06th Sep2016

ກອງປະຊຸມສຸດຍອດພາກທຸລະກິດ ແລະ ການລົງທຶນອາຊຽນຄັ້ງທີ 13

by somchan

ໃນວັນທີ 5 ກັນຍາ 2016ນີ້ ສປປ ລາວ ໄດ້ເປັນເຈົ້າພາບ ຈັດກອງປະຊຸມສຸດຍອດພາກທຸລະກິດ ແລະ ການລົງທຶນອາຊຽນ ໂດຍການເຂົ້າຮ່ວມຂອງ ພະນະທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ມີບັນດານັກທຸລະກິດອາຊຽນ, ສະພາທີ່ປຶກສາທຸລະກິດອາຊຽນ ແລະ ຜູ້ປະກອບການນັກທຸລະກິດໜຸ່ມອາຊຽນເຂົ້າຮ່ວມ.

ໃນໂອກາດນີ້ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ກ່າວວ່າ: ກອງປະຊຸມສຸດຍອດພາກທຸລະກິດ ແລະ ການລົງທຶນອາຊຽນ ຄັ້ງທີ 13 ນີ້ ແມ່ນກອງປະຊຸມທີ່ສຳຄັນທີ່ສຸດຂອງພາກທຸລະກິດເນື່ອງຈາກວ່າ ເປັນການເຕົ້າໂຮມເອົາບັນດານັກທຸລະກິດອາຊຽນ ກໍຄື ສະພາທີ່ປຶກສາທຸລະກິດອາຊຽນ ແລະ ສະພາຜູ້ປະກອບການນັກທຸລະກິດໜຸ່ມອາຊຽນ ເພື່ອປຶກສາຫາລື ແລະ ແລກປ່ຽນຄວາມຄິດຄວາມເຫັນເຊິ່ງກັນ ແລະ ກັນ ໃນບັນດາຫົວຂໍ້ບູລິມະສິດ ເຊິ່ງໃນປີນີ້ທີຫົວຂໍ້ສຳຄັນເຊັ່ນ: ເຂດການຄ້າເສລີ, ພະລັງງານ, ພື້ນຖານໂຄງລ່າງ, ການພັດທະນາແບບຍືນຍົງ ແລະ ບັນຫາສຳຄັນຂອງແຜນງານປະຊາຄົມເສດຖະກິດອາຊຽນ 2025, ເພື່ອສາມາດບັນລຸ 5 ເປົ້າໝາຍ ທີ່ຜູ້ນຳອາຊຽນໄດ້ກຳນົດໄວ້.

ເນື່ອງຈາກປີນີ້ເປັນປີໄຂສັງກາດໃຫມ່ຂອງປະຊາຄົມເສດຖະກິດອາຊຽນ ແລະ ທັງເປັນປີທຳອິດຂອງການຈັດຕັ້ງປະຕິບັດ ວິໄສທັດປະຊາຄົມອາຊຽນ 2025 , ສປປ ລາວ ໄດ້ວາງຄຳຂວັນສຳຄັນການເປັນປະທານອາຊຽນໃນປີນີ້ວ່າ: “ຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ” ແລະກຳນົດເອົາ 8 ຂົງເຂດບູລິມະສິດ ເພື່ອເປັນເຄື່ອງມືໃນການຜັນຂະຫຍາຍ ວິໄສທັດ 2025 ຂອງອາຊຽນໃຫ້ປະກົດຜົນເປັນຈິງເທືອລະກ້າວ.

