23rd Feb2017

ສານຕັດສິນລົງໂທດ ພວກເຄື່ອນໄຫວ ສໍ້ໂກງຊັບ ແລະ ໃຊ້ແທນຜົນເສຍຫາຍ ທາງແພ່ງ ມູນຄ່າ 10 ລ້ານກວ່າໂດລາ

by somchan

ໃນ​ວັນ​ທີ 16 ກຸມພາ ນີ້ ສານ​ປະຊາຊົນ​ຂັ້ນ​ຕົ້ນ ນະຄອນຫຼວງ​ວຽງ​ຈັນ ​ໄດ້​ຕັດສິນ​ລົງ​ໂທດ ທ້າວ​ຮົ່ມ​ເມືອງ ອາຍຸ 31 ປີ ຢູ່​ບ້ານ​ດົງ​ໂພ​ສີ ​ເມືອງ​ຫາດ​ຊາຍ​ຟອງ ​ແລະ ທ້າວ ສົມປະສົງ ອາຍຸ 45 ປີ ຢູ່​ບ້ານ​ສີສະ​ຫວາດ ​ເມືອງຈັນທະ​ບູລີ ນະຄອນຫຼວງ​ວຽງ​ຈັນ ​ໃນ​ຂໍ້​ຫາ​ສໍ້​ໂກງ​ຊັບ​ພົນລະ​ເມືອງ ​ແລະ ຟ​ອກ​ເງີ​ນ; ​ໂດຍ​ໃຫ້​ຈຳ​ຄຸກ​ຄົນ​ລະ 16 ປີ, ປັບ​ໄໝ 800 ລ້ານ​ກີບ ພ້ອມ​ທັງ​ໃຫ້​ພວກ​ກ່ຽວ​ໃຊ້​ແທນ​ຄ່າ​ເສຍ​ຫາຍ​ທາງ​ແພ່ງ​ຄືນ ​ແກ່​ຜູ້​ເສຍ​ຫາຍ 1.506 ຄົນ ລວມມູນ​ຄ່າ​ປະມານ 80 ຕື້​ກວ່າ​ກີບ ຫຼື ​ເທົ່າ​ກັບ 10.052.210 ​ໂດ​ລາ ​ແລະ ​ໄດ້​ຕັດສິນ​ລົງ​ໂທດ ​ຜູ້​ສົມຮູ້​ຮ່ວມ​ຄິດອີກ 5 ຄົນ ຄື ຕັດສິນ​ລົງ​ໂທດ ທ້າວ ບຸນ​ຈັນ ອາຍຸ 37 ປີ ຢູ່​ບ້ານ​ທົ່ງ​ກາງ ​ເມືອງ​ສີ​ສັດຕະ​ນາກ ນະຄອນຫຼວງ​ວຽງ​ຈັນ ຈຳ​ຄຸກ 7 ​ເດືອນ ປັບ​ໄໝ 5 ​ແສນ​ກີບ, ທ້າວ ຄົມ​ເພັດ ອາຍຸ 43 ປີ ຢູ່​ບ້າ​ນນາ​ເລົ່າ ​ເມືອງ​ສີ​ໂຄດ​ຕະບອງ ນະຄອນຫຼວງ​ວຽງ​ຈັນ ຈຳ​ຄຸກ 3 ​ເດືອນ ປັບ​ ​ໄໝ 5 ​ແສນ​ກີບ; ສ່ວນ ທ້າວ​ສິງ ອາຍຸ 33 ປີ ຢູ່​ບ້ານ​ທົ່ງ​ປົ່ງ, ນາງ​ສຸຈິ​ນດາ ອາຍຸ 26 ປີ ຢູ່​ບ້ານ​ດົງ​ນາ​ທອງ ​ເມືອງ​ສີ​ໂຄດ​ຕະບອງ ​ແລະ ນາງ ​ໄພຈິດ ອາຍຸ 31 ປີ ຢູ່​ບ້ານ​ດົງ​ໂພ​ສີ ​ເມືອງ​ຫາດ​ຊາຍ​ຟອງ ນະຄອນຫຼວງ​ວຽງ​ຈັນ ສານ​ໄດ້​ຕັດສິນ​ ໃຫ້​ພາກ​ໂທດ​ໄວ້ ​ແລະ ປັບ​​ໄໝ ຄົນ​ລະ 5 ​ແສນ​ກີບ.

