11th Mar2016

ພິທີມອບ-ຮັບ ແລະ ເປີດນຳໃຊ້ອະນຸສອນ ສະຖານຖ້ຳສັນຕິລາດສູນກາງ ກະຊວງ ປກສ

by somchan

ພິທີມອບ-ຮັບ ແລະ ເປີດນຳໃຊ້ອະນຸສອນ ສະຖານຖ້ຳສັນຕິລາດສູນກາງ ທີ່ບ້ານວຽງໄຊ ເມືອງວຽງໄຊ ແຂວງຫົວພັນ ໄດ້ຈັດຂຶ້ນໃນວັນທີ 11 ມີນາ 2016ນີ້ ໂດຍການເຂົ້າຮ່ວມຂອງ ພົນຕີ ສົມແກ້ວ ສີລາວົງ ເລຂາທິການສູນກາງພັກ ລັດຖະມົນຕີວ່າການກະຊວງ ປກສ, ມີເຈົ້າແຂວງຫົວພັນ, ລັດຖະມົນຕີຊ່ວຍວ່າການ, ຫ້ອງວ່າການກະຊວງ, ກົມໃຫຍ່, ກົມກອງອ້ອມຂ້າງກະຊວງ ປກສ, ພະນັກງານປະຕິວັດອາວຸໂສ-ບຳນານ, ຕ່າງໜ້າຄອບຄົວອະດີດການນຳຂອງກະຊວງປ້ອງກັນຄວາມສະຫງົບ, ຕ່າງໜ້າພະແນກການຕ່າງໆອ້ອມຂ້າງສູນກາງ, ອ້ອມຂ້າງແຂວງເຂົ້າຮ່ວມ.

ຖ້ຳສັນຕິລາດ 001

ພັນໂທ ກໍລະກັນ ຄຳພູປະຖົມ ຮອງກົມຄົ້ນຄ້ວາວິທະຍາສາດ ແລະ ປະຫວັດສາດ ກະຊວງ ປກສ ກ່າວວ່າ: ອະນຸສອນສະຖານຖ້ຳສັນຕິລາດສູນກາງ ເລີ່ມມີການສຳຫຼວດກວດກາໃນຕົ້ນປີ 2012 ສະຖານທີ່ແຫ່ງນີ້ ຕັ້ງຢູ່ບ້ານວຽງໄຊ ເມືອງວຽງໄຊ ແຂວງຫົວພັນ ຫ່າງຈາກເທດສະບານເມືອງ 1,5 ກິໂລແມັດ, ມີເນື້ອທີ່ທັງໝົດ 27.374,10 ຕາແມັດ. ສະຖານທີ່ດັ່ງກ່າວ ເປັນສະຖານທີ່ທາງປະຫວັດສາດຂອງກຳລັງປ້ອງກັນຄວາມສະຫງົບ ເຊີ່ງເປັນສູນເຄື່ອນໄຫວຊີ້ນຳ-ບັນຊາ ແລະ ດຳລົງຊີວິດຂອງກຳລັງປ້ອງກັນຄວາມສະຫງົບ ເພື່ອປົກປັກຮັກສາເຂດທີ່ໜັ້ນ, ປ້ອງກັນຜູ້ນຳພັກ-ລັດຂອງການປະຕິວັດໃນຊຸມປີ 1964-1975.

ຍ້ອນເຫັນໄດ້ຄວາມໝາຍຄວາມສຳຄັນຂອງສະຖານທີ່ດັ່ງກ່າວນີ້ ລັດຖະມົນຕີຂອງກະຊວງປ້ອງກັນຄວາມສະຫງົບຈຶ່ງໄດ້ຕົກລົງຮັບຮອງເອົາໂຄງການບູລະນະອະນຸສອນສະຖານຖ້ຳສັນຕິລາດສູນກາງ ເຊິ່ງແບ່ງອອກເປັນສອງໄລຍະໃນການກໍ່ສ້າງ ຄື: ໄລຍະທີ 1 ເລີ່ມແຕ່ວັນທີ 1 ມັງກອນ ຫາ ວັນທີ 31 ພຶດສະພາ 2015, ໄລຍະທີ 2 ເລີ່ມແຕ່ວັນທີ 1 ຕຸລາ 2015 ຫາ ວັນທີ 29 ກຸມພາ 2016 ໄດ້ສຳເລັດຮ້ອຍສ່ວນຮ້ອຍ ລວມໄລຍະເວລາ 10 ເດືອນ. ໂດຍແມ່ນບໍລິສັດພອນຈະເລີນກໍ່ສ້າງ ແລະ ຂົນສົ່ງກະສິກໍາຄົບວົງຈອນ ຂາອອກ-ຂາເຂົ້າຈຳກັດຜູ້ດຽວ ເປັນຜູ້ຮັບເໝົາ ແລະ ລົງທຶນກໍ່ສ້າງກ່ອນ 100% ໃນມູນຄ່າທັງໝົດ 4.259.341.000 ກີບ ເຊິ່ງອະນຸສອນສະຖານຖ້ຳສັນຕິລາດ, ຖ້ຳປະກອບອາວຸດ, ຖ້ຳພະລາທິການ ແລະ ຈຸດທີ່ຕັ້ງກອງຮ້ອຍ 2.

