19th May2016

ກອງ​ປະຊຸມ​ວ່າ​ດ້ວຍ​ວຽກ​ງານ​ຄຸ້ມ​ຄອງ​ຊາຍ​ແດນ​ ຄັ້ງ​ທີ 13.

by somchan

ກອງ​ປະຊຸມ​ວ່າ​ດ້ວຍ​ວຽກ​ງານ​ຄຸ້ມ​ຄອງ​ຊາຍ​​ແດນ ຄັ້ງ​ທີ 13 ລະຫວ່າງ​ແຂວງ​ອຸດົມ​ໄຊ, ບໍ່​ແກ້ວ, ຫຼວງ​ນ້ຳ​ທາ, ຜົ້ງ​ສາລີ ສປປ ລາວ ​ແລະ ​ແຂວງ​ຢຸນນານ ສປຈີນ ​ໄດ້​ຈັດ​ຂຶ້ນ​ໃນວັນ​ທີ 14 ພຶດສະພາ 2016ນີ້ ຢູ່ທີ່​ໂຮງ​ແຮມ​ມິດ​ຕະພາບ ​ແຂວງ​ອຸດົມ​ໄຊ ​ໂດຍ​ການ​ເປັນ​ປະທານ​ຮ່ວມ​ຂອງ ພັນ​ເອກ ນິລະ​ວົງ ​ເຈືອງ​ຕະວະ​ລາດ ຫົວໜ້າ​ກອງ​ບັນຊາ​ການ ປກສ ​ແຂວງ ອຸດົມ​ໄຊ ​ແລະ ພັນ​ເອກ ວູຢຽນ ຫົວໜ້າ​ການ​ເມືອງ ກອງ​ບັນຊາ​ການ​ໃຫຍ່​ຕຳຫຼວດ​ປ້ອງ​ກັນຊາ​ຍ​ແດນ ​ແຂວງ​ຢຸນນານ ພ້ອມ​ດ້ວຍ​ຄະນະ​ຜູ້​ແທນ​ທັງ​ສອງ​ຝ່າຍ​ເຂົ້າ​ຮ່ວມ.

ກອງ​ປະຊຸມ​ຄັ້ງ​ນີ້​ ໄດ້​ສັງ​ເກດ​ຕີ​ລາຄາ, ທົບ​ທວນຄືນ ​ຜົນ​ການ​ພົວພັນ​ຮ່ວມ​ມືຈັດ​ຕັ້ງ​ປະຕິບັດ​ເນື້ອ​ໃນ​ກອງ​ປະຊຸ​ມວ່າ​ດ້ວຍ​ວຽກ​ງານ​ຄຸ້ມ​ຄອງ​ຊາຍ​ແດນ​ຄັ້ງ​ທີ 12 ​ໃນ​ປີຜ່ານມາ​ເຊັ່ນ: ການ​ກວດກາ​ການ​ເຂົ້າ-ອອກ​ເມືອງ, ສະກັດ​ກັ້ນ​ການ​ລັກລອບ​ເຂົ້າ-ອອກ​ເມືອງ, ການ​ສະກັດ​ກັ້ນ​ບັນ​ຫາ​ອາ​ຊະ​ຍາ​ກຳ ຫຼື ປະກົດ​ການ​ຫຍໍ້​ທໍ້​ຕ່າງໆຕາມ​ຊາຍ​​ແດນ​ລະຫວ່າງ ​ແຂວງ​ອຸດົມ​ໄຊ, ບໍ່​ແກ້ວ, ຫຼວງ​ນ້ຳ​ທາ, ຜົ້ງ​ສາລີ ສປປລາວ ​ແລະ ​ແຂວງ​ຢຸນນານ​ຂອງຈີນ.

ກອງ​ປະຊຸມ​ຍັງ​ໄດ້​ປຶກສາ​ຫາລື, ຄົ້ນ​ຄ້ວາ ​ແລະ ​ເປັນ​ເອກະ​ພາບ​ຕໍ່​ກັບ​ທິດ​ທາງ​ແຜນການ​ຮ່ວມ​ມື​ໃນ​ຕໍ່ໜ້າ​ເຊັ່ນ: ການ​ເພີ່ມ​ທະວີ​ຮ່ວມ​ມື​ແລກ​ປ່ຽນ​ບົດຮຽນ​, ການ​ປະຕິບັດ​ກົດໝາຍ, ການ​ປ້ອງ​ກັນສະກັດ​ກັ້ນ​ບັນ​ຫາ​ອາ​ຊະ​ຍາ​ກຳ​ຕາມ​ຊາຍ​ແດນ ​ເປັນ​ຕົ້ນ​ແມ່ນ​ການ​ຄ້າຂາຍ​ເຖືອນ, ຄ້າ​ມະນຸດ, ຢາ​ເສບ​ຕິດ, ການລະ​ເມີດ​ຊາຍ​ແດນ ​ແລະ​ອື່ນໆ ​ແນ​ໃສ່​ຮັບປະກັນ​ເຮັດ​ໃຫ້​ຊາຍ​ແດນ​ທັງ​ສອງ​ປະ​ເທດ ກໍ່​ຄື​ລະຫວ່າງ​ແຂວງ​ກັບ​ແຂວງ ມີ​ຄວາມ​ສະຫງົບ ​ແລະ ​ເປັນ​ລະບຽບ​ຮຽບຮ້ອຍ​ດີ.

 

Off

Comments are closed.