16th Feb2017

ຖະແຫຼ່ງຂ່າວ ກ່ຽວກັບການ ແກ້ໄຂ ກຸ່ມເປົ້າໝາຍ ຄ້າຂາຍຢາເສບຕິດ ແລະ ຕິດພັນ ກັບບັນຫາອາວຸເສິກ

by somchan

ວັນ​ທີ 15 ກຸມພາ 2017 ທ່ານ ພົຈວ ປອ. ທອງ​ເຫຼັກ ມັງ​ໜໍ່​ເມກ, ຫົວໜ້າ​ກົມ​ໃຫ່ຍຕຳຫຼວດ, ກະຊວງ​ປ້ອງ​ກັນ​ຄວາມ​ສະຫງົບ ​ໄດ້​ຖະ​ແຫຼ່ງກ່ຽວ​ກັບ​ເຫດການ​ແກ້​ໄຂ​ເຄືອ​ຄ່າຍ​ກຸ່ມ​ເປົ້າ​ໝາຍ​ຄ້າ-ຂາຍ​ຢາ​ເສບ​ຕິດ ​ແລະ ຕິດ​ພັນ​ກັບບັນຫາ​ອາວຸດ​ເສິກ ​ໃນ​ຄັ້ງ​ວັນ​ທີ 16 ກັນຍາ 2016 ​ເຖິງ ວັນ​ທີ 24 ມັງກອນ 2017 ທີ່​ຜ່ານ​ມາ. ​ເຊິ່ງກົມ​ຕຳຫຼວດ​ສະກັດ​ກັ້ນ ​ແລະ ຕ້ານ​ຢາ​ເສບ​ຕິດ, ກົມ​ໃຫ່ຍຕຳຫຼວດ, ກະຊວງ​ປ້ອງ​ກັນ​ຄວາມ​ສະຫງົບ ​ໄດ້​ເປັນ​ເຈົ້າ​ການ​ດຳ​ເນີນ​ວຽກ​ງານ​ວິຊາ​ສະ​ເພາະ​ຂອງ​ຕົນ ​ເພຶ່ອ​ເກັບ​ກຳ​ຂໍ້​ມູນ​ຢ່າງ​ເປັນ​ລະບົບ, ຈາກ​ນັ້ນ ​ໄດ້​ປະສານ​ສົມທົບລະຫວ່າງ ​ເຈົ້າ​ໜ້າ​ທີ່​ຕຳຫຼວດ​ຢູ່​ສູນ​ກາງ ກັບ​ທ້ອງ​ຖິ່ນ​ບັນດາ​ແຂວງ​ໃນ​ທົ່ວ​ປະ​ເທດ, ພ້ອມ​ກັບ​ອົງການ​ທີ່​ກ່ຽວຂ້ອງ ​ແລະ ອຳນາດ​ການ​ປົກຄອງ​ທຸກ​ຂັ້ນ ຈິ່ງ​ໄດ້​ດຳ​ເນີນ​ການ​ແກ້​ໄຂ​ເຄື່ອຄ່າ​ຍກຸ່ມ​ເປົ້າ​ໝາຍ​ຊື້-​ຂາຍ​ຢາ​ເສບ​ຕິດ ​ແລະ ຕິດ​ພັນ​ກັບ​ອາວຸດ​ເສິກ, ​ແຕ່​ພາກ​ເໜືອ​ ລົງ​ຮອດ​ພາກ​ໃຕ້ ​ແລະ ສາມາດ​ຈັບ​ຕົວ​ຜູ້​ຖືກ​ຫາ​ທັງ​ໝົດ ​ໄດ້ 33 ຄົນ, ຍິງ 11 ຄົນ ດັ່ງ​ນີ້:

ກຸ່ມ​ທີ 1: ​ໃນ​ວັນ​ທີ 16/09/2016 ​ເຈົ້າ​ໜ້າ​ທີ່​ຕຳຫຼວດ ​ໄດ້​ຈັບ​ຕົວ ທ້າວ ກິ​ນ້ອຍ ຜາ​ໄຊ ຫຼື ( ​ແອນ້ອຍ ຫຼື ນ້ອຍ​ອາກາດ ) , ອາຍຸ 34 ປີ, ​ເຊື້ອ​ຊາດ​-​ສັນຊາດ​ລາວ, ຢູ່​ບ້ານ​ອາກາດ, ​ເມືອງ​ສີ​ໂຄດ​ຕະບອງ ນະຄອນຫຼວງ​ວຽງ​ຈັນ, ພ້ອມ​ດ້ວຍ​ພັກ​ພວກ​ຈຳນວນ 16 ຄົ​ນ, ຍິງ 04 ຄົນ.

