09th Sep2016

ກອງປະຊຸມສຸດຍອດອາຊຽນ ຄັ້ງທີ 29

by somchan

ໃນວັນທີ 7 ກັນຍາ 2016 ຢູ່ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ສປປ ລາວ ໃນນານປະທານອາຊຽນປີ 2016 ໄດ້ເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 29 ແລະ ບັນດາກອງປະຊຸມສຸດຍອດທີ່ກ່ຽວຂ້ອງເຊັ່ນ: ກອງປະຊຸມສຸດຍອດອາຊຽນ-ຈີນ ຄັ້ງທີ 19, ອາຊຽນ-ຍີ່ປຸ່ນ ຄັ້ງທີ 19, ອາຊຽນ-ສ ເກົາຫຼີ ຄັ້ງທີ 18 ແລະ ອາຊຽນບວກສາມ ຄັ້ງທີ 19, ອາຊຽນ-ອົດສະຕາລີ ຄັ້ງທີ 2, ອາຊຽນ-ສະຫະປະຊາຊາດ ຄັ້ງທີ 8, ໂດຍການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ.

ໃນນີ້, ກອງປະຊຸມສຸດຍອດອາຊຽນ ຄັ້ງທີ 29 ບັນດາຜູ້ນຳອາຊຽນ ໄດ້ຕີລາຄາຄືນ ການຮ່ວມມື ລະຫວ່າງ ອາຊຽນ ກັບຄູ່ເຈລະຈາ ແລະ ຄູ່ເຈລະຈາພາຍນອກ ພ້ອມທັງວາງທິດທາງການຮ່ວມມືໃນອະນາຄົດ ໂດຍເນັ້ນຄວາມສຳຄັນໃນການຮັກສາຄວາມເປັນແກ່ນກາງຂອງອາຊຽນ ໂດຍຜ່ານບັນດາກົນໄກທີ່ອາຊຽນເປັນຜູ້ລິເລີ່ມ. ນອກນີ້, ຍັງໄດ້ແລກປ່ຽນຄຳຄິດເຫັນຢ່າງກົງໄປກົງມາ ແລະ ສ້າງສັນ ກ່ຽວກັບພາກພື້ນ ແລະ ສາກົນເຊັ່ນ: ການກໍ່ການຮ້າຍ, ໄພພິບັດທຳມະຊາດ, ການປ່ຽນແປງດິນຟ້າອາກາດ, ບັນຫາຊາວອົບພະຍົບ, ການຄ້າມະນຸດ ແລະ ອາຊະຍາກຳຂ້າມຊາດອື່ນໆ.

ສ່ວນບັນດາກອງປະຊຸມສຸດຍອດຕ່າງໆ ຜູ້ນຳອາຊຽນກັບປະເທດຄູ່ຮ່ວມເຈລະຈາ ແລະ ຄູ່ເຈລະຈາພາຍນອກ ໃນແຕ່ລະກອງປະຊຸມ ໄດ້ຕີລາຄາຄືນການຮ່ວມມືໃນໄລຍະຜ່ານມາ; ພ້ອມທັງໄດ້ພິຈາລະນາ ເຫັນດີຮັບຮອງເອົາແຜນງານ ຫຼື ເອກະສານສຳຄັນທີ່ເປັນທິດທາງຮ່ວມມືໃນອະນາຄົດ ທັງນີ້, ເພື່ອເປັນການປະກອບສ່ວນໃນການສ້າງປະຊາຄົມອາຊຽນ ໃຫ້ເປັນປະຊາຄົມທີ່ເຂັ້ມແຂງ ກໍຄືປະກອບສ່ວນຈັດຕັ້ງປະຕິບັດ ວິໄສທັດອາຊຽນ 2025 ໃຫ້ໄດ້ຮັບໝາກຜົນຕາມເປົ້າໝາຍທີ່ວາງໄວ້.

Off

Comments are closed.