30th Sep2016

ກອງປະຊຸມປຶກສາຫາລື ກ່ຽວກັບການກະກຽມເປັນເຈົ້າພາບ ຈັດກອງປະຊຸມເຈົ້າໜ້າທີ່ອາວຸໂສ

by somchan

ກອງເຂລາຄະນະຊີ້ນຳລະດັບຊາດ ຕ້ານການຄ້າມະນຸດ ໄດ້ຈັດກອງປະຊຸມປຶກສາຫາລື ກ່ຽວກັບການກະກຽມເປັນເຈົ້າພາບ ຈັດກອງປະຊຸມເຈົ້າໜ້າທີ່ອາວຸໂສ ຂອງຂະບວນການຄອມມິດ ຄັ້ງທີ 11. ໃນວັນທີ 29 ກັນຍານີ້, ໂດຍການເປັນກຽດເຂົ້າຮ່ວມ ຂອງ ພົນຕີ ສົມແກ້ວ ສີລາວົງ ເລຂາທິການສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບ, ມີຮອງລັດຖະມົນຕີກະຊວງການຕ່າງປະເທດ ມີສະມາຊິກກອງເລຂາຄະນະຊີ້ນຳລະດັບຊາດຕ້ານການຄ້າມະນຸດ ຈາກບັນດາກະຊວງ ແລະ ອົງການຈັດຕັ້ງມະຫາຊົນເຂົ້າຮ່ວມ.
ພັອ ປອ ເພັງສະຫວັນ ທິບພະວົງໄຊ ຮອງຫົວໜ້າກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ທັງເປັນຫົວໜ້າກອງເລຂາຄະນະຊີ້ນຳລະດັບຊາດ ຕ້ານການຄ້າມະນຸດ ໄດ້ລາຍງານກ່ຽວກັບການກະກຽມ ເປັນເຈົ້າພາບຈັດກອງປະຊຸມເຈົ້າໜ້າທີ່ອາວຸໂສ ຂອງຂະບວນການຄວມມິດ ຄັ້ງທີ 11. ທ່ານ ໄດ້ກ່າວວ່າ: ຂະບວນການຄອມມິດແມ່ນຮ່ວມມືຂອງລັດຖະບານປະເທດຕ່າງໆໃນການຕ້ານການຄ້າມະນຸດ ຢູ່ໃນຂົງເຂດພາກພື້ນລຸ່ມແມ່ນ້ຳຂອງ ເຊິ່ງຖືກສ້າງຕັ້ງຂຶ້ນໃນປີ 2004 ແລະ ມີສະມາຊິກ 6 ປະເທດຄື: ກຳປູເຈຍ, ຈີນ, ລາວ, ມຽນມາ, ໄທ ແລະ ຫວຽດນາມ, ໂດຍລັດຖະບານຂອງ 6 ປະເທດ ໄດ້ເຊັນບົດບັນທຶກຄວາມເຂົ້າໃຈຂອງຂະບວນການຄອມມິດ, ພາຍໃຕ້ບົດບັນທຶກຄວາມເຂົ້າໃຈຂອງແຕ່ລະປະເທດສະມາຊິກ ໄດ້ຈັດຕັ້ງຄະນະຈັດຕັ້ງປະຕິບັດງານຄອມມິດ ທີ່ຮັບຜິດຊອບວຽກງານປະສານງານ ດ້ານກິດຈະກຳຕ່າງໆຂອງຂະບວກການຄອມມິດພາຍໃນປະເທດຂອງຕົນ ຂະບວນການຄອມມິດແມ່ນໂຄງການສະຫະປະຊາຊາດ ເພື່ອການຮ່ວມມືຕ້ານການຄ້າມະນຸດ ເປັນກອງເລຂາໃຫ້ລັດຖະບານ. ຂະບວນການຄອມມິດມີກອງປະຊຸມ 2 ລະດັບຄື: ກອງປະຊຸມລະດັບລັດຖະມົນຕີ ແລະ ກອງປະຊຸມຂອງເຈົ້າໜ້າທີ່ອາວຸໂສ ໂດຍປະເທດສະມາຊິກຜັນປ່ຽນກັນເປັນເຈົ້າພາບ.
ໂອກາດນີ້ ພົນຕີ ສົມແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບ ໄດ້ຊີ້ນຳໃຫ້ຜູ້ທີ່ເຂົ້າຮ່ວມກອງປະຊຸມ ໃຫ້ພ້ອມກັນປະກອບຄຳຄິດເຫັນ ແລະ ປຶກສາຫາລືກັນ ເພື່ອເຮັດໃຫ້ການຈັດກອງປະຊຸມດັ່ງກ່າວ ປະສົບຜົນສຳເລັດຕາມຈຸດປະສົງ ແລະ ຄາດໝາຍທີ່ວາງໄວ້.

Off

Comments are closed.