18th May2016

ເປີດຂະບວນການທົດລອງສະກັດກັ້ນ, ປາບປາມ ແລະ ແກ້ໄຂເປົ້າໝາຍຢາເສບຕິດ

by somchan

ຄະນະກຳມະການກວດກາ ແລະ ຄວບຄຸມຢາເສບຕິດນະຄອນຫຼວງວຽງຈັນ ສົມທົບກັບພະແນກຕຳຫຼວດຕ້ານ ແລະສະກັດກັ້ນຢາເສບຕິດ ປກສ ນະຄອນວຽງຈັນ ເປີດຂະບວນການທົດລອງສະກັດກັ້ນ, ປາບປາມ ແລະ ແກ້ໄຂເປົ້າໝາຍພົວພັນກັບຢາເສບຕິດ ຢູ່ບ້ານຈັນສະຫວ່າງ ເມືອງສີໂຄດຕະບອງ ນະຄອນຫຼວງວຽງຈັນ. ໃນວັນທີ 16 ພຶດສະພາ 2016 ນີ້ ໃຫ້ກຽດເຂົ້າຮ່ວມຂອງທ່ານ ບຸນມີ ໄຊຍະວົງ ຮອງເຈົ້າເມືອງສີໂຄດຕະບອງ ມີອຳນາດການປົກຄອງບ້ານ ພໍ່ແມ່ປະຊາຊົນພາຍໃນບ້ານ ແລະ ແຂກຖືກເຊີນເຂົ້າຮ່ວມ.
ທ່ານຊື່ນຊ່ວງ ດວງຕາວິໄລ ຫົວໜ້າຫ້ອງການຄະນະກຳມະການກວດກາ ແລະ ຄວບຄຸມຢາເສບຕິດ ນະຄອນຫຼວງວຽງຈັນ ໄດ້ຜ່ານຄຳສັ່ງຂອງເຈົ້າຄອງນະຄອນຫຼວງວຽງຈັນ ວ່າດ້ວຍການເພີ່ມທະວີການສະກັດກັ້ນ ແລະ ປາບປາມຢາເສບຕິດລົງສູ່ຮາກຖານບ້ານໃຫ້ທົ່ວເຖິງ. ເຊິ່ງໃນນັ້ນ, ໄດ້ເອົາບ້ານຈັນສະຫວ່າງເປັນບ້ານທຳອິດຂອງເມືອງສີໂຄດຕະບອງ , ການທົດລອງແມ່ນຈະໄດ້ລົງໄປໜ່ວຍ 10 ຫຼັງຄາເຮືອນ, ເພື່ອເກັບກຳເປົ້າໝາຍທີ່ພົວພັນຢາເສບຕິດແລ້ວເຮັດບົດບັນທຶກ ການເຮັດທົດລອງໃນຄັ້ງນີ້ ແມ່ນເພື່ອຮັບປະກັນໃຫ້ນະຄອນຫຼວງວຽງຈັນ ມີຄວາມສະຫງົບທາງດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມ, ປະກອບສ່ວນເຂົ້າໃນການປະຕິບັດນະໂນບາຍຂອງພັກ ແລະ ກົດໝາຍວ່າດ້ວຍຢາເສບຕິດຫຼຸດໜ້ອຍຖອຍລົງ, ການຮັດແຄບ ແລະ ກ້າວໄປເຖິງບ່ອນລົບລ້າງບັນຫາຢາເສບຕິດອອກຈາກຊິວິດ, ສັງຄົມ ໃນພື້ນທີ່ນະຄອນຫຼວງວຽງຈັນ, ຕອບສະໜອງຄວາມຮຽກຮ້ອງຕ້ອງການ ແລະ ຄວາມມຸ້ງຫວັງຂອງປະຊາຊົນທຸກຊັ້ນຄົນ ທີ່ເຫັນນະຄອນຫຼວງວຽງຈັນເປັນເມືອງແຫ່ງຄວາມສະຫງົບ, ດຳລົງຊີວິດຢ່າງມີຄວາມສຸກ, ປອດໄພ ແລະ ອຳນວຍຄວາມສະດວກໃນການເຮັດວຽກງານຕ່າງໆ.

Off

Comments are closed.