09th Sep2016

ສະຫຼຸບຜົນໄດ້ຮັບຈາກກອງປະຊຸມອາຊຽນ ຄັ້ງທີ 28-29 ທີ່ ສປປ ລາວ ເປັນປະທານ

by somchan

ການເປັນເຈົ້າພາບຈັດກອງປະຊຸມ ສຸດຍອດອາຊຽນ ຄັ້ງທີ 28-29 ໂດຍການເປັນທານຂອງ ພະນະທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍກອງປະຊຸມສຸດຍອດ ແລະ ກອງປະຊຸມອື່ນໆ ທີ່ກ່ຽວຂ້ອງ ໃນລະຫວ່າງວັນທີ 1-8 ກັນຍາ 2016 ໄດ້ສຳເລັດ ແລະ ມີພິທີອັດກອງປະຊຸມ ຢ່າງເປັນທາງການ ໃນຕອນບ່າຍຂອງວັນທີ 8 ກັນຍາ 2016 ນີ້ ຢູ່ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ. ມີບັນດາປະມຸກລັດ ຫົວໜ້າລັດຖະບານ ຜູ້ແທນຂັ້ນສູງ ຈາກປະເທດສະມາຊິກອາຊຽນ, ຄູ່ເຈລະຈາ ແລະ ຄູ່ເຈລະຈາພາຍນອກ ພ້ອມດ້ວຍເລຂາທິການໃຫຍ່ອາຊຽນ ແລະ ສະຫະປະຊາຊາດ ເຂົ້າຮ່ວມ.

ພະນະທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ທັງເປັນປະທານອາຊຽນ ປີ 2016 ແລະ ປະທານກອງປະຊຸມສຸດຍອດອາຊຽນຄັ້ງທີ 28-29 ໄດ້ລາຍງານໃຫ້ຮູ້ກ່ຽວກັບຜົນສຳເລັດ ຂອງກອງປະຊຸມສຸດຍອດອາຊຽນ, ບັນດາກອງປະຊຸມສຸດຍອດ ແລະ ກອງປະຊຸມອື່ນໆ ທີ່ກ່ຽວຂ້ອງເປັນຕົ້ນແມ່ນ ກອງປະຊຸມສຸດຍອດອາຊຽນ ຄັ້ງທີ 28 ບັນດາຜູ້ອາຊຽນ ໄດ້ປຶກສາຫາລື ແລະ ກຳນົດທິດທາງສຳລັບການຮ່ວມມືໃນຕໍ່ໜ້າ ໂດຍສະເພາະການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ສຳລັບແຜນແມ່ນບົດ 3 ເສົາຄ້ຳປະຊາຄົມອາຊຽນ ຄື: ເສົາຄ້ຳປະຊາຄົມການເມືອງ-ຄວາມໝັ້ນຄົງ, ເສົາຄ້ຳປະຊາຄົມເສດຖະກິດ ແລະ ເສົາຄ້ຳປະຊາຄົມວັດທະນະທຳ-ສັງຄົມ, ແນໃສ່ຮັດແໜ້ນປະຊາຄົມອາຊຽນໃຫ້ເຂັ້ມແຂງໃນຊຸມປີຕໍ່ໜ້າ. ພ້ອມກັນນີ້ ຜູ້ນຳອາຊຽນ ຍັງໄດ້ຮັບຮອງເອົາບັນດາເອກະສານສຳຄັນ ແນໃສ່ເພື່ອຜັນຂະຫຍາຍບູລິມະສິດ ສຳລັບການເປັນປະທານອາຊຽນ ຂອງ ສປປ ລາວ ໃນປີ 2016 ພາຍໃຕ້ຄຳຂວັນ “ຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ” ເຊິ່ງປະກອບມີ: ຖະແຫຼ່ງການວຽງຈັນ ວ່າດ້ວຍການຮັບຮອງເອົາແຜນງານ ສຳລັບຂໍ້ລິເລີ່ມ ເພື່ອການເຊື່ອມໂຍງ ສະບັບທີ 3, ຖະແຫຼ່ງການວຽງຈັນ ວ່າດ້ວຍການຮັບຮອງເອົາແຜນແມ່ບົດສຳລັບການເຊື່ອມຈອດອາຊຽນ 2025, ຖະແຫຼ່ງການວຽງຈັນ ວ່າດ້ວຍການຫັນປ່ຽນການຈ້າງງານນອກລະບົບ ໄປສູ່ການຈ້າງງານໃນລະບົບ ເພື່ອກ້າວໄປສູ່ການສົ່ງເສີມວຽກທີ່ຖືກຕ້ອງ ແລະ ເປັນທຳໃນອາຊຽນ, ຖະແຫຼ່ງການວຽງຈັນ ວ່າດ້ວຍການຊຸກຍູ້ສົ່ງເສີມການຮ່ວມມືທາງດ້ານມໍລະດົກ ວັດທະນະທຳ ໃນອາຊຽນ, ການອຳນວຍຄວາມສະດວກດ້ານການຄ້າອາຊຽນ. ການເຂົ້າເຖິງແຫຼ່ງທຶນທຸລະກິດຈຸລະພາກ ຂະໜາດນ້ອຍ ຂະໜາດກາງ ແລະ ອື່ນໆ. ນອກນີ້ ບັນດາຜູ້ນຳອາຊຽນຍັງໄດ້ລົງນາມໃນຖະແຫຼ່ງການອາຊຽນວ່າດ້ວຍອາຊຽນເປັນໜຶ່ງດຽວ ໃນການຕອບໂຕ້ໄພພິບັດ ໃນພາກພື້ນ ແລະ ນອກພາກພື້ນ.

