18th Oct2016

ມ້າງຄະດີຄ້າຂາຍຢາເສບຕິດ ຂອງກາງ 72 ແທ່ງ.

by somchan

ໃນອາທິດທີ່ຜ່ານມາ ກົມຕຳຫຼວດສະກັດກັ້ນ ແລະ ຕ້ານຢາເສບຕິດ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ໄດ້ມ້າງຄະດີຢາເສບຕິດ ຢູ່ເຂດບ້ານນາສ້າງໄພ ເມືອງໄຊເຊດຖາ ນະຄອນຫຼວງວຽງຈັນ ຈັບຕົວຜູ້ກະທຳຜິດໄດ້ 5 ຄົນ, ພ້ອມຢາເສບຕິດປະເພດ ເຮໂຣອິນ 72 ແທ່ງ, ໜັກ 30 ກວ່າກິໂລກຣາມ, ລົດໃຫຍ່ສອງຄັນ, ໂທລະສັບ 5 ໜ່ວຍ, ເງິນອີກຈຳນວນໜຶ່ງ. ເຈົ້າໜ້າທີ່ໄດ້ລາຍງານໃຫ້ຮູ້ວ່າ: ພາຍຫຼັງໄດ້ຮັບລາຍງານກ່ຽວກັບການເຄື່ອນໄຫວຄ້າຂາຍຢາເສບຕິດ ຢູ່ເຂດບ້ານນາສ້າງໄພ ຈຶ່ງສົ່ງພະນັກງານກວດກາຕິດຕາມເປົ້າໝາຍ ເພື່ອເກັບກຳຂໍ້ມູນຫຼັກຖານ ແລະ ວາງແຜນຈັບກຸມ. ຮອດວັນທີ 2 ຕຸລາ 2016 ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດ ຈຶ່ງສາມາດສະກັດກັ້ນແກ້ໄຂຄະດີລາຍດັ່ງກ່າວ ສາມາດຈັບຕົວຜູ້ກະທຳຜິດໄດ້ 5 ຄົນ ພ້ອມຂອງກາງຢາເສບຕິດປະເພດເຮໂຣອິນຈຳນວນ 72 ແທ່ງ.

ຜູ້ກະທຳຜິດ 5 ຄົນຄື: ທ້າວ ທອງວັນ ຫຼື ອາຈີ່ງຊຽງ ອາຍຸ 34 ປີ ປະຊາຊົນ ບ້ານດອນທາດ ເມືອງຕົ້ນເຜິ້ງ ແຂວງບໍແກ້ວ, ທ້າວ ປໍວ່າງ ອາຍຸ 29 ປີ ປະຊາຊົນ ບ້ານໂພນມະນີ ເມືອງນ້ຳບາກ ແຂວງຫຼວງພະບາງ, ທ້າວ ຈັ່ງເຮີ ອາຍຸ 36 ປີ ປະຊາຊົນ ບ້ານດອນທາດ ເມືອງຕົ້ນເຜິ້ງ, ທ້າວເຊັ່ງວ່າງ ອາຍຸ 36 ປີ ປະຊາຊົນ ບ້ານຝາຍ ເມືອງຫ້ວຍຊາຍ, ທ້າວຈາປໍລີ ອາຍຸ 35 ປີ ປະຊາຊົນບ້ານໄຊຈະເລີນ ເມືອງຫ້ວບຊາຍ ແຂວງບໍ່ແກ້ວ.

ຜ່ານການສືບສວນ-ສອບສວນ ຂອງເຈົ້າໜ້າທີ່ ຜູ້ຕ້ອງຫາທັງ 5 ຄົນ ໄດ້ໃຫ້ການວ່າ: ເຮໂຣອິນຈຳນວນ 72 ແທ່ງ ທີ່ເຈົ້າໜ້າທີ່ຢຶດໄດ້ນັ້ນ, ແມ່ນຂອງພວກກ່ຽວແທ້ ເຊິ່ງພວກກ່ຽວໄດ້ຊື້ມາຈາກແຂວງພາກເໜືອນ ເພື່ອນຳມາຂາຍຢູ່ທີ່ນະຄອນຫຼວງວຽງຈັນ ໃນເວລາພວມຕິດຕໍ່ຊື້-ຂາຍນັ້ນ ໄດ້ຖືກເຈົ້າໜ້າທີ່ຈັບຕົວ. ປະຈຸບັນຢູ່ໃນຂັ້ນຕອນການສືບສວນ-ສອບສວນຂອງເຈົ້າໜ້າທີ່.

 

Off

Comments are closed.