20th Sep2022

ກອງບັນຊາການ ປກສ ເມືອງທ່າພະບາດ ແຂວງບໍລິຄໍາໄຊ ປະກາດປັບປຸງການຈັດຕັ້ງ.

by somda phoneor

ວັນທີ 19 ກັນຍາ 2022 ນີ້, ກອງບັນຊາການ ປກສ ເມືອງທ່າພະບາດ ແຂວງບໍລິຄໍາໄຊ, ໄດ້ຈັດພິທີ ປະກາດຍົກຍ້າຍ ແລະ ແຕ່ງຕັ້ງພະນັກງານ ຂັ້ນນຳພາ-ບັນຊາ, ໂດາຍການເປັນປະທານ ຂອງ ທ່ານ ສົມສົດ ແສງອາພອນ ເຈົ້າເມືອງທ່າພະບາດ, ມີ ພັນເອກ ກົງຈັນ ໄຊປັນຍາ ຫົວໜ້າກອງບັນຊາການ ປກສ ແຂວງ,  ມີຄະນະພັກ-ຄະນະບັນຊາກອງບັນຊາການ ປກສ ແຂວງ, ກອງບັນຊາການທະຫານເມືອງ, ກອງບັນຊາການ ປກສ ເມືອງ, ພ້ອມດ້ວຍພະນັກງານຫຼັກແຫຼ່ງເຂົ້າຮ່ວມ.

ພັທ ອວດ ວົງໄຊ ຫົວໜ້າຫ້ອງການເມືອງ ປກສ ແຂວງ ໄດ້ຜ່ານຂໍ້ຕົກລົງຂອງລັດຖະມົນຕີກະຊວງປ້ອງກັນຄວາມສະຫົງບ ວ່າດ້ວຍການຍົກຍ້າຍ ແລະ ແຕ່ງຕັ້ງ ພັນໂທ ສຸກສະຫັວນ ບຸບຜາພັນ ຈາກຫ້ອງສັນຕິບານ ປກສ ແຂວງ ໄປຮັບໜ້າທີ່ໃໝ່ເປັນຫົວໜ້າກອງບັນຊາການ ປກສ ເມືອງ ທ່າພະບາດ, ຍົກຍ້າຍ ແລະ ແຕ່ງຕັ້ງ ພັນໂທ ດວງໄຊ ຈັນທະວັງໂສ ຈາກ ປກສ ເມືອງ ທ່າພະບາດ ໄປຮັບໜ້າທີ່ໃໝ່ເປັນຮອງຫ້ອງຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ ປກສ ແຂວງ, ຍົກຍ້າຍ ແລະ ແຕ່ງຕັ້ງ  ພັນໂທ ບຸນເຕີມ ສີສຸກລາດ ຈາກ ປກສ ເມືອງທ່າພະບາດ ເປັນຮອງຄ້າຍຄຸມຂັງ-ດັດສ້າງ ປກສ ແຂວງ, ແຕ່ງຕັ້ງ ພັນໂທ ສອນຄໍາ ພົມມະຈັນ ເປັນຮອງຫົວໜ້າກອງບັນຊາການ ປກສ ເມືອງ ທ່າພະບາດ.

ໂອກາດດຽວກັນ  ພັນໂທ ດວງໄຊ ຈັນທະວັງໂສ ຫົວໜ້າກອງບັນຊາການ ປກສ ເມືອງທ່າພະບາດ ຜູ້ເກົ່າ ກໍ່ໄດ້ຜ່ານບົດສະຫຼຸບການຊີ້ນໍາ-ນໍາພາ ໃນໄລຍະຜ່ານມາ ຂອງຄະນະພັກຮາກຖານ ປກສ ເມືອງທ່າພະບາດ, ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ທີ່ຫົວໜ້າກອງບັນຊາການ ປກສ ເມືອງທ່າພະບາດ ຜູ້ໃໝ່ ຈະຕ້ອງໄດ້ສືບຕໍ່ຈັດຕັ້ງປະຕິບັດ, ປັບປຸງແກ້ໄຂ ສືບຕໍ່ຊີ້ນໍາ-ນໍາພາ ກໍາລັງປ້ອງກັນຄວາມສະຫງົບເມືອງທ່າພະບາດ ເຮັດສໍາເລັດໜ້າທີ່ການເມືອງ ທີ່ຄະນະພັກຂັ້ນເທິງມອບໝາຍໃຫ້ສໍາເລັດ, ຫຼັງຈາກນັ້ນ ກໍ່ໄດ້ລົງນາມເຊັນບົດບັນທືກມອບ-ຮັບໜ້າທີ່ ລະຫວ່າງ  ພັນໂທ ສຸກສະຫວັນ ບຸບຜາພັນ ຫົວໜ້າກອງບັນຊາການ ປກສ ເມືອງທ່າພະບາດ ຜູ້ໃໝ່ ແລະ ພັນໂທ ດວງໄຊ ຈັນທະວັງໂສ ຫົວໜ້າກອງບັນຊາການ ປກສ ເມືອງ ທ່າພະບາດ ຜູ້ເກົ່າ.

ຕອນທ້າຍ ຄະນະປະທານກໍ່ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາຕໍ່ຄະນະພັກ-ຄະນະກອງບັນຊາການ, ນາຍ ແລະ ພົນຕໍາຫຼວດ ປກສ ເມືອງທ່າພະບາດ, ເຊີ່ງທ່ານໄດ້ເນັ້ນໜັ້ກ ໃຫ້ສືບຕໍ່ເຮັດວຽກງານສືກສາອົບຮົມການເມືອງ-ແນວຄິດ ໃຫ້ແກ່ນາຍ ແລະ ພົນຕໍາຫຼວດ ຢ່າງເປັນປົກກະຕິຕໍ່ເນື່ອງ, ເອົາໃຈໃສ່ປັບປຸງແບບແຜນວິທີເຮັດວຽກໃຫ້ມີວິທະຍາສາດ ແລະ ທັນສະໄໝ, ຫັນເອົາພະນັກງານລົງກໍ່ສ້າງຮາກຖານການເມືອງ, ແກ້ໄຂປະກົດການຫຍໍ້ທໍ້ຕ່າງໆທີ່ເກີດຂື້ນໃນສັງຄົມໃຫ້ຫຼຸດໜ້ອຍຖອຍລົງ ຕິດພັນກັບການຈັດຕັ້ງປະຕິບັດ ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ໃຫ້ໄດ້ຮັບຜົນສໍາເລັດຢ່າງມີປະສິດທິຜົນສູງ.

 

Comments are closed.