ສຳລັບກອງປະຊຸມສຸດຍອດອາຊຽນ ຄັ້ງທີ 29 ບັນດາຜູ້ນຳອາຊຽນໄດ້ຕີລາຄາຄືນ ການຮ່ວມມື ລະຫວ່າງອາຊຽນກັບ ບັນດາຄູ່ເຈລະຈາ ແລະ ຄູ່ຮ່ວມພາຍນອກ ໃນໄລຍະຜ່ານມາ ແລະວາງທິດທາງຮ່ວມມືໃນຕໍ່ໜ້າ ໂດຍເນັ້ນເຖິງຄວາມສຳຄັນ ໃນການຮັກສາຄວາມເປັນແກ່ນກາງຂອງອາຊຽນ ໂດຍຜ່ານກົນໄກທີ່ອາຊຽນເປັນຜູ້ລິເລີ່ມເຊັ່ນ: ອາຊຽນ+1, ເວທີພາກພື້ນອາຊຽນ, ກອງປະຊຸມລັດຖະມົນຕີປ້ອງກັນປະເທດ ບວກ ແລະ ກອງປະຊຸມສຸດຍອດອາຊຽນຕາເວັນອອກ. ຜູ້ນຳອາຊຽນຍັງໄດ້ແລກປ່ຽນຄຳເຫັນຢ່າງກົງໄປກົງມາ ແລະ ສ້າງສັນ ກ່ຽວກັບບັນຫາພາກພື້ນ-ສາກົນ ທີ່ມີຄວາມສົນໃຈ ແລະ ເປັນຫ່ວງຮ່ວມກັນເຊັ່ນ: ການກໍ່ການຮ້າຍ, ລັດທິຫົວຮຸນແຮງ, ໄພພິບັດທຳມະຊາດ, ການປ່ຽນແປງຂອງດິນຟ້າອາກາດ, ການຄ້າມະນຸດ ແລະ ອາຊະຍາກຳຂ້າມຊາດ ແລະ ອື່ນໆ.

ໃນໂອກາດນີ້ ພະນະທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ຍັງໄດ້ກ່າວມອບປະທານອາຊຽນໃຫ້ປະເທດ ຟີລິບປິນ ສືບຕໍ່ເປັນປະທານອາຊຽນ ເລີ່ມແຕ່ວັນທີ 1 ມັງກອນ 2017 ເປັນຕົ້ນໄປ ໂດຍແມ່ນພະນະທ່ານ ໂຣດຣິໂກ ດຸຍແຕກເຕ ປະທານາທິບໍດີ ຟີລິບປິນ ເປັນຜູ້ກ່າວຮັບການເປັນປະທານອາຊຽນຂອງຟີລິບປິນໃນປີ 2017.

Off

Comments are closed.