ສຳລັບ​ຮູບ​ການ​ກະທຳ​ຜິດ​ຂອງ​ພວກ​ກ່ຽວ ​ແມ່ນ​ໄດ້​ມີ​ການ​ສ້າງຕັ້ງ​ ບໍລິສັດ​ທີ່​ປຶກສາ ທາງ​ດ້ານ​ການ​ລົງ​ທືນ ຄື ບໍລິສັດ​ແມັກ​ສ ຄີ​ສະ​ເຕ​ໂບບີ​ໜຶ່ງ​ເວ​ວາຍ ຈຳກັດ ​ໂດຍ​ແມ່ນ ທ້າວ​ຮົ່ມ​ເມືອງ ​ເປັນ​ອຳນວຍ​ການ ​ແລະ ບໍລິສັດ ​ແມັກ​ສ ຄີ​ສະ​ເຕ​ໂບບີ ຈຳ​ກັດ ​ໂດຍ​ແມ່ນ​ທ້າວ ສົມ​ປະສົງ ​ເປັນ​ອຳນວຍ​ການ ​ແຕ່​ເປັນ​ການ​ບັງ​ໜ້າ​ ເພື່ອ​ເຄື່ອນ​ໄຫວ​ສໍ້​ໂກງ​ຊັບ ​ແລະ ຟ​ອກ​ເງີ​ນ ​ໂດຍ​ໄດ້​ມີ​ການ​ແຕ່ງ​ຕັ້ງ​ພະນັກງານ ການ​ຕະຫຼາດ ​ເຄື່ອນ​ໄຫວ​ໂຄສະນາ​ຊວນ​ເຊື່ອ ​ໃຫ້​ລູກ​ຄ້າ​ເຂົ້າ​ຮ່ວມ​ທືນ ຫຼື ຝາກ​ເງີ​ນນຳ ​ແລ້ວ​ຈະ​ໄດ້ຜົນ​ປະ​ໂຫຍ​ດ ຄື ດອກ​ເບ້ຍ 3%ຕໍ່​ເດືອນ ​ແລະ ກາຍ 1 ປີ ຂື້ນ​ໄປ ຈະ​ໄດ້ 3,5% ຕໍ່​ເດືອນ, ​ເຊິ່ງ​ໄດ້​ມີ​ຜູ້​ເສຍ​ຫາຍ​ຫຼົງ​ເຊື່ອ 1.506 ຄົນ ທີ່​ໂອນ​ເງີ​ນ​ເຂົ້າ​ບັນຊີ​ຂອງ​ບໍລິສັດ ລວມມູນ​ຄ່າ 10.052.210 ​ໂດ​ລາ ; ​ແຕ່​ພໍ​ຮອດ​ກຳນົ​ດຖອນ​ເງີ​ນຂອງ​ລູກ​ຄ້າ ບໍລິສັດ​ໄດ້​ອ້າງ​ວ່າ ​​ເງີ​ນ​ໄດ້​ເອົາ​ໄປ​ຊື້ຮຸ້ນ​ໝົດ ​ແລະ ຫຼຸບ​ທືນ ຈຶ່ງ​ບໍ່​ສາມາດ​ຈ່າຍ​ຕົ້ນ​ທືນ ​ແລະ ດອກ​ເບ້ຍ​ໃຫ້​ກັບ​ລູກ​ຄ້າ​ໄດ້; ​ແຕ່​ຄວາມ​ຈິງ​​ແມ່ນ​ ພວກ​ກ່ຽວ​ໄດ້​ເອົາ​ເງີ​ນ ທີ່​ໄດ້​ມາ​ນັ້ນ​ໄປ​ຈ່າຍ​ສ່ວນ​ຕົວໝົດ.

ຜ່ານ​ການ​ພິຈາລະນາ​ຂອງ​ສານ​ເຫັນ​ວ່າ ​ເປັນ​ການ​ກະທຳ​ຜິດ​ຕໍ່​ກົດໝາຍ​ອາຍາ ​ແລະ ມີ​ຂໍ້​ມູນ​ຫຼັກ​ຖານ​ຄົບ​ຖ້ວນ ດັ່ງ​ນັ້ນ​ສານ​ຈຶ່ງ​ໄດ້​ຕັດສິນ​ລົງ​ໂທດ ຕາມ​ລະບຽບ​ກົດໝາຍ.

Off

Comments are closed.