15th Mar2017

ທ່ານຮອງນາຍຍົກລັດຖະມົນຕີເນັ້ນຫຼາຍບັນ ຫາກ່ຽວກັບການຂື້ນທະບຽນແລະອອກບັດອະ ນຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດ

by somchan

ປອ ສອນ​ໄຊ ສີ​ພັນ​ດອນ ຮອງ​ນາຍ​ຍົກລັດຖະມົນຕີ ​ໄດ້​ໃຫ້​ທິດ​ຊີ້​ນຳ​ກ່ຽວ​ກັບ ​ການ​ຂື້ນ​ທະບຽນ ​ແລະ ອອກ​ບັດ​ອະນຸຍາດ ເຄື່ອນ​ໄຫວ​ຊົ່ວຄາວ ໃຫ້​ຄົນ​ຕ່າງປະ​ເທດ ຂອງ​ກະຊວງ​ແຮງ​ງານ ແລະ ສະຫວັດດີ​ການ​ສັງຄົມ ແລະ ກະ ຊວງ​ປ້ອງ​ກັນ​ຄວາມ​ສະຫງົບ ແມ່ນ​ຕ້ອງເຫັນ​ແກ່​ຜົນ​ປະ​ໂຫຍ​ດລວມຂອງ​ຊາດ ​ເປັນ​ສິ່ງ​ສຳຄັນ, ການ​ຊີ້​ນຳ​ຄັ້ງ​ນີ້ ໃນ​ໂອກາດ​ທີ່​ທ່ານ​ເຂົ້າ​ຮ່ວມ​ກອງ​ປະຊຸມ ​ສະຫຼຸບ​ຕີ​ລາຄາ ​ແລະ ຖອດ​ຖອນ​ບົດຮຽນ ກ່ຽວ​ກັບ ການຂື້ນ​ທະບຽນ ​ແລະ ອອກ​ບັດ ​ອະນຸຍາດ ​ເຄື່ອນ​ໄຫວ ​ຊົ່ວຄາວ ໃຫ້​ຄົນ​ຕ່າງປະ​ເທດ ລະຫວ່າງ​ກະຊວງ​ແຮງ​ງານ ​ແລະ ສະຫວັດດີ​ການສັງຄົມ ​ແລະ ກະຊວງປ້ອງ​ກັນຄວາມ​ສະຫງົບ ທີ່​ຈັດ​ຂື້ນ​ຢູ່​ສູນ​ຝຶກອົບຮົມ ​ແລະ ການ​ຮ່ວມມື​ສາກົ​ນ ນະຄອນຫຼວງ​ວຽງ​ຈັນ ​ໃນ​ລະຫວ່າງ ​ວັນ​ທີ 13 – 14 ມີນາ 2017 ນີ້ ​ໂດຍ​ການ​ເປັນ​ປະທານ​ ຮ່ວມ​ຂອງ ປອ ຄຳ​ແພງ ​ໄຊ​ສົມ​ແພງ ລັດຖະມົນຕີ​ ກະຊວງ ​ແຮງ​ງານ ​ແລະ ສະຫວັດດີ​ການ​ ສັງຄົມ ​ແລະ ພົຕ ກົງ​ທອງ ພົງ​ວິຈິດ ຮອງ​ລັດຖະມົນຕີ​ກະຊວງ ​ປ້ອງ​ກັນ​ຄວາມ​ສະຫງົບ ພ້ອມ​ດ້ວຍ​ພະນັກງານ ​ທີ່​ກ່ຽວຂ້ອງ​ທັງ​ສອງ​ກະຊວງ​ເຂົ້າ​ຮ່ວ​ມ.

 

ກອງ​ປະຊຸມ​ຄັ້ງ​ນີ້ ​ໄດ້​ຕີ​ລາຄາ​ຄືນ ​ແລະ ສະຫຼຸບ​ຖອດ​ຖອນ​ບົດຮຽນ ​ເພື່ອ​ຍົກ​ໃຫ້​ເຫັນ​ຜົນສຳ​ເລັດ, ຂໍ້ຄົງຄ້າງ, ຂໍ້​ສະດວກ ​ແລະ ຂໍ້​ຫຍຸ້ງຍາກ​ກ່ຽວ​ກັບ​ ການ​ຂື້ນ​ທະບຽນ ​ແລະ ອອກ​ບັດ​ອະນຸ​ຍາດ ​ເຄື່ອນ​ໄຫວ​ຊົ່ວຄາວ​ໃຫ້​ຄົນ​ຕ່າງປະ​ເທດ ​ໂດຍ​ສະ​ເພາະ​ ການຈັດ​ຕັ້ງ​ປະຕິບັດ​ຄຳ​ສັ່ງ ຂອງ​ນາຍ​ຍົກ​ລັດຖະມົນຕີ ກ່ຽວ​ກັບ​ການ​ແກ້​ໄຂ​ ບັນຫາ​ຄົນ​ຕ່າງປະ​ເທດ ​ເຂົ້າ​ມາ​ເຄື່ອນ​ໄຫວ​ບໍ່​ຖືກຕ້ອງ​ຢູ່ ສປປ ລາວ ​ໂດຍ​ແມ່ນ​ກະຊວງ​ແຮງ​ງານ ​ແລະ ສະຫວັດດີກາ​ນສັງຄົມ ​ແລະ ກະຊວງ​ປ້ອງ​ກັນ​ຄວາມ​ສະຫງົບ ​ໄດ້​ຮັບ​ມອບ​ໝາຍ​ຮ່ວມ​ກັນ​ແກ້​ໄຂ ​ເລີ່​ມ​ແຕ່​ທ້າຍ​ປີ 2015 ​ເປັນ​ຕົ້ນ​ມາ.​ເຊິ່ງສາມາດ​ອອກ​ບັດ​ອະນຸຍາດ ​ເຄື່ອນ​ໄຫວ​ຊົ່ວຄາວ​ໃຫ້​ຄົນ​ຕ່າງປະ​ເທດ ​ໄດ້ 24.372 ຄົນ, ຍິງ 7.056 ຄົນ, ສຳລັບ​ການ​ປະຕິບັດ​ຕົວ​ຈິງ ​ແມ່ນ​ຍັງ​ໄດ້​ມີ​ການ​ແຍກ​ສັນຊາດ, ຮູບ​ແບບ​ການ​ເຄື່ອນ​ໄຫວ​ຢ່າງ​ລະອຽດ ​ເພື່ອ​ສະດວກ​ໃນ​ການ​ຄຸ້ມ​ຄອງ​ກວດກາ.

