09th Sep2016

ການນຳອາຊຽນພົບປະຫາລື ຊາວໜຸ່ມອາຊຽນ

by somchan

ການພົບປະລະຫວ່າງຜູ້ນຳອາຊຽນ ກັບບັນດາຜູ້ຕາງໜ້າຊາວໜຸ່ມອາຊຽນ 2016 ໄດ້ຈັດຂຶ້ນໃນຕອນບ່າຍຂອງວັນທີ 6 ກັນຍາ 2016 ທີ່ຫໍປະຊຸມແຫ່ງຊາດ ໂດຍການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງສປປ ລາວ ແລະ ປະທານອາຊຽນ 2016 ກອງປະຊຸມພົບປະຄັ້ງນີ້ ແມ່ນໜຶ່ງໃນບັນດາກິດຈະກຳ ທີ່ຕິດພັນກັບກອງປະຊຸມສຸດຍອດອາຊຽນໃນແຕ່ລະປີ ໂດຍມີຫົວໜ້າປະມຸກລັດ ຫົວໜ້າລັດຖະບານຂອງປະເທດສະມາຊິກອາຊຽນ ເລຂາທິການໃຫຍ່ອາຊຽນ ແລະ ຜູ້ຕາງໜ້າຊາວໜຸ່ມອາຊຽນ ປະເທດລະ 2 ທ່ານ ເຂົ້າຮ່ວມ.

ຈຸດປະສົງຂອງກອງປະຊຸມພົບປະໃນຄັ້ງນີ້ແມ່ນ ເພື່ອແລກປ່ຽນຄວາມຄິດເຫັນ ແລະ ສະເໜີທິດຊີ້ນຳ ແລະ ການສະໜັບສະໜູນຈາກຜູ້ນຳອາຊຽນ ແນໃສ່ຮັບປະກັນການມີສ່ວນຮ່ວມ ຢ່າງມີປະສິດທິພາບ ແລະ ເສີມຂະຫຍາຍບົດບາດຂອງຊາວໜຸ່ມອາຊຽນໃນການປະກອບສ່ວນເຂົ້າໃນການຈັດຕັ້ງປະຕິບັດ ວິໄສທັດປະຊາຄົມອາຊຽນ 2025 ລວມທັງການສ້າງປະຊາຄົມອາຊຽນ ຕາມເປົ້າໝາຍທີ່ວ່າງໄວ້.

ຕາງໜ້າຈາກຊາວໜຸ່ມ ສປປ ລາວ ໃນນາມປະທານອາຊຽນ 2016, ໂດຍຮ່ວມກັບບັນດາເພື່ອນຊາວໜຸ່ມອາຊຽນ, ໄດ້ສະເໜີບົດກ່າວຂອງຊາວໜຸ່ມອາຊຽນຕໍ່ບັນດາຜູ້ນຳອາຊຽນ. ສຳລັບຄຳຂວັນຂອງຊາວໜຸ່ມອາຊຽນໃນປີນີ້ແມ່ນ “ກ້າວໄປພ້ອມກັນສູ່ວິໄສທັດປະຊາຄົມອາຊຽນ 2025: ບົດບາດຂອງຊາວໜຸ່ມອາຊຽນ ໃນການປະກອບສ່ວນ ເພື່ອສົ່ງເສີມການຮ່ວມມືທາງດ້ານມໍລະດົກວັດທະນະທຳ”.

ໃນໄລຍະກອງປະຊຸມ, ບັນດາຜູ້ນຳອາ9ຍນ ເຫັນໄດ້ບົດບາດສຳຄັນ ແລະ ການປະກອບສ່ວນຢ່າງຫ້າວຫັນຂອງຊາວໜຸ່ມອາຊຽນ, ລວມທັງ ການຈັດຕັ້ງປະຕິບັດເພື່ອກ້າວໄປສູ່ການສ້າງປະຊາຄົມອາຊຽນ ຕະຫຼອດໄລະຜ່ານມາ ແລະ ໄດ້ຊຸກຍູ້ໃຫ້ຊາວໜຸ່ມອາຊຽນ ສືບຕໍ່ເສີມຂະຫຍາຍການຮ່ວມມືໃນດ້ານຕ່າງໆ ຢ່າງສ້າງສັນ ແລະ ມີຄວາມຮັບຜິດຊອບສູງ ໃນການພັດທະນາເສດຖະກິດ-ສັງຄົມ ແລະ ວຽກງານປົກປັກຮັກສາ, ອະນຸລັກ ແລະ ສົ່ງເສີມມໍລະດົກທາງດ້ານວັດທະນະທຳ, ເຊິ່ງແມ່ນ 1 ໃນ 8 ບູລິມະສິດທີ່ສະເໜີໂດຍ ສປປ ລາວ ໃນຖານະປະທານອາຊຽນ 2016, ແນໃສ່ເພື່ອຈັດຕັ້ງປະຕິບັດແຜນຍຸດທະສາດອາຊຽນ ດ້ານວັນທະນະທຳ ແລະ ສິລະປະ 2016-2025 ແລະ ບັນດາເອກະສານກ່ຽວພັນກັບວຽກງານຊາວໜຸ່ມ ທີ່ໄດ້ຮັບຮອງເອົາໂດຍຜູ້ນຳອາຊຽນ ໃຫ້ໄດ້ຮັບໝາກຜົນ.

 

Off

Comments are closed.