13th Feb2017

ເຈົ້າໜ້າທີ່ ຕຳຫຼວດກັກຕົວ ທ້າວ ແສງທະວີ ຫຼື ຊ້າງ ດຳເນີນຄະດີ ຂໍ້ຫາ ຄາຕະກຳ

by somchan

​ໃນ​ວັນ​ທີ 31 ມັງກອນ ຜ່ານ​ມາ​ ​ເຈົ້າ​ໜ້າ​ທີ່​ຕຳຫຼວດ ​ເມືອງ​ໄຊ​ທານີ ນະຄອນຫຼວງ​ວຽງ​ຈັນ  ​ໄດ້​ກັກ​ຕົວ ທ້າວ​ແສງ​ທະວີ ຫຼື ຊ້າງ ອາຍຸ 26 ປີ ປະຊາຊົນ ຢູ່ ​ບ້ານ​ໂພນ​ຕ້ອງ ​ເມືອງ​ໄຊ​ທານີ ​ເພຶ່ອດຳ​ເນີນ​ຄະດີ ຂໍ້​ຫາ​ຄາ​ຕະກຳ ຄື ​ໃນ​ວັນ​ທີ 17 ມັງກອນ 2017 ຜູ້ກ່ຽວ​ໄດ້​ກໍ່​ເຫດ​ໃຊ້​ມີດ​ແທງ ທ້າວ​ນະ ອາຍຸ 33 ປີ ປະຊາຊົນ​ຢູ່​ບ້ານ​ດຽວ​ກັນ​ເສຍ​ຊີວິດ.

ຜ່ານ​ການ​ສືບສວນ-​ສອບ​ສວນ ຂອງ​ເຈົ້າ​ໜ້າ​ທີ່​ຕຳຫຼວດ ທ້າວ​ແສງ​ທະວີ ຫຼື ຊ້າງ ​ໄດ້ສາລະພາບ​ວ່າ ຜູ້ກ່ຽວ​ກັບ ທ້າວ​ນະ ( ຜູ້​ເສຍ​ຊີວິດ ) ​ແມ່ນ​ເປັນ​ໝູ່​ຮັກ​ແພງ ຢູ່​ບ້ານ​ດຽວ​ກັນ ​ແລະ ​ເຮືອນ​ໃກ້​ກັນ ຜ່ານ​ມາ ທ້າວ​ນະ ​ເຄີຍ​ຢືມ​ເງີ​ນຜູ້ກ່ຽວ 300.000 ກີບ ​ເຄີຍ​ໄດ້​ທວງ​ຫຼາຍ​ຄັ້ງ​ແລ້ວ ​ແຕ່​ບໍ່​ໄດ້, ຈົນ​ເຖິງ​ວັນ​ທີ 17 ມັງ​ກອນ 2017 ທ້າວ​ແສງ​ທະວີ ຫຼື ຊ້າງ ​ໄດ້​ໄປ​ທວງ​ຖາ​ມ​ເອົາ​ເງີ​ນຄືນ​ນຳ ທ້າວ​ນະ ​ອີກ ​ແຕ່​ໄດ້​ຖືກ​ທ້າວ​ນະ ​ຕີ ດັ່ງ​ນັ້ນ ທ້າວ​ແສງ​ທະວີ ຫຼື ຊ້າງ ຈິ່ງ​ຈັບ​ເອົາ​ມີດ​ທີ່​ຊຸກ​ເຊື່ອງ​ຢູ່​ຖົງ​ເສື້ອ​ອອກ​ມາ​ແທງ ທ້າວ​ນະ ​ແລ້ວ​ກໍ່​ໄດ້​ຫຼົບໜີ, ສ່ວນ​ ທ້າວ​ນະ ຍາດ​ພີ່ນ້ອງ​ໄດ້​ນຳ​ສົ່ງ​ໂຮງໝໍ ​ແລະ ​ໄດ້​ເສຍ​ຊີວິດ​ໃນ​ເວລາ​ຕໍ່​ມາ.​ຈາກ​ນັ້ນ ​ໃນ​ວັນ​ທີ 31 ມັງກອນ 2017 ທ້າວ​ແສງ​ທະວີ​ ຫຼື​ ຊ້າງ ກໍ່​ໄດ້​ເຂົ້າ​ມອບ​ຕົວ​ຕໍ່​ເຈົ້າ​ໜ້າ​ທີ່​ຕຳຫຼວດ ​ເມືອງ​ໄຊ​ທານີ.

Off

Comments are closed.