24th Feb2017

ຮອງລັດຖະມົນຕີກະຊວງ ປກສ ເນັ້ນໜັກ ກ່ຽວກັບ ການຄຸ້ມຄອງ ສຳມະໂນຄົວ ແລະ ກໍ່ສ້າງຮາກຖານ

by somchan

ພົຕ ກົງ​ທອງ ພົງ​ວິຈິດ ຮອງ​ລັດຖະມົນຕີ​ ກະຊວງ​ປ້ອງ​ກັນ​ຄວາມ​ສະຫງົບ  ​ໄດ້​ໃຫ້​ທິດ​ຊີ້​ນຳ ​ແລະ ​ເນັ້ນ​ໜັກ​ຫຼາຍ​ບັນຫາ​ ໃນ​ການ​ຫັນ​ເອົາ​ກຳລັງ​ປ້ອງ​ກັນ​ຄວາມ​ສະຫງົບ ລົງ​ເຮັດ​ວຽກ​ງານ​ກໍ່ສ້າງ​ຮາກ​ຖານ ການ​ເມືອງຕິດ​ພັນ​ກັບ​ການ​ປະຕິບັດ ​ວຽກ​ງານ​ວິຊາ​ສະ​ເພາະ ​ໃຫ້​ຖືກຕ້ອງ ​ຕາມ​ລະບຽບ​ຫຼັກການ; ການ​ໃຫ້​ທິດ​ຊີ້​ນຳ​ຄັ້ງ​ນີ້ ​ໃນ​ໂອກາດ​ທີ່​ທ່ານ  ​ໄດ້​ເຂົ້າ​ຮ່ວມ​ກອງ​ປະຊຸມ ສະຫຼຸບ​ວຽກ​ງານ​ຄຸ້ມ​ຄອງ​ສຳມະ​ໂນ​ຄົວ ​ແລະ ກໍ່ສ້າງ​ຮາກ​ຖານ ທົ່ວ​ປະ​ເທດ ປະຈຳ​ປີ 2016 ​ແລະ ທິດ​ທາງ​ແຜນການ ປະຈຳ​ປີ 2017 ​ໃນ​ວັນ​ທີ 22 ກຸມພາ ນີ້.

​ເຊິ່ງທ່ານ ຮອງ​ລັດຖະມົນຕີ​ກະຊວງ ປກສ ​ໄດ້​ຍົກ​ໃຫ້​ເຫັນ​ເຖິງ​ສະພາບ​ການ​ເຄື່ອນ​ໄຫວ ​ແລະ ກົນ​ອຸບາຍ​ມ້າງ​ເພ​ຂອງ​ອິດ​ທິກຳລັງ​ປໍ​ລະ​ປັກ ​ແລະ ພວກ​ຄົນ​ບໍ່​ດີ ທີ່​ຍັງ​ເປັນ​ບັນຫາ​ທ້າ​ທາຍ ຕໍ່​ວຽກ​ງານ​ປ້ອງ​ກັນ​ຄວາມ​ສະຫງົບ ການ​ຮັກ​ສາ​ຄວາມ​ເປັນ​ລະບຽບ​ຮຽບຮ້ອຍ ທາງ​ສັງຄົມ ຢູ່​ຂັ້ນ​ຮາກ​ຖານ. ດັ່ງ​ນັ້ນ​ກົມ​ຄຸ້ມ​ຄອງ​ສຳ​ມະ​ໂນ​ຄົວ ​ແລະ ກໍ່ສ້າງ​ຮາກ​ຖານ ກະຊວງ ປກສ ຕ້ອງ​ໄດ້​ເປັນ​ເຈົ້າ​ການ ປະສານ​ສົມທົບ​ກັບ​ບັນດາ​ກົມ-​ກອງ ​ເພື່ອ​ຫັນ​ເອົາ​ກຳລັງ​ລົງ​ກໍ່ສ້າງ​ຮາກ​ຖານ​ການ​ເມືອງ ນຳ​ເອົາ​ແນວທາງ​ນະ​ໂຍບາຍ​ຂອງ​ພັກ, ກົດໝາຍ​ຂອງ​ລັດ ​ແລະ ມະຕິ​ຄຳ​ສັ່ງ​ຂອງ​ຂັ້ນ​ເທີ​ງ ລົງ​ຈັດຕັ້ງ​ຜັນ​ຂະຫຍາຍ ​ແລະ ​ເຜີຍ​ແຜ່​ໃຫ້​ປະຊາຊົນ ຢູ່​ຮາກ​ຖານ​ໄດ້​ຮັບ​ຮູ້​ເຂົ້າ​ໃຈ​ຢ່າງ​ເລິກ​ເຊິ່ງ ຕິດ​ພັນ​ກັບ​ການ​ປະຕິບັດ​ວຽກ​ງານ​ວິຊາ​ສະ​ເພາະ ​ໃຫ້​ມີ​ຄຸນ​ນະພາ​ບ ​ແລະ ຖືກຕ້ອງ​ຕາມ​ລະບຽບ​ຫຼັກການ ​ເປັນ​ຕົ້ນ​ແມ່ນ​ການ​ເກັບ​ກຳ, ກວດກາ ​ແລະ ຄຸ້ມ​ຄອງ​ບັນດາ​ກຸ່ມ​ບ້ານ, ບ້ານ, ຫຼັງຄາ​ເຮືອນ, ຄອບຄົວ ​ແລະ ການ​ເໜັງ​ຕິງ​ຂອງ​ພົນລະ​ເມືອງ, ​ເອົາ​ໃຈ​ໃສ່​ຂື້ນ​ທະບຽນ​ສຳມະ​ໂມ​ຄົວ, ອອກ​ບັດປະຈຳຕົວ ​ໃຫ້​​ພົນລະ​ເມືອງ​ລາວ ​ແລະ ຄົນ​ຕ່າງ​ດ້າວ​ໃຫ້​ຖືກ​ຕ້ອງ​ຕາມ​ລະບຽບ​ຫຼັກການ, ພ້ອມ​ກັນ​ນີ້​ຕ້ອງ​ໄດ້​ເອົາ​ໃຈ​ໃສ່​ກວດກາ, ຄຸ້ມ​ຄອງ ​ແລະ ​ແກ້​ໄຂ​ບັນຫາ​ການ​ຍົກຍ້າຍ​ຖິ່ນ​ຖານ​ແບບ​ຊະຊາຍ, ການ​ເຂົ້າ-​ອອກ​ເມືອງ​ຜິດ​ກົດໝາຍ​ຢູ່​ຕາມ​ຊາຍ​ແດນ ​ແລະ ອື່ນໆ.

 

Off

Comments are closed.