  • ກຸມ​ທີ່ 2: ​ໃນ​ວັນ​ທີ 11/12/2016 ​ເຈົ້າໜ້າ​ທີ່​ໄດ້​ຈັບ​ຕົວ ຄື: ທ້າວ ຫວາດ ພິລາ​ບັນ, ອາຍຸ 41 ປີ, ​ເຊື້ອ​ຊາດ-​ສັນຊາດ​ ລາວ ​ແລະ ນາງ​ ແກ້ວ ພິລາ​ບັນ ຫຼື ( ກິ່ວ ), ອາຍຸ 39 ປີ ​ເຊື້ອ​ຊາດ-​ສັນຊາດ​ ລາວ ຢູ່​ແຂວງ​ບໍ​ແກ້ວ.
  • ກຸ່ມ​ທີ່ 3: ​ໃນ​ວັນ​ທີ 10/01/2017 ​ເຈົ້າ​ໜ້າ​ທີ່​ໄດ້​ຈັບ​ຕົວ​ຄື : ທ້າວ ຄອນ​ປະສົງ ສຸກ​ກະ​ເສີມ ຫຼື ( ຊຽງເທີ ),ອາຍຸ 47 ປີ ​ເຊື້ອ​ຊາດ-ສັນຊາດ​ ລາວ, ຢູ່​ນະຄອນຫຼວງ​ວຽງ​ຈັນ, ພ້ອມ​ດ້ວຍ​ພັກ​ພວກ 03 ຄົນ, ​ເຊິ່ງ​ເປັນ​ຜູ້​ຄ້າ-ຂາຍ​ຢາ​ເສບ​ຕິດ​ລາຍ​ໃຫ່ຍ ​ແລະ ​ເປັນ​ລາຍ​ໃຫ່ຍກວ່າ ທ້າວ ​ໄຊຊະນະ ​ແກ້ວ​ພິມ​ພາ ຫຼື ( ວັນ​ລົບ ).
  • ກຸ່ມ​ທີ່ 4: ທ້າວ ​ໄຊຊະນະ ​ແກ້ວ​ພິມ​ພາ ຫຼື ( ວັນ​ລົບ ), ອາຍຸ 41 ປີ, ສັນຊາດ​ລາວ, ຢູ່​ແຂວງ​ຄຳ​ມ່ວນ, ​ເປົ້າ   ​ໝາຍ​ນຳ​ຈັບ ​ໄດ້​ເອົາ​ຕົວ​ຫຼົບໜີ, ​ເຈົ້າ​ໜ້າ​ທີ່​ຕຳຫຼວດລາວ​ຈຶ່ງ​ໄດ້​ປະສານ​ງານ​ກັບ​ເຈົ້າ​ໜ້າ​ທີ່​ຕຳຫຼວດ​ລາຊະ​ອານາຈັກ​ໄທ, ຈັບ​ຕົວ​ໄດ້ ​ໃນ​ວັນ​ທີ 19/01/2017 ຢູ່​ສະໜາມ​ບິນ​ສຸວັນນະ​ພູມ, ປະ​ເທດ​ໄທ ​ແລະ ​ເຈົ້າ​ໜ້າ​ທີ່​ພວກ​ເຮົາ​ໄດ້​ຈັບ​ກຸ່ມ​ພັກ​ພວກ​ຂອງ ທ້າວ ​ໄຊຊະນະ ​ແກ້ວ​ພິມ​ພາ ຢູ່ ​ແຂວງ​ຄຳ​ມ່ວນ ​ແລະ ນະຄອນຫຼວງ​ວຽງ​ຈັນ, ​ໃນ​ວັນ​ທີ 20/01/2017, ​ໄດ້​ກັກ​ຕົວ​ເປົ້າ​ໝາຍ​ຈຳນວນ 05 ຄົນ, ຍິງ 01 ຄົນ.
  • ກຸ່ມທີ່ 5: ຖືກ​ກັກ​ຕົວ ​ໃນ​ວັນ​ທີ 24/01/2017 ຄື: ທ້າວ ຄອນ​​ໄທ ​ໂຄດ​ສົມບັດ ຫຼື ( ສິ້ວ ), ບ້ານ​ຫຼັກ​ເມືອງ ​ເມືອງ​ສອງ​ຄອນ ​ແຂວງ​ສະຫວັນ​ນະ​ເຂດ ພ້ອມ​ດ້ວຍ​ພັກ​ພວກ ອີກ 02 ຄົນ.

ຜ່ານ​ການ​ປະຕິບັດ​ວຽກ​ງານ ນັບ​ແຕ່​ວັນ​ທີ 16/09/2016 ຮອດ​ປະຈຸ​ບັນ, ສາມາດ​ຢຶດຂອງ​ກາງ​ຄະດີ​ໄດ້​ຫຼາຍ​ລາຍ ການ​ເຊັ່ນ: ຢາ​ເສບ​ຕິດ​ຫຼາຍ​ຊະນິດ, ອາວຸດ​ເສິກ ( ປືນ ) ຫຼາຍ​ກະບອກ, ​ເງີ​ນສົດ​ສະກຸນ​ຕ່າງໆ, ວັດຖຸ​ມີຄ່າ​ຈຳນວນ​ໜຶ່ງ ​ແລະ ອື່ນໆ.

