10th Feb2017

ຮອງເຈົ້າຄອງ ເນັ້ນພາກສ່ວນກ່ຽວຂ້ອງ ຮີບຮ້ອນແກ້ໄຂບັນຫາ ຝາກລົດ ແລະ ຂາຍເຄື່ອງ ຕາມແຄມທາງ ຢ່າງເຂັ້ມງວດ

by somchan

ພະ​ແນ​ກ​ໂຍທາ​ທິການ ​ແລະ ຂົນ​ສົ່ງ ຮ່ວມ​ກັບ​ພະ​ແນ​ກຕຳຫຼວດ​ຈະລາ​ຈອນ ນະຄອນຫຼວງ​ວຽງ​ຈັນ, ອົງການ​ພັດທະນາ ​ແລະ ບໍລິຫານ​ຕົວ​ເມືອງ ​ແລະ ບັນດາ​ເມືອງ​ອ້ອມ​ຂ້າງ​ນະຄອນຫຼວງ​ວຽງ​ຈັນ ​ໄດ້​ຈັດ​ກອງ​ປະຊຸມ​ປຶກສາ​ຫາລື​ກ່ຽວ​ກັບ​ການຈັດ​ສັນ​ຄວາມ​ເປັນ​ລະບຽບ​ຮຽບຮ້ອຍ ຕາມ​ເສັ້ນທາງ​ຢູ່​ນະຄອນຫຼວງ​ວຽງ​ຈັນ ​ໃນ​ວັນ​ທີ 9 ກຸມພາ 2017 ນີ້ ​ໂດຍ​ການ​ເຂົ້າ​ຮ່ວມ​ຂອງ ​ທ່ານ ​ແກ້ວ​ພິລາ​ວັນ ອາ​ໄພ​ລາດ ຮອງ​ເຈົ້າ​ຄອງ​ນະຄອນຫຼວງ​ວຽງ​ຈັນ.

ກອງ​ປະຊຸມ​ໄດ້​ມີ​ການ​ທົບ​ທວນ, ຕີ​ລາຄາ​ສະພາບ​ການ​ໃຊ້​ລົ​ດ​ໃຊ້​ຖະໜົນ ພ້ອມ​ທັງ​ສະຫຼຸບ, ຖອດ​ຖອນ​ບົດ​ຮຽນ, ທັດສະນະ​ຄຳ​ຄິດ​ເຫັນ ກ່ຽວ​ກັບ​ບັນຫາ​ທີ່​ເປັນສາ​ເຫດ​ທີ່​ພາ​ໃຫ້​ເກີດ​ສະພາບ​ລົດ​ຕິດ​ຂັດ, ອັ່ງ​ອໍ ​ແລະ ຄົ້ນຄວ້າ​ກຳນົດ​ຮູບ​ແບບ, ວິທີ​ການ​ແກ້​ໄຂ ​ເພຶ່ອ​ເຮັດ​ໃຫ້ການ​ສັນຈອນ​ຂອງ​ຜູ້​ໃຊ້​ລົດ​ໃຊ້​ຖະໜົນ​ຕາມ​ເສັ້ນທາງ​ຕ່າງໆ ​ໃນ​ນະຄອນຫຼວງ​ວຽງ​ຈັນ ມີ​ຄວາມ​ສະດວກ​ຂື້ນ; ​ໂດຍ​ສະ​ເພາະ​ແມ່ນ​ໄດ້​ເລັ່ງ​ໃສ່​ການ​ແກ້​ໄຂ​ບັນຫາ​ການ​ຝາດ​ລົດ, ການ​ຂາຍ​ເຄື່ອງ​ຊະຊາຍ ຢູ່​ບໍລິ​ເວນ​ໜ້າ​ຕະຫຼາດ​ຂົວ​ດິນ ​ແລະ ບ່ອນ​ອື່ນໆ.