ທ່ານ ນາຍົກ ທອງລຸນ ສີສຸລິດ ກ່າວຕື່ມອີກວ່າ: ເພື່ອແນໃສ່ຈັດຕັ້ງປະຕິບັດແຜນງານປະຊາຄົມເສດຖະກິດອາຊຽນ 2025 ໃຫ້ໄດ້ຮັບໝາກຜົນ ແລະ ບັນລຸເປົ້າໝາຍຕາມທີ່ໄດ້ກຳນົດໄວ້ ແມ່ນຈະຕ້ອງໄດ້ມີການຮ່ວມມືກັນຢ່າງກົມກຽວ ແລະ ຮອບດ້ານ ລະຫວ່າງພາກລັດ ແລະ ພາກເອກກະຊົນ ເພື່ອສູ້ຕໍ່ສ້າງສິ່ງອຳນວຍຄວາມສະດວກ ໃນການເຄື່ອນຍ້າຍສິນຄ້າ, ການບໍລິການ, ການເຄື່ອນຍ້າຍທຶນ ແລະ ແຮງງານທີ່ມີສີມືພາຍໃນອາຊຽນ ເພື່ອສົ່ງເສີມຕາໜ່າງການຄ້າ ແລະ ການຜະລິດຂອງຊຽນ ກ້າວໄປເຖິງການສ້າງເປັນຕະຫຼາດ ແລະ ຖານການຜະລິດດຽວ ໃຫ້ສົມບູນຂຶ້ນກວ່າເກົ່າສຳລັບບັນດາບໍລິສັດ ແລະ ຜູ້ຊົມໃຊ້ອາຊຽນ, ດ້ວຍເຫດນັ້ນ, ການຈັດກອງປະຊຸມສຸດຍອດພາກທຸລະກິດອາຊຽນ ແລະ ການລົງທຶນ ອາຊຽນຄັ້ງນີ້ ຈະກາຍເປັນຂີດໝາຍທີ່ສຳຄັນ ໃນການສ້າງຄວາມເຂັ້ມແຂງດ້ານການຮ່ວມມື ລະຫວ່າງພາກລັດ ແລະ ພາກທຸລະກິດ ການປະສານງານ ແລະ ການເປັນຄູ່ຮ່ວມທີ່ດີ ໃນການປັບປຸງຂັ້ນຕອນຕ່າງໆ ເພື່ອເຮັດໃຫ້ກະທັດຮັດຂຶ້ນໄປເລື່ອຍໆ, ພ້ອມນັ້ນ ຍັງເຮັດໃຫ້ສັງຄົມທົ່ວພາກພື້ນອາຊຽນ ເຫັນໄດ້ເຖິງຄວາມເອົາໃຈໃສ່ ແລະ ການຮ່ວມມືທີ່ດີ ລະຫວ່າງພາກລັດ ແລະ ພາກທຸລະກິດອີກດ້ວຍ.

ນອກນີ້ ຍັງມີກອງປະຊຸມພົບປະ ລະຫວ່າງຜູ້ນຳອາຊຽນ ແລະ ບັນດາຜູ້ຕາງໜ້າຈາກສະມັດຊາລັດຖະສະພາສະມາຊິກອາຊຽນ ແລະ ກອງປະຊຸມເຈົ້າໜ້າທີ່ອາວຸໂສອາຊຽນ.

ສຳລັບຕອນເຊົ້າຂອງວັນທີ 6 ກັນຍາ ໄດ້ມີພິທີ ລົງນາມເຂົ້າເປັນພາຄີຂອງສົນທິສັນຍາໄມຕີຈິດ ແລະການຮ່ວມມືໃນອາຊີຕາເວັນອອກສ່ຽງໃຕ້ ຂອງປະເທດຊີເລ, ເອຍິບ, ອີຮານ ແລະມາຣົກ ພ້ອມດ້ວຍກອງປະຊຸມອື່ນໆ.

ສ່ວນໃນຕອນບ່າຍແມ່ນໄດ້ມີພິທີໄຂ ກອງປະຊຸມສຸດຍອດອາຊຽນຄັ້ງທີ 28, ຄັ້ງທີ 29 ທີ່ ສປປ ລາວ ເປັນເຈົ້າພາບ ຢ່າງເປັນທາງການ.

Off

Comments are closed.