01st Mar2017

ຮອງ ລັດຖະມົນຕີກະຊວງ ປກສ ເນັ້ນກຳລັງ ປ້ອງກັນ ສູນກາງ ສືບຕໍ່ ປ້ອງກັນ ການນຳ ຂັ້ນສູງ ພັກ-ລັດ ແລະ ກອງປະຊຸມ ສຳຄັນ ໃຫ້ປອດໄພ 100%

by somchan

ໃນ​ໂອກາດ​ທີ່ ພົຕ ກົງ​ທອງ ພົງ​ວິຈິດ ຮອງ​ລັດຖະມົນຕີ​ ກະຊວງ ປກສ ​ໄດ້​ເຂົ້າ​ຮ່ວມ​ກອງ​ປະຊຸມ​ສະຫຼຸບ​ ການ​ເຄື່ອນ​ໄຫວ​ວຽກ​ງານ ​ປ້ອງ​ກັນ​ສູນ​ກາງ ປະຈຳ​ປີ 2016 ​ແລະ ວາງ​ທິດ​ທາງ​ແຜນການ​ປີ 2017 ​ໃນ​ວັນ​ທີ 24 ກຸມພາ ນີ້ ທ່ານ​ໄດ້​ໃຫ້​ທິດ​ຊີ້​ນຳ ​ແລະ ​ເນັ້ນ​ນັກ​ໃຫ້​ກຳລັງ ​ປ້ອງ​ກັນ​ສູນ​ກາງ ​ເພີ່ມ​ທະວີ​ຄວາມ​ຮັບຜິດຊອບ ທາງ​ດ້ານ​ວຽກ​ງານ​ວິຊາ​ສະ​ເພາະ ​ໃນ​ການ​ປ້ອງ​ກັນ ​ບັນດາ​ການ​ນຳ​ພັກ-​ລັດ, ​ແຂກ ​ແລະ ກອງ​ປະຊຸມ​ສຳຄັນ​ທີ່ ສປປ ລາວ ຈະ​ເປັນ​ເຈົ້າພາບ​ໃນ​ປີ 2017 ນີ້ ​ໃຫ້​ມີ​ຄວາມ​ສະຫງົບ ປອດ​ໄພ 100%.

ເຊິ່ງທ່ານ​ ຮອ ງ​ລັດຖະມົນຕີ​ກະຊວງ ປກສ ​ໄດ້​ກ່າວ​ວ່າ ຄະນະ​ພັກ-​ຄະນະ​ບັນຊາ ກຳລັງ​ປ້ອງ​ກັນ​ສູນ​ກາງ​ແຕ່​ລະຂັ້ນ ຕ້ອງ​ໄດ້​ເພີ່ມ​ທະວີ​ປະຕິບັດ​ພາລະ​ບົດບາດ, ສິດ, ໜ້າ​ທີ ​ໃນ​ການ​ເປັນ​ເສນາ​ທິການ ​ໃຫ້​ແກ່​ກະຊວງ ປກສ ​ເພື່ອ​ກວດກາ, ​ເກັບ​ກຳ​ສະພາບ ພ້ອມ​ທັງ​ຄົ້ນຄວ້າ​ວາງ​ແຜນ ບັນຈຸ​ສັບຊອນ ​ແລະ ຈັດ​ວາງ​ກຳລັງ​ເຫຼົ່າ​ຮົບ​ວິຊາ​ສະ​ເພາະ ​ເຮັດ​ໜ້າ​ທີ່​ອຳນວຍ​ຄວາມ​ສະດວກ, ປ້ອງ​ກັນ​ເຮືອນ​ພັກ​ຂອງ​ການ​ນຳ, ບັນດາ​ສຳນັກງານ-​ອົງການ, ການ​ຮັກສາ​ຄວາມ​ປອດ​ໄພ ​ໃຫ້​ແກ່​ການ​ເຄື່ອນ​ໄຫວ​ຂອງ​ການ​ນຳ​ຂັ້ນ​ສູງ, ​ແຂກ​ຕ່າງປະ​ເທດ ​ແລະ ກອງ​ປະຊຸມ​ສຳຄັນ​ຕ່າງໆ ​ໃຫ້​ມີ​ຄວາມ​ສະຫງົບ ປອດ​ໄພ 100% ພ້ອມ​ກັນ​ນີ້ ກໍ່​ຕ້ອງ​ໄດ້​ຄົ້ນຄວ້າ​ຮ່ຳຮຽນ ຍົກ​ລະດັບ​ທາງ​ດ້ານ​ຄວາມ​ຮູ້, ຄວາມ​ສາມາດ, ຄວາມ​ຊຳນິ​ຊຳນານ, ທາງ​ດ້ານ​ວຽກ​ງານ​ວິຊາ​ສະ​ເພາະ ​ແລະ ການ​ນຳ​ໃຊ້​ພາຫະນະ, ອຸປະກອນ​ເຕັກນິກ​ທັນ​ສະ​ໄໝ ​ເຂົ້າ​ໃນ​ວຽກ​ງານ​ວິຊາ​ສະ​ເ​ພາະຂອງ​ບັນດາ​ເຫຼົ່າ​ຮົບ ​ເຊັ່ນ: ​ການ​ເຮັດ​ໜ້າ​ທີ່ປ້ອງ​ກັນ​ຄຽງ​ຂ້າງ, ການ​ຄຸມ​ແຫ່, ການ​ກວດກາ​ທາດ​ເບື່ອ, ທາດ​ແຕກ, ການ​ນຳ​ໃຊ້​ເຄື່ອງ​ເອັກສະ​ເລ ​ເພື່ອ​ສະກັດ​ກັ້ນ​ວັດຖຸ​ຕ້ອງ​ຫ້າມ ​ແລະ ອື່ນໆ.

Off

Comments are closed.