09th Sep2016

ປະທານປະເທດຕ້ອນຮັບ ເລຂາທິການໃຫຍ່ອົງການສະຫະປະຊາຊາດ

by somchan

ວັນທີ 7 ກັນຍາ 2016 ທ່ານບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ບັນກີມູນ ເລຂາທິການໃຫຍ່ສະຫະປະຊາຊາດ (ສປຊ) ທີ່ເດີນທາງມາເຂົ້າຮ່ວມກອງປະຊຸມສຸດຍອດອາຊຽນ ສປຊ ຄັ້ງທີ 8 ແລະ ກອງປະຊຸມສຸດຍອດ EAS ທີ່ລາວເປັນເຈົ້າພາບ.

ໃນໂອກາດນີ້ ທ່ານປະທານປະເທດໄດ້ສະແດງຄວາມຍ້ອງຍໍຊົມເຊີຍ ຕໍ່ທ່ານ ບັນກິມູນ ທີ່ໄດ້ປະຕິບັດພາລະບົດບາດໜ້າທີ່ເປັນເລຂາທິການໃຫຍ່ອົງການສະຫະປະຊາຊາດ ຢ່າງມີຜົນສຳເລັດ ຕະຫຼອດໄລຍະທົດສະວັດຜ່ານມາ ໂດຍສະເພາະການສົ່ງເສີມສັນຕິພາບ ແລະ ການຮ່ວມມສາກົນ ເພື່ອການພັດທະນາ ເຖິງແມ່ນວ່າຈະມີສິ່ງທ້າທ້າຍຫຼາຍປານໃດກໍຕາມ ພ້ອມກັນນີ້, ຍັງໄດ້ຊົມເຊີຍຕໍ່ຜົນສຳເລັດ ກອງປະຊຸມສຸດຍອດ ສປຊ ທີ່ໄດ້ຮັບຮອງເອົາວາລະ 2030 ເພື່ອພັດທະນາແບບຍືນຍົງ ໃນປີ 2015 ຜ່ານມາ ອັນເປັນບາດກ້າວສຳຄັນສຳລັບວົງຄະນະຍາດສາກົນ.

ລັດຖະບານເຫັນວ່າ ໃນໄລຍະຜ່ານມາມີຫຼາຍອັນ ທີ່ຍັງເຮັດບໍ່ສຳເລັດ ຈຳເປັນຕ້ອງນຳມາສືບຕໍ່ປະຕິບັດ ພ້ອມທັງ ເຊື່ອມສານເອົາເປົ້າໝາຍ ການພັດທະນາແບບຍືນຍົງເຂົ້າໃນແຜນພັດທະນາ ເສດຖະກິດ-ສັງຄົມ 5 ປີ ຄັ້ງທີ 8, ຍຸດທະສາດການພັດທະນາເສດຖະກິດ-ສັງຄົມ ໄລຍະ 10 ປີ (2016-2025) ແລະ ວິໄສທັດ 2030 ຂອງຕົນ ຕາມເງື່ອນໄຂ ແລະ ຂີດຄວາມສາມາດຕົວຈິງ ພ້ອມນັ້ນຍັງໃຫ້ຄວາມສຳຄັນ ໃນການແກ້ໄຂຜົນກະທົບຈາກລະເປີດທີ່ຍັງບໍ່ຍັງແຕກທີ່ຕົກຄ້າງໃນປາງສົງຄາມ, ໃຫ້ຄວາມສຳຄັນຕໍ່ການຮ່ວມມືສາກົນ ກ່ຽວກັບການປ່ຽນແປງຂອງດິນຟ້າອາກາດ ການປົກປັກຮັກສາສິ່ງແວດລ້ອມ ແລະ ອື່ນໆ.

ທ່ານບຸນຍັງ ວໍລະຈິດ ຍັງໄດ້ຕີລາຄາສູງ ຕໍ່ການຮ່ວມມືຂອງ ສປປ ລາວ ແລະ ສະຫະປະຊາຊາດ ໂດຍສະເພາະ ການປະກອບສ່ວນ ສະໜັບສະໜູນຊ່ວຍເຫຼືອການຈັດຕັ້ງປະຕິບັດເປົ້າໝາຍສະຫັດສະວັດ ດ້ານການພັດທະນາ ແລະ ແຜນພັດທະນາສັດຖະກິດ-ສັງຄົມແຫ່ງຊາດຂອງ ສປປ ລາວ ເຊິ່ງໄດ້ຮັບຜົນສຳເລັດເປັນຢ່າງດີ.

 

Off

Comments are closed.