15th Sep2022

ຄົນຮ້າຍໃຊ້ອາວຸດປືນຍິງເຈົ້າຫນ້າທີ່ເສຍຊີວິດ 1 ສະຫາຍ

by somchan

ໃນຄັ້ງວັນທີ 14 ກັນຍາ 2022, ເປົ້າຫມາຍຢາເສບຕິດໃຊ້ປືນແກັບຍິງເຈົ້າຫນ້າທີ່ຕໍາຫຼວດເສຍຊີວິດ 1 ສະຫາຍໃນຂະນະທີ່ ອອກກວດກາພິສຸດແຫລ່ງຂ່າວຕາມຫລັກວິຊາສະເພາະທີ່ ໄດ້ຮັບແຈ້ງຈາກພົນລະເມືອງດີ, ເຊິ່ງເຫດການດັ່ງກ່າວ ເກີດຂຶ້ນທີ່ບ້ານນາຄາ ເມືງຊໍາເຫນືອ ແຂວງຫົວພັນ.

ເຈົ້າຫນ້າທີ່ ປກສ ເມືອງຊໍາເຫນືອ ໃຫ້ຂໍ້ມູນວ່າ : ໃນວັນທີ 12 ກັນຍາ 2022 ກອງບັນຊາການ ປກສ ເມືອງຊໍາເຫນືອ ໄດ້ແຕ່ງຕັ້ງກໍາລັງວິຊາສະເພາະ ພະແນກສັນຕິບານ, ພະແນກ 504 ລົງສົມທົບ ເຮັດວຽກກັບ ປກສ ກຸ່ມບ້ານຊາງຄໍາ ລົງເກັບກໍາຂໍ້ມູນ ເພື່ອແກ້ໄຂບັນຫາປະກົດການຫຍໍ້ທໍ້ຕ່າງໆ ຢູ່ໃນ ກຸ່ມບ້ານຊາງຄໍາ ໂດຍສະແມ່ນແກ້ໄຂບັນຫາຢາເສບຕິດ ແລະ ສະພາບການອື່ນໆ ທີ່ກ່ຽວພັນເຖິງ ຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອຍ.

ມາຮອດເວລາ 4:00 ເຊົ້າຂອງວັນທີ 14 ກັນຍາ 2012 ທີມງານ ປກສ ເມືອງຊໍາເຫນືອ ໄດ້ສົມທົບ ກັບ ປກສ ກຸ່ມບ້ານຊາງຄໍາ ອອກກວດກາພິສູດເເຫຼງຂ່າວຕາມພົນລະເມືອງດີລາຍງານ ວ່າມີບຸກຄົນ ມີ ການເຄື່ອນໄຫວກ່ຽວກັບບັນຫາຢາເສບຕິດ ແລະ ມີອາວຸດລ່າເນື້ອ ໄວ້ໃນຄອບຄອງ ເມື່ອທີມງານ ເດີນທາງໄປໃກ້ຊີຮອດຄຸ້ມພູປຽດປະມານ 900 ແມັດ, ໄດ້ເຫັນຊາຍຄົນຫນື່ງບໍ່ຮູ້ຊື່ ຖືອາວຸດລ່າເນື້ອ ປະເພດປືນແກັບ ຍ່າງປົນກັບນັກຮຽນກໍາລັງຍ່າງໄປເຂົ້າໂຮງຮຽນ, ຈາກນັ້ນເຈົ້າຫນ້າທີ່ໄດ້ຍ່າງເຂົ້າໄປຫາ ເປົ້າຫມາຍເພື່ອຈະທໍາການກວດກາ, ພໍຍ່າງໄປຮອດຫ່າງຈາກຊາຍຄົນນັ້ນປະມານ 3 ແມັດ, ຊາຍຄົນ ດັ່ງກ່າວໄດ້ໃຊ້ປືນແກັບທີ່ຜູ້ກ່ຽວຖືຢູ່ຍິງໃສ່ ຮອ ຊອມ ສີສົມທອງ ໄດ້ຮັບບາດເຈັບສາຫັດ ແລ້ວເອົາ ຕົວຫຼົບຫນີ. ຫຼັງຈາກນັ້ນ, ເຈົ້າຫນ້າທີ່ໄດ້ເອົາຕົວເຈົ້າຫນ້າທີ່ ທີ່ຖືກຍິງສົ່ງໂຮງຫມໍແຂວງຫົວພັນ ແລະ ຜູ້ກ່ຽວໄດ້ເສຍຊີວິດໃນເວລາຕໍ່ມາ. – ປັດຈຸບັນ ກອງບັນຊາການ ປກສ ແຂວງຫົວພັນໄດ້ແຕ່ງຕັ້ງອົງການວິຊາສະເພາະລົງກວດກາລົງ ສະຖານທີ່ເກີດເຫດລົງເກັບກໍາຂໍ້ມູນ ສືບສວນ – ສອບສວນຊອກຄົ້ນຫາຜູ້ກະທໍາຜິດມາດໍາເນີນຄະດີ ຕາມກົດຫມາຍ.

ສໍາລັບການປະຕິບັດນະໂຍບາຍຕໍ່ນາຍຕໍາຫຼວດທີ່ເສຍຊີວິດ, ພາກສ່ວນທີ່ກ່ຽວຂ້ອງ ໂດຍສະເພາະ ກະຊວງ ປກສ ແມ່ນກໍາລັງເລັ່ງໃຫ້ການຊ່ວຍເຫຼືອ ແລະ ປະຕິບັດນະ ໂຍບາຍຕໍ່ຄອບຄົວຢ່າງເຕັມທີ່

 

Off

Comments are closed.