19th Sep2022

ກະຊວງປ້ອງກັນຄວາມສະຫງົບມອບລົດຮັບ-ສົ່ງຄົນເຈັບສຸກເສີມ ໃຫ້ແຂວງສະຫວັນນະເຂດ

by somda phoneor

ໃນວັນທີ 16 ກັນຍາ 2022 ກະຊວງປ້ອງກັນຄວາມສະຫງົບ ໄດ້ມີພິທີ ມອບລົດຮັບສົ່ງຄົນເຈັບສຸກເສີມໃຫ້ ແຂວງ ສະຫວັນນະເຂດ ໂດຍໃຫ້ກຽດມອບໂດຍ ພົທ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ແລະ ໃຫ້ກຽດຮັບໂດຍ ທ່ານ ສັນຕິພາບ ພົມວິຫານ, ເຈົ້າແຂວງໆສະຫວັນນະເຂດ ເຊິ່ງລົດທີ່ມອບ-ຮັບ ໃນຄັ້ງນີ້ຈຳນວນ 1 ຄັນ ທີ່ໄດ້ຮັບການຊ່ວຍເຫຼືອຈາກອົງການໄອຍະການສູງສຸດ ແຫ່ງ ສາທາລະນະລັດ ເກົາຫຼີ ມີມູນຄ່າທັງໝົດ 535 ລ້ານກີບ.

ລົດຄັນດັ່ງກ່າວແມ່ນເພື່ອນໍາໃຊ້ເຂົ້າໃນວຽກງານປິ່ນປົວ ແລະ ຟື້ນຟູສຸຂະພາບຜູ້ຕິດຢາເສບຕິດ ຢູ່ສູນປິ່ນປົວ ແລະ ຟື້ນຟູສຸຂະພາບຜູ້ຕິດຢາເສບຕິດ ແຂວງສະຫວັນນະເຂດ ໃຫ້ມີປະສິດທິຜົນສູງຂຶ້ນກວ່າເກົ່າ ໂດຍສະເພາະແນໃສ່ຮັບໃຊ້ໃຫ້ແກ່ວຽກງານປິ່ນປົວພາຍໃນສູນດັ່ງກ່າວໃນກໍລະນີນຳສົ່ງຄົນເຈັບກໍລະນີສຸກເສີນ. ພ້ອມທັງເປັນການປະກອບສວນເຂົ້າໃນການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາ ຢາເສບຕິດ 2021-2023 ໃຫ້ປະກົດຜົນເປັນຈິງ.

ໃນໂອກາດນີ້ ພົທ ກົງທອງ ພົງວິຈິດ ກຳມະການສູນກາງພັກ, ຮອງລັດຖະມົນຕີກະຊວງ ປ້ອງກັນຄວາມສະຫງົບ ໄດ້ກ່າວກ່ຽວກກັບຈຸດປະສົງຂອງການມອບລົດໂຮງໝໍໃນຄັ້ງນີ້ ແລະ ທ່ານ ສັນ ຕິພາບ ພົມວິຫານເຈົ້າແຂວງໆສະຫວັນນະເຂດ ກໍ່ໄດ້ກ່າວຮັບ ແລະ ສະແດງຂອບໃຈ ມາຍັງກະຊວງປ້ອງກັນຄວາມສະຫງົບ ທີ່ໄດ້ໃຫ້ຄວາມສຳຄັນເປັນຫວ່ງເປັນໄຍໃຫ້ການຊ່ວຍເຫຼືອແກ່ແຂວງສະຫວັນນະເຂດ ໂດຍສະເພາະແມ່ນໃນຂົງເຂດ ວຽກງານກວດກາ ແລະ ຄວບຄຸມຢາເສບຕິດ ກໍຄືວຽກງານປິ່ນປົວ ແລະ ຟື້ນຟູສຸຂະພາບຜູ້ຕິດຢາເສບຕິດ ຢູ່ສູນປິ່ນປົວ ແລະ ຟື້ນຟູສຸຂະພາບຜູ້ຕິດຢາເສບຕິດ ແຂວງສະຫວັນນະເຂດ ໃຫ້ມີປະສິດທິຜົນສູງຂຶ້ນ.

Comments are closed.