06th Sep2016

ກອງປະຊຸມພົບປະລະຫວ່າງ ຜູ້ນຳລັດຖະສະພາສະມາຊິກໄອປາ ແລະ ຜູ້ນຳອາຊຽນພິຈາລະນາບັນຫາຕ່າງໆ ຂອງອາຊຽນ

by somchan

ກອງປະຊຸມພົບປະລະຫວ່າງ ຜູ້ນຳລັດຖະສະພາສະມາຊິກໄອປາ ແລະ ຜູ້ນຳອາຊຽນ ພິຈາລະນາບັນຫາຕ່າງໆຂອງອາຊຽນ ໄດ້ຈັດຂຶ້ນຢ່າງເປັນທາງການ ໃນວັນທີ 5 ກັນຍານີ້ ຢູ່ນະຄອນຫຼວງວຽງຈັນ ໂດຍມີທ່ານ ນາງ ປານີ ທໍ່ຕູ້ ປະທານສະພາແຫ່ງຊາດ, ທ່ານ ສາ ວິເຍສວາຣັນ ປະທານໄອປາ ປະທານສະພາສູງ ແຫ່ງມາເລເຊຍ, ມີບັນດາທ່ານລັດຖະສະພາ, ຮອງປະທານລັດຖະສະພາ, ຫົວໜ້າຜູ້ແທນສະມາຊິກໄອປາເຂົ້າຮ່ວມ. ກອງປະຊຸມນີ້ ຖືເປັນກົນໄກໜຶ່ງ ທີ່ມີຄວາມສຳຄັນຍິ່ງ ເຊິ່ງເປັນການປຶກສາຫາລືຫຼາຍບັນຫາສຳຄັນ ທີ່ພົວພັນເຖິງພາລະບົດບາດ, ເຈົ້າໜ້າທີ່ຂອງໄອປາ, ທັງເປັນການສົ່ງເສີມຄວາມຢູ່ດີກິນດີ ແລະ ການດຳລົງຊີວິດທີ່ດີ ຂອງປະຊາຊົນພາຍໃນອາຊຽນ ປະກອບສ່ວນເຮັດໃຫ້ບັນດາແຜນງານສ້າງປະຊາຊົນອາຊຽນ ໃຫ້ມີຄວາມເຂັ້ມແຂງ ຈະເລີນກ້າວໜ້າ.

ທ່ານ ນາງ ປານີ ທໍ່ຕູ້ ກ່າວວ່າ: ກອງປະຊຸມພົບປະລະຫວ່າງ ຜູ້ນຳລັດຖະສະພາສະມາຊິກໄອປາ ແລະ ຜູ້ນຳອາຊຽນ ແມ່ນມີຂຶ້ນໃນໂອກາດກອງປະຊຸມສຸດຍອດອາຊຽນ ຄັ້ງທີ 28-29 ທີ່ ສປປ ລາວ ໄດ້ຮັບກຽດເປັນເຈົ້າພາບ ເຊິ່ງຖືວ່າເປັນການສະໜັບສະໜູນ ແລະ ການໃຫ້ກຳລັງໃຈອັນລ້ຳຄ່າ ໃຫ້ແກ່ສະພາແຫ່ງຊາດ, ລັດຖະບານກໍ່ຄື ປະຊາຊົນລາວບັນດາເຜົ່າ ໃນການຈັດກອງປະຊຸມສຸດຍອດອາຊຽນ ແລະ ກອງປະຊຸມກ່ຽວຂ້ອງອື່ນໆ ໃຫ້ປະສົບຜົນສຳເລັດຕາມຈຸດປະສົງ.

ທ່ານ ນາງ ປານີ ທໍ່ຕູ້ ກ່າວຕື່ມວ່າ: ໄອປາໃນນາມເປັນກົນໄກແຫ່າງການຮ່ວມມືລັດຖະສະພາຂອງບັນດາປະເທດສະມາຊິກອາຊຽນ, ໃນຖານະທີ່ເປັນຕົວແທນຂອງປະຊາຊົນ, ມີໜ້າທີ່ໃຫ້ການສະໜັບສະໜູນ ຊຸກຍູ້ການຈັດຕັ້ງປະຕິບັດຂໍ້ລິເລີ່ມຕ່າງໆຂອງອາຊຽນ ເພື່ອໃຫ້ບັນລຸໄດ້ຜົນສຳເລັດ ໃນການສ້າງຄວາມເປັນເອກກະພາບອັນໜຶ່ງດຽວຂອງຜູ້ນຳໄອປາ ເພື່ອນຳໄປສະເໜີຜູ້ນຳອາຊຽນ ພິຈາລະນາຕາມຈິດໃຈຄຳຂວັນທີ່ວ່າ: ຫັນວິໄສທັດໃຫ້ເປັນຮູບປະທຳ ເພື່ອເຂັ້ມແຂງຂອງປະຊາຄົມອາຊຽນ.

 

Off

Comments are closed.