10th Feb2017

ກະຊວງ ປກສ ປັບປຸງການຈັດຕັ້ງ ກອງບັນຊາການ ປ້ອງກັນເຄື່ອນທີ່

by somchan

ກະຊວງ​ປ້ອງ​ກັນ​ຄວາມ​ສະຫງົບ ​ໄດ້​ແຕ່ງ​ຕັ້ງ​ຄະນະ​ກອງ​ບັນຊາ​ການ​ປ້ອງ​ກັນ​ເຄື່ອນ​ທີ່​ເພີ່ມ 1 ທ່ານ ​ແລະ ​ໄດ້​ມີ​ການ​ປະກາດ​ຢ່າ​ງ​ເປັນ​ທາງ​ການ ​ໃນ​ວັນ​ທີ 9 ກຸມພາ 2017 ນີ້ ​ໂດຍ​ການ​ເຂົ້າ​ຮ່ວມ​ຂອງ ​ພົຈວ ສະ​ແຫວ​ງ ທິບ​ຄູນ​ທອງ ຄະນະ​ພັກ​ກະຊວງ ຫົວໜ້າ​ກອງ​ບັນຊາ​ການ ປ້ອງ​ກັນ​ເຄື່ອນ​ທີ່, ມີຄະນະ​ພັກ-​ຄະນະ​ບັນຊາ ​ແລະ ພະນັກງານ​ຫຼັກ​ແຫຼ່ງ​ເຂົ້າຮ່ວມ.

ພັທ ບຸນ​ເທິ​ດ ທຸມມະ​ປອນ ຫົວໜ້າ​ຫ້ອງການ​ເມືອງ ກອງ​ບັນຊາ​ການ​ປ້ອງ​ກັນ​ເຄື່ອນ​ທີ່ ​ໄດ້​ຜ່ານ​ຂໍ້​ຕົກລົງ​ຂອງ ລັດຖະມົນຕີ​ກະຊວງ​ປ້ອງ​ກັນ​ຄວາມ​ສະຫງົບ ວ່າ​ດ້ວຍ​ການ​ແຕ່ງ​ຕັ້ງ ພັທ ຄຳ​ເວີນ ​ໄຊ​ຍະ​ຈັກ ​ເປັນ​ຮອງ​ຫົວໜ້າ​ກອງ​ບັນຊາ​ການ​ປ້ອງ​ກັນ​ເຄື່ອນ​ທີ່ ສ່ວນ​ຫົວໜ້າ​ແລະ​ຮອງ​ທີ່​ມີ​ຢູ່​ແລ້ວ​ແມ່ນ​ຮັກສາ​ໄວ້​ຄື​ເກົ່າ.

ການ​ປະກາດ​ແຕ່ງ​ຕັ້ງ​ຄະນະ​ກອງ​ບັນຊາ​ການ​ປ້ອງ​ກັນ​ເຄື່ອນ​ທີ່​ໃນ​ຄັ້ງ​ນີ້ ​ແມ່ນ​ເປັນ​ການ​ປະຕິບັດ​ຕາມ​ຄວາມ ​ເຫັນ​ດີ​ເປັນ​ເອກະ​ພາບ​ຂອງ ຄະນະ​ປະຈຳ​ພັກ​ກະຊວງ​ປ້ອງ​ກັນ​ຄວາມ​ສະຫງົບ ພ້ອມ​ທັງ​ເປັນ​ການ​ປັບປຸງ​ກົງຈັກ​ການຈັດ​ຕັ້ງ​ຂອງ​ກອງ​ບັນຊາ​ການ​ປ້ອງ​ກັນ​ເຄື່ອນ​ທີ່ ​ໃຫ້​ມີ​ຄວາມ​ໜັກ​ແໜ້ນ, ​ເຂັ້ມ​ແຂງ ສາມາດ​ຕອບ​ສະໜອງ​ໄດ້​ກັບ​ຄວາມ​ເຕີບ​ໃຫ່ຍຂະຫຍາຍຕົວ ​ແລະ ໜ້າ​ທີ່​ການ​ເມືອງ​ໃນ​ໄລຍະ​ໃໝ່.

​ໂອກາດ​ດຽວ​ກັນ​ຍັງ​ໄດ້​ປະກາດ​ເລື່ອນ​ຊັ້ນ​ໃຫ້​ພະນັກງານ-​ນັກຮົບ ຂັ້ນ​ນາຍຮ້ອຍ 7 ຄົນ ​ແລະ ນາຍ​ສິບ 69 ຄົນ, ພ້ອມ​ທັງ​ປະກາດ​ຍ້ອງຍໍ​ຕໍ່​ຜູ້​ທີ່​ມີ​ຜົນງານ​ປະກອບສ່ວນ​ໃນ​ບັ້ນ​ປ້ອງ​ກັນ​ກອງ​ປະຊຸ​ມສຸດ​ຍອດ​ອາ​ຊຽນ ຄັ້ງ​ທີ 28-29 ​ໃນ​ນີ້​ຜູ້​ທີ່​ໄດ້​ຮັບ​ການ​ຍ້ອງຍໍ​ຫຼຽນ​ໄຊ​ແຮງ​ງານ​ຊັ້ນ II ມີ 271 ຄົນ, ຫຼຽນ​ໄຊ​ແຮ​ງານ​ຊັ້ນ III ມີ 454 ຄົນ, ຫຼຽນ​ກາ​ແຮງ​ງານ 111 ຄົນ ​ແລະ ​ໃບ​ຍ້ອງຍໍ​ລັດຖະບານ 2 ຄົນ.

Off

Comments are closed.