20th Sep2022

ພິທີມອບ-ຮັບໜ້າທີ່ ລະຫວ່າງຫົວໜ້າກອງບັນຊາການ ປກສ ແຂວງຫົວພັນ ຜູ້ເກົ່າ ແລະ ຜູ້ໃໝ່

by somda phoneor

ວັນທີ 19 ກັນຍາ 2022 ນີ້ ກອງບັນຊາການ ປກສ ແຂວງຫົວພັນ ໄດ້ຈັດພິທີມອບ-ຮັບໜ້າທີ່ລະຫວ່າງຫົວໜ້າກອງບັນຊາການ ປກສ ແຂວງຫົວພັນ ຜູ້ເກົ່າ ແລະ ຜູ້ໃໝ່ ຂື້ນ, ເປັນກຽດເຂົ້າຮ່ວມຂອງທ່ານ ເພີດ ມາປັນຍາ ຮອງເລຂາພັກແຂວງ ຜູ້ປະຈຳການ ຊີ້ນຳແນວຄິດທິດສະດີ, ຊີ້ນຳວຽກງານພັກ-ພະນັກງານ ຂັ້ນແຂວງ, ມີຄະນະພັກ ຄະນະບັນຊາກອງບັນຊາການ ປກສ ແຂວງ, ຫົວໜ້າຄະນະຫ້ອງ, ຄ້າຍຄຸມຂັງ, ກອງພັນ ແລະ ພະນັກງານຫຼັກແຫຼ່ງເຂົ້າຮ່ວມ.

ໃນພິທີ ພົຈວ ແອນ ອຸ່ນອານົງນຸດ ຫົວໜ້າກອງບັນຊາການ ປກສ ແຂວງຫົວພັນ ຜູ້ເກົ່າ           ໄດ້ຜ່ານບົດສະຫຼຸບຕີລາຄາ ການເຄື່ອນໄຫວຈັດຕັ້ງນຳພາ ກຳລັງປ້ອງກັນຄວາມສະຫງົບທົ່ວ ແຂວງຫົວພັນ ໃນໄລຍະທີ່ຜ່ານມາ ເຊີ່ງຍົກໃຫ້ຫຼາຍດ້ານຜົນງານທີ່ພົ້ນເດັ່ນ ເປັນຕົ້ນໄດ້ເອົາໃຈໃສ່ສຶກສາອົບຮົມວຽກງານການເມືອງແນວຄິດໃຫ້, ນາຍ ແລະ ພົນຕຳຫຼວດ ເປັນປົກກະຕິ, ຄົ້ນຄ້ວາເຊື້ອມຊືມບັນດາມະຕິຄຳສັ່ງ, ກຳແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ລະບຽບວິໄນຂອງກຳລັງຢ່າງເຂັ້ມງວດ, ນຳພາກໍ່ສ້າງປັບປຸງກົງຈັກການຈັດຕັ້ງ ກຳລັງປ້ອງກັນຄວາມສະຫງົບແຂວງຫົວພັນ ໃຫ້ມີຄວາມໜັກແໜ້ນທາງດ້ານການເມືອງ, ເຂັ້ມແຂງທາງດ້ານການຈັດຕັ້ງ, ມີແບບແຜນວິທີເຮັດວຽກທີ່ສອດຄອງ ແລະ ທັນສະໄໝ, ປະຕິບັດນະໂຍບາຍເລື່ອນຊັ້ນ, ເລື່ອນໜ້າທີ່ຕ່ຳແໜ່ງໃຫ່ນາຍ ແລະ ພົນຕຳຫຼວດ ຜູ້ທີ່ມີຜົນງານດ້ວຍຄວາມເໝາະສົມ, ຕິດພັນກັບການນຳພາ-ຊີ້ນຳ ວຽກງານວິຊາສະເພາະ ໃຫ້ມີຄວາມເຂັ້ມແຂງ ມີຄວາມສຳນິສຳນານ, ເປັນແບບຢ່າງນຳໜ້າໃນການຈັດຕັ້ງປະຕິບັດໜ້າທີ່ວຽກງານ, ຈຳແນກໄດ້ມິດ ສັດຕູຢ່າງຈະແຈ້ງ, ນຳພາປັບປຸງວຽກງານພະລາທິການລ້ຽງດູກຳລັງ ປັບປຸງແກ້ໄຂຊີວິດການເປັນຢູ່ຂອງກົມກອງ ແລະ ບຸກຄົນ ຕາມທິດກຸ້ມຕົນເອງ, ເພີ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງ, ນຳພາຈັດຕັ້ງຜັນຂະຫຍາຍວຽກງານພົວພັນການຕ່າງປະເທດເຂົ້າໃນຂົງເຂດວຽກງານປ້ອງກັນຄວາມສະຫງົບ ກັບປະເທດເພື່ອນບ້ານໄກ້ຄຽງໄດ້ເປັນຢ່າງດີ.

ໃນພິທີຍັງໄດ້ລົງນາມເຊັນບົດບັນທຶກມອບ-ຮັບໜ້າທີ່ ລະຫວ່າງ ພົຈວ ແອນ ອຸ່ນອານົງນຸດ ຫົວໜ້າກອງບັນຊາການ ປກສ ແຂວງຫົວພັນ ຜູ້ເກົ່າ ແລະ ພັອ ເພັດສອນ ອິນສຸພັນ ຫົວໜ້າກອງບັນຊາການ ປກສ ແຂວງຫົວພັນ ຜູ້ໃໝ່, ເພື່ອສືບຕໍ່ນຳພາ-ຊີ້ນຳກຳລັງປ້ອງກັນຄວາມສະຫງົບແຂວງຫົວພັນ ໃຫ້ມີຄວາມເຕີບໃຫຍ່ເຂັ້ມແຂງ ແລະ ທັນສະໄໝ ເທື່ອລະກ້າວ.

Comments are closed.