11th Apr2016

ພິທີໂຮມຊຸມນຸມສະເຫຼີມສະຫຼອງ ວັນສ້າງຕັ້ງກຳລັງ ປກສ ຄົບຮອບ 55 ປີ

by somchan

ພິທີໂຮມຊຸມນຸມສະເຫຼີມສະຫຼອງ ວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 55 ປີໃນ (ວັນທີ 5 ເມສາ 1961-ວັນທີ 5 ເມສາ 2016) ໄດ້ຈັດຂຶ້ນວັນທີ 4 ເມສາ 2016 ທີ່ກະຊວງປ້ອງກັນຄວາມສະຫງົບ. ໂດຍການເປັນກຽດເຂົ້າຮ່ວມ ມີທ່ານ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ການນຳພັກ-ລັດ, ຄະນະພັກ-ຄະນະບັນຊາ ກະຊວງ ປກສ ແຂກທັງພາຍໃນ ແລະ ຕ່າງປະເທດ ນາຍ ແລະ ພົນ ຕຳຫຼວດເຂົ້າຮ່ມ.

ພົນຕີ ສົມແກ້ວ ສີລາວົງ ເລຂາທິການສູນກາງພັກ, ລັດຖະມົນຕີກະຊວງປ້ອງກັນຄວາມສະຫງົບໄດ້ກ່າວ ບົດປາໄສໃນພິທີໂຮມຊຸມນຸມ ສະເຫຼີມສະຫຼອງວັນສ້າງຕັ້ງກຳລັງ ປກສ ຄົບຮອບ 55 ປີນີ້ວ່າ: ວັນທີ 5 ເມສາ ເປັນວັນທີ່ມີຄວາມໝາຍ-ຄວາມສຳຄັນປະຫວັດສາດ ທາງການເມືອງຂອງຊາດ, ຂອງພັກ ແລະ ຂອງກຳລັງ ປກສ ປະຊາຊົນ, ກຳລັງປ້ອງກັນຄວາມສະຫງົບ ເປັນກຳລັງທີ່ໄວ້ເນື້ອເຊື້ອໃຈ, ເປັນກຳລັງແກ່ນສານຂອງການປະຕິບັດແນວທາງ ການປ້ອງກັນຊາດ-ປ້ອງກັນຄວາມສະຫງົບທົ່ວປວງສົນຮອບດ້ານຂອງພັກ, ຮັບປະກັນຄວາມໝັ້ນຄົງຂອງຊາດ, ສະກັດກັ້ນຕ້ານທຸກກົນອຸບາຍທຳລາຍມ້າງເພ, ແບ່ງແຍກ, ສ້າງຄວາມປັ່ນປ່ວນກໍ່ຄວາມບໍ່ສະຫງົບ ແລະ ການປະຕິບັດໜ້າທີ່ຮັກສາຄວາມເປັນລະບຽບຮຽບຮ້ອຍຂອງສັງຄົມ, ການປ້ອງກັນຜູ້ນຳພັກ-ລັດ ແຂກພາຍໃນ ແລະ ຕ່າງປະເທດ, ກອງປະຊຸມລະດັບຊາດ ແລະ ສາກົນໃຫ້ມີຄວາມປອດໄພ.

ການກຳເນີດເກີດຂຶ້ນຂອງກຳລັງປ້ອງກັນຄວາມສະຫງົບປະຊາຊົນ ແມ່ນເພື່ອຕອບສະໜອງຄວາມຮຽກຮ້ອງຕ້ອງການຂອງພາລະກິດຕໍ່ສູ້ປົດປ່ອຍຊາດໃນເມືອກ່ອນ ແລະ ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປະຈຸບັນ.

ດ້ວຍຜົນງານຄຸນງາມຄວາມດີອັນໃຫຍ່ຫຼວງນັ້ນ ພັກ-ລັດຖະບານ ແລະ ປະຊາຊົນບັນດາເຜົ່າ ຈຶ່ງໄດ້ຍ້ອງຍໍສັນລະເສີນຢ່າງສົມກຽດ ສົມແລ້ວທີເປັນກຳລັງປ້ອງກັນຄວາມສະຫງົບມາຈາກປະຊາຊົນ ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນບັນດາເຜົ່າ ຍ້ອນແນວນັ້ນ ຜ່ານມາ ກະຊວງ ປກສ ໄດ້ຮັບຫຼຽນຄຳແຫ່ງຊາດລາວ 3 ໜ່ວຍ. ເຊິ່ງເປັນການຍ້ອງຍໍສູງສຸດຂອງຊາດລາວ, ຫຼຽນດາວຄຳແຫ່ງຊາດຫວຽດນາມ 1 ໜ່ວຍ, ເຊິ່ງເປັນຫຼຽນໄຊສູງສຸດຂອງ ສສ ຫວຽດນາມ, ຫຼຽນໄຊປະເພດຕ່າງໆມີ: ຫຼຽນໄຊອິດສະຫຼະຊັ້ນ I, II, III: 9ໜ່ວຍ, ຫຼຽນໄຊແຮງງານຊັ້ນ I, II, III: 5 ໜ່ວຍ ແລະ ພະນັກງານ-ນັກຮົບ ໃນກຳລັງ ປກສ ໄດ້ຮັບນາມມະຍົດ ເປັນວິລະຊົນແຫ່ງຊາດ 5 ສະຫາຍ, ນັກຮົບແຂ່ງຂັນ 12 ສະຫາຍ ແລະ ໄດ້ຮັບຫຼຽນໄຊປະເພດຕ່າງໆເປັນຈຳນວນຫຼວງຫຼາຍ.

ໃນພິທີ ຍັງໄດ້ມອບຫຼຽນໄຊແຮງງານຊັ້ນ I: 1 ກົມກອງ, ຫຼຽນໄຊແຮງງານຊັ້ນ II: 9 ກົມກອງ, ຫຼຽນໄຊແຮງງານຊັ້ນ III: 27ກົມກອງ ທີ່ມີຜົນງານຄຸນງາມຄວາມດີ ໃນການປະຕິບັດໜ້າທີ່ວຽກງານ ປ້ອງກັນຊາດ- ປ້ອງກັນຄວາມສະຫງົບໃນໄລຍະ 5 ປີຜ່ານມາ, ເປັນການປະກອບສ້ວນອັນສຳຄັນ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ແລະ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກຳລັງ ປກສ ຄົບຮອບ 55 ປີ.

Off

Comments are closed.