16th Feb2017

ແຂວງ ຈຳປາສັກ ສະຫຼຸບວຽກງານ ປ້ອງກັນຄວາມສະຫງົບ ປະຈຳປີ 2016 ແລະ ທິດທາງແຜນການ ປີ 2017

by somchan

ກອງບັນຊາການ ປກສ ແຂວງຈຳປາສັກ ໄດ້ຈັດກອງປະຊຸມ ສະຫຼຸບວຽກງານປ້ອງກັນຄວາມສະຫງົບ ປະຈຳປີ 2016 ແລະ ວາງທິດທາງແຜນການ ປີ 2017 ໃນວັນທີ 7 ກຸມພາ ນີ້ ໂດຍການເປັນປະທານຂອງ ພົຈວ ສີພັນ ວົງເຮືອງຄຳ ຄະນະປະຈຳພັກແຂວງ ຫົວໜ້າກອງບັນຊາການ ປກສ ແຂວງຈຳປາສັກ, ໃຫ້ກຽດເຂົ້າຮ່ວມໂດຍ ປອ ບຸນຖອງ ດີວິໄຊ ກຳມະການສູນກາງພັກ ເລຂາພັກແຂວງ ເຈົ້າແຂວງ ແຂວງຈຳປາສັກ ພ້ອມດ້ວຍຄະນະພັກ, ຄະນະບັນຊາ ບັນດາຫ້ອງ ແລະ ກອງບັນຊາການ ປກສ ເມືອງ 10 ເມືອງ ອ້ອມຂ້າງ ແຂວງ ຈຳປາສັກ ເຂົ້າຮ່ວມ.

ພັອ ສົມຄິດ ແກ້ວພົມມາ ຮອງຫົວໜ້າກອງບັນຊາການ ປກສ ແຂວງຈຳປາສັກ ໄດ້ລາຍງານການຊີ້ນຳ-ນຳພາ ແລະ ການເຄື່ອນໄຫວປະຕິບັດໜ້າທີ່ຂອງກຳລັງປ້ອງກັນຄວາມສະຫງົບ ທົ່ວແຂວງຈຳປາສັກ ໃນ 1 ປີຜ່ານມາ ໂດຍສະເພາະແມ່ນການສະກັດກັ້ນແກ້ໄຂປະກົດການຫຍໍ້ທໍ້ໃນສັງຄົມ ທົ່ວແຂວງຈຳປາສັກ ມີຄະດີອາຍາເກີດຂື້ນ 587 ລາຍ, ມ້າງໄດ້ 369 ລາຍ, ຈັບຜູ້ກະທຳຜິດໄດ້ 252 ຄົນ, ສາມາດເກັບກູ້ຊັບສິນຄືນມາໄດ້ມີ ເງີນກີບ 16 ລ້ານກີບ, ລົດໃຫ່ຍ 1 ຄັນ, ລົດຈັກ 306 ຄັນ ແລະ ອື່ນໆ. ສາມາດສະກັດກັ້ນແກ້ໄຂຄະດີຢາເສບຕິດໄດ້ 313 ລາຍ, ຈັບຜູ້ກະທຳ ຜິດໄດ້ 591 ຄົນ, ຢຶດຢາບ້າໄດ້ 278.169 ເມັດ, ຢາໄອສ 441.154 ກຣາມ, ລົດໃຫ່ຍ 33 ຄັນ, ລົດຈັກ 115 ຄັນ, ເງີນກີບ 40 ລ້ານກີບ. ນອກນີ້ຍັງມີອຸປະຕິເຫດເກີດຂື້ນ 698 ລາຍ, ມີຄົນເສຍຊີວິດ 127 ຄົນ, ໄດ້ຮັບບາດເຈັບ 1.202 ຄົນ, ມີພາຫະນະເປ່ເພ 1.261 ຄັນ ລວມມູນຄ່າເສຍຫາຍ 9 ຕື້ກວ່າກີບ ແລະ ມີອັກຄີໄພເກີດຂື້ນ 13 ລາຍ ລວມມູນຄ່າເສຍຫາຍ 70 ຕື້ກວ່າກີບ.

ໃນກອງປະຊຸມຍັງໄດ້ປະກອບຄຳຄິດເຫັນເພື່ອແລກປ່ຽນບົດຮຽນກ່ຽວກັບວຽກງານ ສະກັດກັ້ນແກ້ໄຂ ປະກົດການຫຍໍ້ທໍ້ຢ່າງກົງໄປກົງມາ ແລະ ເລິກເຊິ່ງ ພ້ອມທັງໄດ້ຄົ້ນຄວ້າພິຈາລະນາ ແລະ ມີຄວາມເປັນເອກະພາບ ຕໍ່ກັບທິດທາງແຜນການວຽກງານຈຸດສຸມປະຈຳປີ 2017 ເປັນຕົ້ນແມ່ນວຽກງານປັບປຸງກໍ່ສ້າງກຳລັງ, ການພັດທະນາ ຍົກລະດັບທາງດ້ານຄວາມຮູ້ຄວາມສາມາດ, ການຕອບສະໜອງທາງດ້ານພາຫະນະ, ອຸປະກອນເຕັກນິກທັນສະໄໝໃຫ້ ແກ່ການປະຕິບັດໜ້າທີ່ ເພຶ່ອປະກອບສ່ວນຈັດຕັ້ງຜັນຂະຫຍາຍ 4 ຄາດໝາຍ 4 ແຜນງານໃຫ່ຍ ແລະ 41 ໂຄງການ ຂອງກະຊວງ ປກສ ວາງອອກໃຫ້ປະກົດຜົນເປັນຈິງ.

ໃນໂອກາດດຽວກັນ ປອ ບຸນຖອງ ດີວິໄຊ ເຈົ້າແຂວງໆຈຳປາສັກ ຍັງໄດ້ສະແດງຄວາມຍ້ອງຍໍຊົມເຊີຍຕໍ່ຜົນ ງານ- ຜົນສຳເລັດ ຂອງກອງບັນຊາການ ປກສ ແຂວງຈຳປາສັກ ໃນ 1 ປີຜ່ານມາ, ພ້ອມທັງໄດ້ຮຽກຮ້ອງໃຫ້ຄະນະພັກ- ຄະນະກອງບັນຊາການ ປກສ ແຂວງ, ຫ້ອງ, ປກສ ເມືອງ ກໍ່ຄືກຳລັງປ້ອງກັນຄວາມສະຫງົບທົ່ວ ແຂວງຈຳປາສັກ ຈົ່ງສືບຕໍ່ເອົາໃຈໃສ່ປະຕິບັດໜ້າທີ່ດ້ວຍຄວາມຮັບຜິດຊອບສູງ ສືບຕໍ່ຫັນລົງກໍ່ສ້າງຮາກຖານການເມືອງ ຕິດພັນກັບ ການສະກັດກັ້ນແກ້ໄຂປະກົດການຫຍໍ້ທໍ້ ຢູ່ຂັ້ນຮາກຖານ ເພຶ່ອຮັບປະກັນເຮັດໃຫ້ແຂວງຈຳປາສັກ ມີຄວາມສະຫງົບ, ປອດໄພ ແລະ ເປັນລະບຽບຮຽບຮ້ອຍດີ.

Off

Comments are closed.