06th Sep2016

ຈັດວາງກຳລັງ ປກສ ໃນໄລຍະກອງປະຊຸມສຸດຍອດອາຊຽນ ໃຫ້ຮັບປະກັນ 100%

by somchan

ກຳລັງປ້ອງກັນຄວາມສະຫງົບໄດ້ຈັດວາງກຳລັງ ເພື່ອປ້ອງກັນກອງປະຊຸມສຸດຍອດອາຊຽນ ຄັ້ງທີ 28 ແລະ 29 ທີ່ໄຂຂຶ້ນໃນວັນທີ 6-8 ກັນຍາ 2016 ນີ້ ຢູ່ຫໍປະຊຸມແຫ່ງຊາດ ທີ່ເປັນສະຖານທີ່ປະຊຸມ ເພື່ອປະກັນຄວາມປອດໄພ ໃຫ້ຜູ້ນຳພັກ-ລັດ, ຄະນະຜູ້ແທນທີ່ເຂົ້າຮ່ວມກອງປະຊຸມ ມີຄວາມສະຫງົບປອດໄພ 100%. .

ພົຈວ ປອ ທອງສະຫວັນ ວົງສະຫວັດ ຮອງຫົວໜ້າກົມໃຫ້ຕຳຫຼວດ ໄດ້ໃຫ້ສຳພາດໃນວັນທີ 5 ກັນຍານີ້ວ່າ: ໂດຍປະຕິບັດຕາມມະຕິຕົກລົງຄະນະຮັບຜິດຊອບລວມ ການຮັກສາຄວາມສະຫງົບກອງປະຊຸມສຸດຍອດອາຊຽນ ຄັ້ງທີ 28 ແລະ 29 ໃຫ້ຮັບປະກັນຄວາມສະຫງົບປອດໄພ, ຄະນະຮັບຜິດຊອບຢູ່ຈຸດຫໍປະຊຸມແຫ່ງຊາດ ໄດ້ສ້າງແຜນສະເພາະໃນການປ້ອງກັນຈຸດດັ່ງກ່າວ, ເຊິ່ງປະກອບມີກຳລັງກົມໃຫຍ່ຕຳຫຼວດ, ກຳລັງປ້ອງກັນສູນກາງ, ກຳລັງປ້ອງກັນທີ່ຕັ້ງ, ກຳລັງປ້ອງກັນເຄື່ອນທີ່, ກລັງປ້ອງກັນສື່ສານ, ກລັງ ປກສ ເມືອງໄຊທານີ, ໂດຍສົມທົບກັນກຳລັງປ້ອງກັນປະເທດ ແລະໄດ້ເຂົ້າປະຈຳການແຕ່ວັນທີ 1 ກັນຍາ 2016, ແບ່ງກຳລັງອອກເປັນ 4 ຊັ້ນປ້ອງກັນ ໂດຍບັນຈຸກຳລັງເຂົ້າແຕ່ລະຊັ້ນຢ່າງເໝາະສົມ ເພື່ອກວດກາຄວາມປອດໄພການເຂົ້າ-ອອກພາຍໃນ-ພາຍນອກສະຖານທີ່ຈັດກອງປະຊຸມໃຫ້ຮັບປະກັນຄວາມສະຫງົບ-ປອດໄພຮອບດ້ານ; ກອງຫອນບ້ານໃກ້ຄຽງກັບຫໍປະຊຸມເຮັດວຽກງານປ້ອງກັນຄວາມສະຫງົບ. ຜ່ານການຈັດຕັ້ງປະຕິບັດວຽກງານຕະຫລອດ 24 ຊົ່ວໂມງ ໃນໄລຍະ 5 ວັນມານີ້ ເຫັນວ່າສະພາບການຕ່າງໆພາຍໃນຫໍປະຊຸມແຫ່ງຊາດມີຄວາມສະຫງົບປອດໄພດີ.

ພັທ ໄກສອນ ແກ້ວມະນີ ຮອງຫົວໜ້າກອງບັນຊາການປ້ອງກັນເຄື່ອນທີ່ລົງປ້ອງກັນຫໍປະຊຸມແຫ່ງຊາດແຕ່ວັນທີ 1ກັນຍາ 2016 ໄດ້ກ່າວວ່າ: ກຳລັງປ້ອງກັນເຄື່ອນທີ່ ໄດ້ແບ່ງຄວາມຮັບຜິດຊອບ ແລະ ຈັດວາງກຳລັງອອກເປັນ 5 ພາກສ່ວນຄື: ພາກສ່ວນເຮັດໜ້າທີ່ເອັກສະເລພືນລົດທີ່ເຂົ້າ-ອອກຫໍປະຊຸມແຫ່ງຊາດ, ພາກສ່ວນກຳລັງພ້ອມສູ້ຮົບດ້ວຍລົດອາແອັມ, ພາກສ່ວນສາຍກວດດ້ວຍລົດສະເກມ, ພາກສ່ວນແກ້ໄຂສະພາບການສຸກເສີນ ແລະ ພາກສ່ວນກຳລັງປ້ອງກັນວົງນອກອ້ອມຂ້າງຫໍປະຊຸມ. ຜ່ານການຈັດຕັ້ງປະຕິບັດນັບແຕ່ມື້ທີ່ນຳກຳລັງເຂົ້າປະຈຳການຈົນຮອດປະຈຸບັນນີ້ ເຫັນວ່າ: ສະພາບມີຄວາມສະຫົງບຮຽບຮ້ອຍດີ ມີຄວາມພ້ອມ 100% ໃນການຮັບໃຊ້ກອງປະຊຸມດັ່ງກ່າວໃຫ້ມີຄວາມເປັນລະບຽບຮຽບຮ້ອຍ ແລະ ມີຜົນສຳເລັດ.

 

Off

Comments are closed.