ທ່ານ ອຳພອນ ມາລາວົງ ຜູ້ອຳນວຍການບໍລິສັດພອນຈະເລີນກໍ່ສ້າງ ແລະ ຂົນສົ່ງກະສິກຳຄົບວົງຈອນ ຂາອອກ-ຂາເຂົ້າຈຳກັດຜູ້ກຽວ ກ່າວວ່າ: ໂດຍປະຕິບັດຕາມສັນຍາຮັບເໝົາກໍ່ສ້າງ-ບູລະນະສະຖານທີ່ ທາງປະຫວັດສາດຂອງກຳລັງປ້ອງກັນຄວາມສະຫງົບທີ່ບ້ານວຽງໄຊ ເມືອງວຽງໄຊ ແຂວງຫົວພັນ ທາງບໍລິສັດໄດ້ສຸມສະຕິປັນຍາ, ທຶນຮອນ ເຂົ້າໃສ່ໂຄງການດ້ວຍຄວາມຮັບຜິດຊອບສູງ, ມີແຜນດຳເນີນງານເປັນລະບົບຄົບຊຸດ, ມີນາຍຊ່າງຊຳນິ-ຊຳນານ ແລະ ມີປະສົບການສູງ ເຮັດໃຫ້ໂຄງການກໍ່ສ້າງໄດ້ສຳເລັດຕາມລະດັບຄາດໝາຍເປັນຕົ້ນ: ການເຮັດຮົ່ວໜາມໝາກຈັບ, ເສັ້ນທາງເຂົ້າ ແລະ ເດີນຈອດລົດ, ກໍ່ສ້າງຂັ້ນໄດຂຶ້ນຖ້ຳຫ້ອງການສັນຕິລາດ, ໄຟຟ້າ, ວຽກງານກໍ່ສ້າງສາລາ, ເທເປຕົງເດີນຈອດລົດ ແລະ ກໍ່ສ້າງສາລາໜ້າຖ້ຳ ແລະ ອື່ນໆ.

ຖ້ຳສັນຕິລາດ 002

ໂຄງການດັ່ງກ່າວນີ້ ໄດ້ເຊັນບົດບັນທຶກມອບ-ຮັບ ລະຫວ່າງ ທ່ານ ອຳພອນ ມາລາວົງຜູ້ອຳນວຍການ ບໍລິສັດພອນຈະເລີນກໍ່ສ້າງ ແລະ ຂົນສົ່ງກະສິກຳຄົບວົງຈອນ ຂາອອກ-ຂາເຂົ້າຈຳກັດຜູ້ດຽວ ແລະ ພົຈວ ປະລິນຍາເອກ ວັນເຮືອງ ນັນທະຈັກ ຄະນະພັກກະຊວງ ຫົວໜ້າກົມຄົ້ນຄ້ວາວິທະຍາສາດ ແລະ ປະຫວັດສາດ ກະຊວງ ປກສ ຜູ້ຮັບຜິດຊອບໂຄງການບູລະນະ-ກໍ່ສ້າງອະນຸກຳມະການອະນຸສອນສະຖານຖ້ຳສັນຕິລາດສູນກາງ ໂດຍຊ່ອງໜ້າທ່ານ ພົນຕີ ສົມແກ້ວ ສີລາວົງ ເລຂາທິການສູນກາງພັກ ລັດຖະມົນຕີວ່າການກະຊວງ ປກສ, ລັດຖະມົນຕີຊ່ວຍ ແລະ ພາກສ່ວນກ່ຽວຂ້ອງເຂົ້າເປັນສັກຂີພະຍານ, ພ້ອມນັ້ນ ກົມຄົ້ນຄ້ວາວິທະຍາສາດ ແລະ ປະຫວັດສາດ ກະຊວງ ປກສ ກໍ່ໄດ້ມອບໃຫ້ກອງບັນຊາການ ປກສ ແຂວງຫົວພັນ ເປັນຜູ້ບູລະນະຮັກສາ ແລະ ນຳໃຊ້ຕໍ່ໄປ.

 

 

Off

Comments are closed.