15th Feb2017

ສະຫຼຸບສາເຫດ ແລະ ມູນຄ່າເສຍຫາຍ ຈາກເຫດໄຟໄໝ້ ຢູ່ບ້ານດອນຄຳ ເມືອງຮຸນ ແຂວງອຸດົມໄຊ

by somchan

​ເຈົ້າ​ໜ້າ​ທີ່​ຕຳຫຼວດສະກັດ​ກັ້ນ ​ແລະ ຕ້ານ​ອັກຄີ​ໄພ ກອງ​ບັນຊາ​ການ ປກສ ​ແຂວງ​ອຸດົມ​ໄຊ ​ໄດ້​ລາຍ​ງານ​ໃຫ້​ຮູ້​ກ່ຽວ​ກັບ​ສາ​ເຫດ​ຂອງ​ເຫດການ​ໄຟ​ໄໝ້ ​ເຮືອນ​ປະຊາຊົນ ຢູ່​ບ້ານ​ດອນ​ຄຳ ​ເມືອງ​ຮຸນ ​ແຂວງ​ອຸດົມ​ໄຊ ​ເຊິ່ງ​ເຫດການ​ດັ່ງກ່າວ​ເກີດ​ຂື້ນ​ ໃນ​ວັນ​ທີ 11 ກຸມພາ 2017 ​ເຊິ່ງສາ​ເຫດ​​ແມ່ນ​ເກີດ​ຈາກ​ໄຟຟ້າ​ລັດ​ວົງ​ຈອນ ຢູ່​ເຮືອນ​ຂອງ ນາງ ສົມ​ຄິດ ​ແລ້ວ​ເກີດ​ໄຟ​ລຸກ​ໄໝ້ ພ້ອມ​ທັງ​ລຸກລາມ​ໃສ່​ຮື​ອນ​ໃກ້​ຄຽງ​ຢ່າງ​ໄວວາ ; ຈາກ​ນັ້ນ​ເຈົ້າ​ໜ້າ​ທີ່ ​ແລະ ປະຊາຊົນ ​ໄດ້​ພ້ອມ​ກັນ​ດັບ​ມອດ​ໄຟ ​ໃຊ້​ເວລາ 1 ຊົ່ວ​ໂມງ ຈຶ່ງ​ສາມາດ​ຄອບ​ຄຸມ​ໄຟ​ໄວ້​ໄດ້. ສຳລັບ​ຜົນ​ເ​ສຍຫາຍຈາກ​ເຫດການ​ໄຟ​ໄໝ້​ຄັ້ງ​ນີ້ ມີ​ເຮືອນ​ປະຊາຊົນ​ຖືກ​ໄຟ​ໄໝ້ 26 ຫຼັງ ພ້ອມ​ດ້ວຍ​ເລົ້າ​ເຂົ້າ​ອີກ​ຈຳນວນ​ໜຶ່ງ, ມີ​ຄົນ​ໄດ້​ຮັບ​ບາດ​ເຈັບ 3 ຄົນ ລວມມູນ​ຄ່າ 2 ຕື້​ກວ່າ​ກີບ.

​ເຈົ້າ​ໜ້າ​ທີ່​ກົມ​ຕຳຫຼວດ​ສະກັດ​ກັ້ນ ​ແລະ ຕ້ານ​ອັກຄີ​ໄພ ກົມ​ໃຫ່ຍຕຳຫຼວດ ກະຊວງ ປກສ ຍັງ​ໄດ້​ລາຍ​ງານ​ໃຫ້​ຮູ້​ວ່າ : ​ໃນ​ອາທິດ​ຜ່ານ​ມາ ຫຼື ​ໃນ​ໄລຍະ​ຕົ້ນ​ເດືອນ ກຸມພາ 2017 ນີ້ ທົ່ວ​ປະ​ເທດ​ມີ​ອັກຄີ​ໄພ ​ເກີດ​ຂື້ນ 8 ຄັ້ງ ຜົນ​ເສຍ​ຫາຍ​ມີ ​ໄຟ​ໄໝ້​ເຮືອນ​ປະຊາຊົນ 35 ຫຼັງ, ​ໄຟ​ໄໝ້​ຕະຫຼາດ 1 ​ແຫ່ງ ມີ 32 ຮ້ານ, ​ໄຟ​ໄໝ້​ໂຮງງານ 1 ​ແຫ່ງ, ມີ​ຄົນ​ເສຍ​ຊີວິດ 2 ຄົນ ​ແລະ ບາດ​ເຈັບ 3 ຄົນ, ລວມມູນ​ຄ່າ 6 ຕື້​ກວ່າ​ກີບ ສ່ວນ​ສາ​ເຫດ​​ແມ່ນ​ເກີດ​ຈາກ​ໄຟຟ້າ​ລັດ​ວົງ​ຈອນ 4 ຄັ້ງ, ດັງ​ໄຟ​ແຕ່ງກິນ ​ແລະ ອື່ນໆ.

​ເຈົ້າ​ໜ້າ​ທີ່​ກົມ​ຕຳຫຼວດສະກັດ​ກັ້ນ ​ແລະ ຕ້ານ​ອັກຄີ​ໄພ ຍັງ​ໄດ້​ຮຽກຮ້ອງ​ເຖິງ​ປະຊາຊົນ​ທຸກ​ຊັ້ນ​ຄົນ​ໃນ​ສັງຄົມ ຈົ່ງ​ມີ​ສະຕິ ​ໃນ​ການ​ນຳ​ໃຊ້​ໄຟ ​ແລະ ​ເປັນ​ເຈົ້າ​ການ​ກວດກາ​ອຸປະກອນ​ເຄື່ອງ​ໄຟຟ້າ ​ເພຶ່ອປ້ອງ​ກັນ​ບັນຫາ​ໄຟຟ້າ​ລັດ​ວົງ​ຈອນ, ການ​ດັງ​ໄຟ​ແຕ່ງກິນ, ການ​ຈູດ​ທູດ​ທຽນ​ບູຊາ ​ເມື່ອ​ສຳລັບ​ແລ້ວ​ກໍ່​ຕ້ອງ​ໄດ້​ດັບ​ມອດ​ຄັກ​ແນ່; ພ້ອມ​ກັນ​ນີ້​ການ​ຈູດ​ຂີ້​ເຫຍື້ອ ຫຼື ຈູດ​ປ່​າ​ເພຶ່ອຈຸດປະສົງ​ຕ່າງໆ ​ແມ່ນ​ເປັນ​ສິ່ງ​ທີ່​ຫ້າມ​ທີ່​ສຸດ ​ເນື່ອງ​ຈາ​ກ​ໄລຍະ​ນີ້​ອາກາດ​ມີ​ການ​ປ່ຽນ​ແປງ​ເລື້ອຍໆ ທັງ​ເປັນ​ໄລຍະ​ທີ່​ອາກາດ​ມີ​ຄວາມ​ແຫ້ງ​ອົບ​ເອົ້າ ​ແລະ ມີ​ກະ​ແສ​ລົມ​ພັດ​ເປັນ​ປະຈຳ ດັ່ງ​ນັ້ນ​ຈຶ່ງ​ເຮັດ​ໃຫ້​ວັດຖຸ​ສິ່ງ​ຂອງ​ຕ່າງໆ ສາມາດ​ຕິດ​ໄຟ​ໄດ້​ງ່າຍ ​ແລະ ລຸກລາມ​ໄດ້​ຢ່າງ​ໄວວາ.

Off

Comments are closed.