06th Feb2017

ຈຳປາສັກ ປຶກສາຫາລືໂຄງການ ສະກັດກັ້ນ ແລະ ຕ້ານຢາເສບຕິດ ປະຈຳປີ 2017

by somchan

ກອງ​ບັນຊາ​ການ ປກສ ​ແຂວງ​ຈຳປາ​ສັກ ​ໄດ້​ຈັດ​ກອງ​ປະຊຸມ​ ປຶກສາ​ຫາລື​ກຳ​ນົດ​ໂຄງການ ສະກັດ​ກັ້ນ ​ແລະ ຕ້ານ​ຢາ​ເສບ​ຕິດ ປະຈຳປີ 2017 ​ໃນ​ວັນ​ທີ 30 ມັງກອນ ຜ່ານ​ມາ​ນີ້ ​ໂດຍ​ການ​ເປັນ​ປະທານ​ຂອງ​ທ່ານ ພົຈວ ສີ​ພັນ ວົງ​ເຮືອງ​ຄຳ ຄະນະ​ປະຈຳ​ພັກ​ແຂວງ ຫົວໜ້າ​ກອງ​ບັນຊາ​ການ ປກສ ​ແຂວງ​ຈຳປາ​ສັກ, ມີ​ເຈົ້າ​ເມືອງ ຈາກ 10 ​ເມືອງ, ຫົວໜ້າ​ອົງການ​ໄອ​ຍະ​ການ​ປະຊາຊົນ, ສານ​ປະຊາຊົນ ​ແລະ ກອງ​ບັນຊາ​ການ ປກສ ​ເມືອງ ​ໃນ​ທົ່ວ​ແຂວງ​ເຂົ້າ​ຮ່ວມ.

​ໃນ​ກອງ​ປະຊຸມ ​ໄດ້​ມີ​ການ​ຄົ້ນຄວ້າ, ປຶກສາ​ຫາລື​ກ່ຽວ​ກັບ ​ໂຄງການ​ສະກັດ​ກັ້ນ ​ແລະ ຕ້ານ​ຢາ​ເສບ​ຕິດ ທີ່​ເປັນ​ໄພ​ຄຸກ​ຄາມ​ຕໍ່​ຄວາມ​ສະຫງົບ ຄວາມ​ເປັນ​ລະບຽບ​ຮຽບຮ້ອຍ​ຂອງ​ສັງຄົມ ​ເວົ້າ​ສະ​ເພາະ​ແມ່ນ​ຢູ່​ແຂວງ​ຈຳປາ​ສັກ ​ໃຫ້​ນັບ​ມື້​ຫຼຸດ​ລົງ, ​ເຊິ່ງ​ໃນ​ນີ້​ແມ່ນ​ໄດ້​ກຳນົດ​ເປັນ 2 ບາດກ້າວ ຄື ບາດກ້າວ​ກະກຽມ ​ແລະ ບາດກ້າ​ວການ​ປະຕິບັດ​ຕົວ​ຈິງ, ພ້ອມ​ທັງ​ໄດ້​ຄົ້ນ​ຄວ້າ, ປຶກສາ​ຫາລື, ກຳນົດ​ວິທີ​ການ​ນຳ​ໃຊ້​ ມາດ​ຕະການ​ທາງ ດ້ານ​ກົດໝາ​ຍ, ຫຼັກ​ຖານ​ວິຊາ​ສະ​ເພາະ​ເພື່ອ​ເກັບ​ກຳ​ຂື້ນ​ບັນຊີ, ຕິດຕາມ​ກວດກາ ​ແລະ ສະກັດ​ກັ້ນ​ແກ້​ໄຂ ຕໍ່​ກຸ່ມ​ເປົ້າ​ໝາຍ ​ເຄື່ອນ​ໄຫວ​ຄ້າຂາຍ​ຢາ​ເສບ​ຕິ​ດທີ່​ນັບ​ມື້​ມີ​ຫຼາຍຮູບ​ແບບ ​ແລະ ​ເລິກ​ແລບ​ແນບ​ນຽບ; ສ່ວນ​ກຸ່ມ​ເປົ້າ​ໝາຍ​ມົ້ວ​ສຸມ​ເສບ ​ແມ່ນ​ໄດ້​ມີ​ຄວາມ​ເປັນ​ເອກະ​ພາບ​ກັນ​ໃນ​ການ​ນຳ​ໃຊ້ ມາດ​ຕະການ​ສຶກສາອົບຮົມ​ເປັນ​ຕົ້ນຕໍ ​ເພື່ອ​ເຮັດ​ໃຫ້​ເຂົາ​ເຈົ້າ​ມີ​ຄວາມ​ຮັບ​ຮູ້​ເຂົ້າ​ໃຈ ​ເຖິງ​ຜົນ​ຮ້າຍ​ໄພ​ອັນຕະລາຍ​ຂອງ​ຢາ​ເສບ​ຕິດ ຫຼື ສົ່ງ​ເຂົ້າ​ບຳບັດ​ປິ່ນປົວ​ຢູ່​ສູນ​ບຳບັດ​ຕາມ​ຄວາມ​ເໜາະ​ສົມ.

ພ້ອມ​ດຽວ​ກັນ​ນີ້ ຍັງ​ໄດ້​ຄົ້ນຄວ້າ, ປຶກສາ​ຫາລື​ກ່ຽວ​ກັບ​ຂັ້ນ​ຕອນ ​ແລະ ວິທີ​ການ​ມ້າງ​ບັນດາ​ລາຍ​ຄະດີ​ຢາ​ເສບ​ຕິດ ​ໃນ​ຕົວ​ຈິງ ​ເພື່ອ​ເຮັດ​ໃຫ້ການ​ປະຕິບັດ​ໜ້າ​ທີ່​ມີ​ຄວາມ​ຮັບປະກັນ ທາງ​ດ້ານ​ລະບຽບ​ກົດໝາຍ​, ຫຼັກການ​ວິຊາ​ສະ​ເພາະ, ມີ​ຄວາມ​ວ່ອງ​ໄວ, ​ເຂັ້ມ​ງວດ ​ແລະ ສັງຄົມ​ໄດ້​ມີ​ສ່ວນ​ຮ່ວມ.

Off

Comments are closed.