17th Feb2017

ອະນຸກຳມະການ ປ້ອງກັນໂຄງການ ກໍ່ສ້າງເສັ້ນທາງ ລົດໄຟ ລາວ-ຈີນ ປຶກສາຫາລື ແຜນການປ້ອງກັນ

by somchan

ອາະນຸກຳມະການ​ປ້ອງ​ກັນ ​ໂຄງການ​ກໍ່ສ້າງ​ເສັ້ນທາງ​ລົດ​ໄຟ ລາວ-​ຈີນ ​ໄດ້​ຈັດ​ກອງ​ປະຊຸມ​ປຶກສາ​ຫາລື​ກ່ຽວ​ກັບ​ແຜນການ​ຈັດ​ວາງ​ກຳລັງ​ປ້ອງ​ກັນ​ຄວາມ​ສະຫງົບ ລົງ​ປ້ອງ​ກັນ​ຕາມ​ຈຸດ​ຕ່າງໆ​ໃນ​ວັນ​ທີ 16 ກຸມພາ 2017 ນີ້ ​ໂດຍ​ການ ​ເປັນ​ປະທານ​ຂອງ ພົຕ ກົງ​ທອງ ພົງ​ວິຈິດ ຮອງ​ລັດຖະມົນຕີ​ກະຊວງ ປກສ ທັງ​ເປັນ​ຫົວໜ້າ​ ອະນຸກຳມະການ​ປ້ອງ​ກັນ ມີ​ຄະນະ​ອະນຸ​ກຳມະການ​ປ້ອງ​ກັນ ​ແລະ ຄະນະ​ບັນຊາ​ຈາກ​ກົມ-​ກອງ​ອ້ອມ​ຂ້າງ​ກະຊວງ ປກສ ​ເຂົ້າ​ຮ່ວມ.

ພັອ ສົມ​ວັນ ສາຍ​ລ້ອງ​ພາ ຮອງ​ຫົວໜ້າ​ ຫ້ອງ​ວ່າການ​ກະຊວງ ປກສ ​ໄດ້​ຜ່ານ​ຮ່າງ​ແຜນການ​ປ້ອງ​ກັນ​ໂຄງການ​ກໍ່ສ້າງ​ເສັ້ນທາງ ລົດ​ໄຟ ລາວ-​ຈີນ ຂອງ​ອະນຸ​ກຳມະການ​ປ້ອງ​ກັນ ​ເຊິ່ງທ່ານ​ໄດ້​ໃຫ້​ຮູ້​ວ່າ ກະຊວງ​ປ້ອງ​ກັນ​ຄວາມ​ສະຫງົບ ​ໄດ້​ຮັບ​ມອບ​ໝາຍ​ໜ້າ​ທີ່​ສຳຄັນ​ ກໍ່​ຄື​ອະນຸ​ກຳມະການ​ປ້ອງ​ກັນ ​ເພຶ່ອຮັບປະກັນ​ຄວາມ​ສະຫງົບ, ປອດ​ໄພ ​ແລະ ຄວາມ​ເປັນລະບຽບ​ຮຽບຮ້ອຍ ສ້າງ​ເງື່ອນ​ໄຂ​ເອື້ອ​ອຳນວຍ​ໃຫ້​ແກ່​ ການ​ດຳ​ເນີນ ໂຄງການ​ກໍ່ສ້າງ​ເສັ້ນທາງ ລົດ​ໄຟ ລາວ-​ຈີນ ລະຫວ່າງ​ປີ 2016-2020 ​ໃຫ້​ສຳ​ເລັດ​ຕາມ​ກຳນົດ ດັ່ງ​ນັ້ນ ກະຊວງ​ປ້ອງ​ກັນ​ຄວາມ​ສະຫງົບ ຈຶ່ງ​ໄດ້​ສ້າງ​ຮ່າງ​ແຜນການ​ໃນ​ການ​ສັບ​ຊ້ອນ, ຈັດ​ວາງ​ກຳລັງ​ປ້ອງ​ກັນ​ຄວາມ​ສະຫງົບ ລົງ​ປະຈຳ​ຕາມ​ຈຸດ​ຕ່າງໆ ​ເຊັ່ນ: ​ແຂວງ​ຫຼວງ​ນ້ຳ​ທາ, ອຸດົມ​ໄຊ, ຫຼວງ​ພະ​ບາງ, ​ແຂວງ​ວຽງ​ຈັນ ​ແລະ ນະຄອນຫຼວງ​ວຽງ​ຈັນ, ພ້ອມ​ດ້ວຍ​ແຜນການ​ປະກອບ​ພາຫະນະ, ອຸປະກອນ, ຍຸດ​ໂທ​ປະກອບ ຕ່າງໆ​ ທີ່​ຈຳ​ເປັນ ​ເພື່ອ​ຮັບ​ໃຊ້​ໃຫ້​ແກ່​ການ​ປະຕິບັດ​ໜ້າ​ທີ່​ຂອງ​ກຳລັງ​ປ້ອງ​ກັນ.