​ໃນ​ໂອກາດ​ນີ້ ທ່ານ​ຮອງ​ເຈົ້າ​ຄອງ​ນະຄອນຫຼວງ​ວຽງ​ຈັນ ຍັງ​ໄດ້​ເນັ້ນ​ໜັກ​ໃຫ້​ພາກສ່ວນ​ທີ່​ກ່ຽວຂ້ອງ​ຮີບ​ຮ້ອນ ອອກ​ຄຳ​ສັ່ງ, ​ແຈ້ງ​ການ ຫຼື ຂໍ້​ຫ້າມ ກ່ຽວ​ກັບ​ການ​ແກ້​ໄຂ​ບັນຫາ​ການ​ຝາກ​ລົດ ​ແລະ ວາງ​ເຄື່ອງ​ຂາຍ​ຕາມ​ແຄມ​ທາງ ໜ້າ​ຕະຫຼາດ​ຂົວ​ດິນ ​ແລະ ບ່ອນ​ອື່ນໆ ພ້ອມ​ທັງ​ໄດ້​ເນັ້ນ​ໃຫ້​ມີ​ການ ​ຕິດ​ປ້າຍ​ຫ້າມ, ຂີດ​ເສັ້ນ​ຫ້າມ ຫຼື ​ເຮັດ​ຮົ້ວກັນ​ຢູ່​ບໍລິ​ເວນ​ດັ່ງກ່າວ ​ແລະ ຖ້າ​ພົບ​ເຫັນ​ຍັງ​ມີ​ການລະ​ເມີດ​ອີກ ​ແມ່ນ​ໃຫ້​ປະຕິບັດ​ຕາມ​ລະບຽບ​ຫຼັກການ​ຢ່າງ​ເຂັ້ມ​ງວດ.

ນອກ​ນີ້ ຍັງ​ໄດ້​ມອບ​ໃຫ້​ພະ​ແນ​ກ​ໂຍທາ​ທິການ ​ແລະ ຂົນ​ສົ່ງ, ພະ​ແນ​ກຕຳຫຼວດ​ຈະລາຈອນນະຄອນຫຼວງ​ວຽງ​ຈັນ ສົມທົບ​ກັບ ອພບ ​ແລະ ບັນດາ​ເມືອງ ຮີບ​ຮ້ອນ​ລົງ​ກວດກາ ​ແລະ ​ແກ້​ໄຂ​ບັນຫາ​ຝາກ​ລົດ​ຕາມ​ແຄມ​ທາງ, ການວາງ​ເຄື່ອງ​ຂາຍ​ຕາມ​ແຄມ​ທາງ ຫຼື ທາງ​ຄົນ​ຍ່າງ, ​ແກ້​ໄຂ​ການ​ປຸກ​ສ້າງ, ການ​ຕໍ່​ເທີບ, ​ເງີບ​ຕາມ​ແຄມ​ທາງ, ກວດກາ​ບັນດາ​ເສັ້ນທາງ​ທີ່​ຫ້າມ​ຕິດ​ປ້າຍ​ໂຄສະນາ, ການ​ຕິດ​ປ້າຍ​ກຳນົດ​ເວລາ​ຫ້າມ​ລົດ​ໃຫ່ຍ​ເຂົ້າ-​ອອກ ຕົວ​ເມືອງ, ການ​ປັບປຸງ​ແຕ້ມ​ເສັ້ນ​ຈະລາຈອນ​ຄືນ​ໃໝ່, ການ​ປັບປຸງ​ລະບົບ​ໄຟ​ອຳນາດຄືນ​ໃໝ່ ຢູ່​ສະຖານ​ທີ່​ເຫັນ​ວ່າ​ມີ​ຄວາມ​ຈຳ​ເປັນ ​ແລະ ບັນຫາ​ອື່ນໆ. ​ແນ່​ໃສ່​ເຮັດ​ໃຫ້ການ​ສັນ​ຈອນ​ໄປ-ມາ ຂອງ​ຜູ້​ໃຊ້​ລົດ ​ໃຊ້​ຖະໜົນ​ຕາມ​ເສັ້ນທາງ​ຕ່າງໆ ​ໃນ​ນະຄອນຫຼວງ​ວຽງ​ຈັນ ​ມີ​ຄວາມ​ສະດວກ, ວ່ອງ​ໄວ, ມີ​ຄວາມ​ເປັນ​ລະບຽບ​ຮຽບຮ້ອຍ ​ແລະ ປອດ​ໄພ​ດີ.

Off

Comments are closed.