ເຈົ້າໜ້າທີ່ຕຳຫຼວດ ສະຫຼຸບສາເຫດ ໄຟໄໝ້ ຮ້ານປິ້ງໄກ່ 16 ຮ້ານ ຢູ່ຕະຫຼາດເຊໂນ

ເຈົ້າ​ໜ້າ​ທີ່​ຕຳຫຼວດ ​ແຂວງ​ສະຫວັນ​ນະ​ເຂດ ​ໄດ້​ລາຍ​ງານ​ໃຫ້​ຮູ້​ກ່ຽວ​ກັບ ສາ​ເຫດ​ຂອງ​ເຫດການ ​ໄຟ​ໄໝ້​ຮ້ານ​ປິ້ງ​ໄກ່ ຢູ່​ຕະຫຼາດ​ເຊ​ໂນ ​ເມືອງ​ອຸທຸມພອນ ​ແຂວງ​ສະຫວັນ​ນະ​ເຂດ ​ໃນ​ວັນ​ທີ 19 ກຸມພາ 2017 ​ແມ່ນ​ເກີດ​ຈາກ​ ການ​ໄຕ້​ທູບ-​ທຽນ​ບູຊາ ຮ້ານ​ພະ ທີ່ຢູ່​ໃນ​ຮ້ານ​ຂອງ​ແມ່ຕູ້ ຂັນ​ທະ​ລີ ອາຍຸ 64 ປີ ຢູ່​ບ້ານ​ໄຊ​ອຸດົມ ​ເມືອ​ງອຸທຸມພອນ ຈາກ​ນັ້ນ​ໄຟ​ໄດ້ລຸກລາມ ​ໄໝ້​ຮ້ານ​ທີ່ຢູ່​ໃກ້ຄຽງ ​ເນື່ອງ​ຈາກຮ້ານ​ສ່ວນ​ໃຫ່ຍ ​ແມ່ນ​ເຮັດ​ດ້ວຍ​ໄມ້, ມຸງ​ສັງກະສີ ​ແລະ ​ແອ້ມ​ດ້ວຍ​ຝາ​ໄມ້​ເຮ້ຍ ບວກ​ກັບ​ສະພາບ​ອາກາດ​ແຫ້ງ ​ອົບ​ເອົ້າ ຈຶ່ງ​ເຮັດ​ໃຫ້​ໄຟ​ໄໝ້ລຸກລາມ ​ຂະຫຍາຍ​ອອກ​ເປັນ​ວົງ​ກວ້າງ​ຢ່າງ​ໄວວາ. ຜົນ​ຂອງ​ການ ​ເສຍ​ຫາຍ ມີ​ຮ້ານ​ຂາຍ​ເຄື່ອງ 16 ຮ້ານ ລວມມູນ​ຄ່າ 490 ລ້ານ​ກວ່າ​ກີບ.