​ໄດ້​ອາ​ຍັດ​ເຮືອນ, ​ໂຮງ​ແຮມ, ຕະຫຼາດ, ຮ້ານ​ອາຫານ, ​ໂຮງ​ເຟີ​ນີ​ເຈີ, ​ໂຮງງານ​ສັງກະສີ, ສາງ, ອູ່​ສ້ອມ​ແປງລົດ, ຫ້ອງ​ແຖວ, ປ້ຳ​ນ້ຳມັນ, ລົດ​ໃຫ່ຍ, ​ເຮືອ​ແຈັດ​ສະ​ກີ ​ແລະ ອື່ນໆ.

ນອກຈາກ​ນັ້ນ, ​ໃນ​ວັນ​ທີ 14/02/2017 ​ເຈົ້າ​ໜ້າ​ທີ່​ກຳລັງ​ປ້ອງ​ກັນ​ຄວາມ​ສະຫງົບ ຍັງ​ໄດ້​ຕິດຕາມ ​ແລະ ກັກ​ຕົວ​ກຸ່ມ​ຄົນ ທີ່​ແລ່ນຊື້​ຈ້າງ ​ແລະ ​ໃຫ້​ສິນ​ບົນ​ເຈົ້າ​ໜ້າ​ທີ່ ​ເພື່ອ​ໃຫ້​ປ່ອຍ​ຕົວ​ຂອງ​ຜູ້​ເປັນ​ຫົວ​ໂປ່​ໂຕ​ການ​ດື້​ດ້ານ​ຊື້-​ຢາ​ເສບ​ຕິດ​ລາຍ​ໃຫ່ຍ ​ເປັນ​ເງີ​ນ 30,000,000 ບາດ​ ຕໍ່​ໜຶ່ງຄົນ; ຈະ​ຈ່າຍ​ເງີ​ນ​ໃຫ້​ກ່ອນ 10,000,000 ບາດ, ພາຍຫຼັງ​ປ່ອຍ​ຕົວ​ແລ້ວ, ຈຶ່ງ​ຈະ​ໃຫ້ຕື່ມ​ອີກ 20,000,000 ບາດ.

ຕໍ່​ເຫດການ​ດັ່ງກ່າວ ຄະນະ​ຮັບຜິດຊອບ​ດຳ​ເນີນ​ຄະດີ ຍັງ​ສືບ​ຕໍ່​ເປີດ​ກວ້າງ​ດຳ​ເນີນ​ການ​ສືບສວນ-​ສອບ​ສວນ​ເກັບ​ກຳ​ຂໍ້​ມູນ​ຫຼັກ​ຖານ​ຂະຫຍາຍ​ໄປ​ຫາ​ກຸ່ມ​ແກ້ງ​ເຄືອ​ຄ່າ​ຍທີ່​ຍັງ​​ເຫຼືອ ​ເພື່ອ​ມາ​ລົງ​ໂທດ​ຕາມ​ລະບຽບ​ກົດໝາຍ​ຢ່າງ​ເຂັ້ມ​ງວດ.

ຕໍ່​ຜົນ​ສຳ​ເລັດ​ເບື້ອງ​ຕົ້ນ, ​ໃນ​ການ​ແກ້​ໄຂ​ປະກົດ​ການ​ຫຍໍ້​ທໍ້​ຂອງ​ສັງຄົມ ​ເວົ້າ​ລວມ, ​ເວົ້າ​ສະ​ເພາະ ​ແມ່ນ​ການ​ແກ້​ໄຂ​ກຸ່ມ​ຊື້-​ຂາຍ, ຂົນ​ສົ່ງ ​ແລະ ມີ​ຢາ​ເສບ​ຕິດ​ໄວ້​ໃນ​ຄອບ​ຄອງ ​ແມ່ນ​ການ​ປະກອບສ່ວນ​ຂອງ​ພົນລະ​ເມືອງ​ດີ, ອຳນາດ​ການ ປົກຄອງ​ທ້ອງ​ຖິ່ນ, ຊາວ​ນະຄອນຫຼວງ​ວຽງ​ຈັນ ​ແລະ ບັນດາ​ແຂວງ​ໃນ​ທົ່ວ​ປະ​ເທດ; ສະ​ນັ້ນ, ຂ້າພະ​ເຈົ້າ​ຕາງໜ້າ​ໃຫ້​ແກ່ ກຳລັງ​ປ້ອງ​ກັນ​ຄວາມ​ສະຫງົບ ຂໍ​ຊົມ​ເຊີຍ ​ແລະ ຂໍ​ຂອບ​ອົກ​ຂອບ​ໃຈ ຕໍ່​ການ​ປະກອບສ່ວນ​ຂອງ​ພວກ​ທ່ານ​ໃນ​ວຽກ​ງານ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ ​ເປັນ​ຢ່າງ​ດີ​ຕະຫຼອດ​ມາ.


 

 

 

Off

Comments are closed.