21st Sep2022

ຮອງລັດຖະມົນຕີກະຊວງສຶກສາທິການ ແລະ ກິລາຕ້ອນຮັບປະທານກຸ່ມມິດຕະພາບສະມາຊິກ ລັດຖະສະພາໄທ-ລາວ

by somda phoneor

ໃນວັນທີ 20 ກັນຍາ ນີ້ ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີກະຊວງສຶກສາທິການ ແລະ ກິລາ ພ້ອມດ້ວຍຄະນະ ໄດ້ຕ້ອນຮັບການເຂົ້າຢ້ຽມຂ່ໍານັບຂອງ ທ່ານ ຈະເດັດ ອິນ ສະຫວ່າງ ສະມາຊິກວຸດທິສະພາ ປະທານກຸ່ມມິດຕະພາບສະມາຊິກລັດຖະສະພາໄທ – ລາວພ້ອມ ດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສາທາລະນະລັດ ປະຊາທິປະໄຕ ປະຊາຊົນລາວ ໃນລະຫວ່າງວັນທີ 20 – 23 ກັນຍານີ້.

ໂອກາດນີ້ ທ່ານ ຈະເດັດ ອິນສະຫວ່າງ ກໍ່ໄດ້ລາຍການແຜນການເຄື່ອນໄຫວ ຢ້ຽມຢາມ ແລະ ເຮັດວຽກຢູ່ລາວໃຫ້ທ່ານຮອງລັດຖະມົນຕີ ກະຊວງສຶກສາທິການ ແລະ ກິລາ ໄດ້ຮັບຊາບ ຈຸດປະສົງຂອງການເຂົ້າພົບປະໃນຄັ້ງນີ້ເພື່ອປຶກສາຫາລື ວຽກງານການຮ່ວມມືພັດທະນາລະຫວ່າງໄທ – ລາວ ໃນຂົງເຂດວຽກງານການສຶກສາ, ກາ ແລກປ່ຽນຄະນະຄູ – ອາຈານ ນັກຮຽນ ແລະ ນັກສຶກສາ; ການຮ່ວມມືລະຫວ່າງປະເທດໄທກັບປະເທດລາວ ດ້ານກິລາ ພ້ອມນີ້ທ່ານຮອງລັດຖະມົນຕີກະຊວງສຶກສາທິການ ແລະ ກິລາ ກໍ່ໄດ້ກ່າວຕ້ອນຮັບທ່ານ ຈະເດັດ ອິນສະຫວ່າງ ສະມາຊິກວຸດທິສະພາ ປະທານກຸ່ມມິດຕະພາບສະມາຊິກລັດຖະສະພາໄທ – ລາວ ພ້ອມດ້ວຍຄະນະຢ່າງອົບອຸ່ນ ພ້ອມທັງກ່າວຂອບໃຈເຊີ່ງໄລຍະຜ່ານມາລັດຖະບານໄທກໍ່ໄດ້ໃຫ້ການຊ່ວຍເຫລືອແກ່ລັດຖະບານລາວ ເປັນຕົ້ນແມ່ນການສ້າງຄວາມເຂັ້ມແຂງຂອງຄູອາຈານໂດຍການແລກປ່ຽນວິຊາການ; ໃຫ້ທືນແລກປ່ຽນແກ່ນັກສຶກສາ, ການພັດທະນາການວິໄຈ ການນໍາໃຊ້ຫ້ອງທົດລອງວິທະຍາສາດ ເຮັດໃຫ້ວຽກງານການສຶກສາຂອງລາວພັດທະນາຂື້ນໄປເລື້ອຍໆ ຈາກນັ້ນທັງ 2 ຝ່າຍ ກໍ່ໄດ້ປຶກສາຫາລືຮ່ວມມືກັນພັດທະນາວຽກງານການສຶກສາວິທະຍາສາດ ແລະ ກິລາ ໃນຊຸມປີຕໍ່ຫນ້າ ເພື່ອເປັນການສົ່ງເສີມ ສາຍພົວພັນທີ່ມີມາແຕ່ດົນນານຖານບ້ານໄກ້ເຮືອນຄຽງໃຫ້ແຫນ້ນແຟ້ນຍິ່ງຂື້ນ.

Comments are closed.