​ໃນ​ກອງ​ປະຊຸມ​ຍັງ​ໄດ້​ປຶກສາ​ຫາລື ​ແລກປ່ຽນ​ຄຳ​ຄິດ​ເຫັນ ​ຕໍ່​ກັບ​ຮ່າງ​ແຜນການ​ປ້ອງ​ກັນ ​ໃຫ້​ມີ​ເນື້ອ​ໃນ​ຄົບ​ຖ້ວນ ສົມບູນ ​ແລະ ພາວະ​ວິ​ໄສ, ພ້ອມ​ທັງ​ໄດ້​ຮັບ​ຮອງ​ເອົາ​ແຜນການ​ປ້ອງ​ກັນ​ຊຸດ​ນີ້ ​ເພຶ່ອນຳ​ສະ​ເໜີ​ຕໍ່​ຂັ້ນ​ເທີ​ງອະນຸມັດ ​ໃນ​ການ ຈັດ​ຕັ້ງ​ປະຕິບັດ​ຕົວ​ຈິງ.

​ໂອກາດ​ດຽວ​ກັນ ພົຕ ກົງ​ທອງ ພົງ​ວິຈິດ ຮອງ​ລັດຖະມົນຕີ​ກະຊວງ ປກສ ຫົວໜ້າ​ອະນຸກຳມະການ​ປ້ອງ​ກັນ​ໂຄງການ​ ກໍ່ສ້າງ​ເສັ້ນທາງ ລົດ​ໄຟ ລາວ-​ຈີນ ​ໄດ້​ເນັ້ນ​ໜັກ​ໃຫ້​ບັນດາ​ຄະນະ​ອະນຸ​ກຳມະການ ​ແລະ ຄະນະ​ບັນຊາ ບັນ​ດາ ກົມ​ກອງ​ ທີ່​ໄດ້​ຮັບ​ມອບ​ໝາຍ​ໜ້າ​ທີ່​ຮັບຜິດຊອບ ​​ໃນ​ການ​ປ້ອງ​ກັນ ​ໃຫ້​ເປັນ​ເຈົ້າ​ການ​ກ່ຽວ​ກັບ​ການ​ກະກຽມ​ທາງ​ດ້ານ​ກຳລັງ ພ້ອມ​ທັງ​ເຮັດ​ວຽກ​ງານ​ສຶກສາ​ອົບຮົມ​ ໃຫ້​ແກ່​ກຳລັງ​ທີ່​ຈະ​ລົງ ​ປະຈຳການ​ປ້ອງ​ກັນ ​ຕາມ​ຈຸດ​ຕ່າງໆ​ໃຫ້​ມີ​ຄວາມ​ໜັກ​ແໜ້ນ, ອຸ່ນ​ອ່ຽນ​ທຸ່ນ​ທ່ຽງ, ມີ​ສະຕິ​ຕໍ່​ການຈັດ​ຕັ້ງ ​ແລະ ຕໍ່​ລະບຽບ​ວິ​ໄນ, ພ້ອມ​ທັງ​ມອບ​ໝາຍ​ໜ້າ​ທີ່ ​ໃຫ້​ຖືກຕ້ອງ​ເໜາະ​ສົມ​ກັບ​ແຕ່​ລະ​ກົມ​ກອງ ​ແລະ ບຸກຄົນ ​ເພື່ອ​ຮັບປະກັນ​ເຮັດ​ໃຫ້ ​ໂຄງການ​ກໍ່ສ້າງ​ເສັ້ນທາງ​ລົດ​ໄຟ ລາວ-​ຈີນ ​ແຕ່​ປີ 2016-2020 ມີ​ຄວາມ​ສະຫງົບ, ປອດ​ໄພ ​ແລະ ​ເປັນ​ລະບຽບ​ຮຽບຮ້ອຍ.

 

Off

Comments are closed.