​ໃນ​ໂອກາດ​ນີ້ ປອ ສອນ​ໄຊ ສີ​ພັນ​ດອນ ຮອງ​ນາຍ​ຍົກ​ລັດຖະມົນຕີ ຍັງ​ໄດ້​ໃຫ້​ທິດ​ຊີ້​ນຳ ​ແລະ ​ເນັ້ນ​ໜັກ​ໃຫ້​ຄະນະ​ນຳ​ກະຊວງ, ກົມ​ກອງ ​ແລະ ພະນັກງານ​ວິຊາ​ການ ຫຼື ​ເຈົ້າ​ໜ້າ​ທີ່​ທີ່​ກ່ຽວຂ້ອງ ​ກັບ​ວຽກ​ງານ​ການ​ຂື້ນ​ທະບຽນ ​ແລະ ອອກ​ບັດ​ອະນຸຍາດ​ເຄື່ອນ​ໄຫວ​ ຊົ່ວຄາວ​ໃຫ້​ຄົນ​ຕ່າງປະ​ເທດ ຂອງ​ກະຊວງ​ແຮງ​ງານ ​ແລະ ສະຫວັດດີ​ການ​ສັງຄົມ ​ແລະ ກະຊວງ​ປ້ອງກັນ​ຄວາມ​ສະຫງົບ ຕ້ອງ​ເຫັນ​ແກ່​ຜົນ​ປະ​ໂຫຍ​ດລວມຂອງ​ຊາດ ​ເປັນ​ສິ່ງ​ສຳຄັນ, ຕ້ອງ​ໄດ້​ເກັບ​ກຳ​ຂື້ນ​ບັນຊີ ​ແລະ ຄຸ້ມ​ຄອງ​ກວດກາ​ຄົນ​ຕ່າງປະ​ເທດ ທີ່​ເຂົ້າ​ມາ​ເຄື່ອນ​ໄຫວ​ໃນ​ຮູບ​ການ​ຕ່າງໆ ​ຢູ່​ບັນດາ​ໂຄງການ​ກໍ່ສ້າງ, ຫົວໜ່ວຍ​ທຸລະ​ກິດ ​ແລະ ອົງການ​ຈັດ​ຕັ້ງ​ສາກົນ​ປະຈຳ​ລາວ ​ໃຫ້​ມີ​ການ​ປະກອບສ່ວນ​ພັນທະ​ອາກອນ​ຖືກຕ້ອງ​ຕາມ​ລະບຽບ​ກົດໝາຍ, ພ້ອມ​ທັງ​ບໍ່​ໃຫ້​ເປັນ​ຊ່ອງ​ວ່າງ, ​ເງື່ອນ​ໄຂ​ແກ່​ຄົນ​ບໍ່​ດີ ຫຼື ນັກ​ສືບ​ຂ່າວ​ຂອງ​ຕ່າງປະ​ເທດ​ແຊກ​ຊືມ​ເຂົ້າປະ​ເທດ, ​ເຄື່ອນ​ໄຫວ​ກະທຳ​ຜິດ​ຕໍ່​ລະບຽບ​ກົດໝາຍ​ຂອງ ສປປ ລາວ ທີ່​ຈະ​ສ້າງ​ຄວາມ​ບໍ່​ສະຫງົບ ຄວາມ​ບໍ່​ເປັນ​ລະບຽບ​ຮຽບຮ້ອຍ​ໃນ​ສັງຄົມ ​ໂດຍ​ສະ​ເພາະ​ແມ່ນ​ຄວາມ​ໜັ້ນຄົງ ຂອງ​ລະບອບ​ປະຊາທິປະ​ໄຕ ປະຊາຊົນ​ຂອງ​ລາວ.

Off

Comments are closed.