍ ໃຫ້ຖືກຕ້ອງ ແລະ ເຂັ້ມງວດ, ຍົກລະດັບການຄຸ້ມຄອງລັດ-ຄຸ້ມຄອງສັງຄົມດ້ວຍກົດຫມາຍໃຫ້ມີປະສິດທິຜົນສູງຂຶ້ນ ແລະ ສໍາຫຼວດກວດກາຄືນ ການຈັດຕັ້ງປະຕິບັດລັດຖະທໍາມະນູນ ແລະ ກົດຫມາຍໃນ 31 ປີ ທີ່ຜ່ານມາ.

Off

Comments are closed.