09th Sep2016

ນາຍົກລັດຖະມົນຕີ ເປັນປະທານກອງປະຊຸມສຸດຍອດອາຊຽນ ຄັ້ງທີ 28

by somchan

ຕອນບ່າຍຂອງວັນທີ 6 ກັນຍາ 2016 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ເປັນປະທານກອງປະຊຸມສຸຍອດອາຊຽນ ຄັ້ງທີ 28 ໂດຍມີບັນດາປະມຸກລັດ, ຫົວໜ້າລັດຖະບານບັນດາປະເທດສະມາຊິກອາຊຽນ, ເລຂາທິການໃຫຍ່ອາຊຽນ ເຂົ້າຮ່ວມ

ກອງປະຊຸມສຸດຍອດອາຊຽນ ຄັ້ງທີ 28 ເປັນກອງປະຊຸມສຸດຍອດຄັ້ງທຳອິດ ພາຍຫຼັງປະກາດສ້າງຕັ້ງປະຊາຄົມອາຊຽນ ໃນທ້າຍປີ 2015 ແລະ ເປັນກອງປະຊຸມສຳລັບບັນດາຜູ້ນຳອາຊຽນ ໄດ້ປຶກສາຫາລື ແລະ ກຳນົດທິດທາງສຳລັບການຮ່ວມມືອາຊຽນໃນຕໍ່ໜ້າ ໂດຍສະເພາະການຈັດຕັ້ງປະຕິບັດ ວິໄສທັດປະຊາຄົມອາຊຽນ 2025 ແລະ ບັນດາແຜນແມ່ບົດ ສຳລັບ 3 ເສົາຄ້ຳປະຊາຄົມອາຊຽນ ແນ່ໃສ່ຮັດແໜ້ນປະຊາຄົມອາຊຽນໃຫ້ເຂັ້ມແຂງໃນຊຸມປີຕໍ່ໜ້າ.

ໃນໂອກາດນີ້, ຜູ້ນຳອາຊຽນໄດ້ຮັບຮອງເອົາຫຼາຍເອກະສານສຳຄັນ ແນໃສ່ຜັນຂະຫຍາຍບັນດາບູລິມະສິດສຳລັບການເປັນປະທານອາຊຽນ ຂອງ ສປປ ລາວ ໃນປີ 2016 ພາຍໃຕ້ຄຳຂວັນ “ຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ” ຊຶ່ງລວມມີຖະແຫຼ່ງການວຽງຈັນ ວ່າດ້ວຍການຮັບຮອງເອົາແຜນງານສຳລັບຂໍ້ລິເລີ່ມເພື່ອການເຊື່ອມໂຍງ ອາຊຽນ ສະບັບທີ 3; ຖະແຫຼ່ງການວຽງຈັນ ວ່າດ້ວຍການຮັບຮອງເອົາແຜນແມ່ບົດ ສຳລັບການເຊື່ອມຈອດອາຊຽນ 2025 ແລະ ຖະແຫຼ່ງການວຽງຈັນ ວ່າດ້ວຍການຫັນປ່ຽນຈາກລະບົບຈ້າງງານນອກລະບົບ ໄປສູ່ການຈ້າງງານໃນລະບົບ ເພື່ອກ້າວໄປສູ່ການສົ່ງເສີມວຽກທີ່ຖືກຕ້ອງ ແລະ ເປັນທຳໃນອາຊຽນ; ຖະແຫຼ່ງການວຽງຈັນ ວ່າດ້ວຍການຊຸກຍູ້ສົ່ງເສີມ ການຮ່ວມມືດ້ານມໍລະດົກ ວັດທະນາທຳໃນອາຊຽນ; ການອຳນວຍຄວາມສະດວກທາງດ້ານການຄ້າອາຊຽນ, ການເຂົ້າເຖິງແຫຼ່ງທຶນຂອງທຸລະກິດຈຸລະພາກ, ຂະໜາດນ້ອຍ ແລະ ຂະໜາດກາງ ອາຊຽນ ແລະ ເອກະສານອື່ນໆ.

ໃນໂອກາດນີ້, ຜູ້ນຳອາຊຽນໄດ້ລົງນາມ ໃນຖະແຫຼ່ງການອາຊຽນ ວ່າດ້ວຍອາຊຽນເປັນໜຶ່ງດຽວໃນການຕອບໂຕ້ໄພພິບັດ, ອາຊຽນເປັນໜຶ່ງດຽວໃນການຕອບໂຕ້ໄພພິບັດໃນພາກພື້ນ ແລະ ນອກພາກພື້ນ.

 

Off

Comments are closed.