21st Mar2017

ຄະນະນຳຂັ້ນສູງກະຊວງ ປກສ ລາວ ສຳເລັດການຢ້ຽມຢາມ ສັນທະວະໄມຕີ ຢູ່ ສສ ຫວຽດນາມ

by somchan

ຄະນະ​ນຳ​ຂັ້ນ​ສູງ ກະຊວງ​ປ້ອງ​ກັນ​ຄວາມ​ສະຫງົບ ສປປ ລາວ ນຳ​ໂດຍ ພົຕ ສົມ​ແກ້ວ ສີ​ລາ​ວົງ ລັດຖະມົນຕີ​ກະຊວງ ປກສ ​ໄດ້ສຳ​ເລັດ​ການ​ຢ້ຽມຢາມ ສັນທະ​ວະ​ໄມຕີ ​ແລະ ​ເຂົ້າ​ຮ່ວມ​ກອງ​ປະຊຸມ ວ່າ​ດ້ວຍ​ການ​ຮ່ວມ​ມື ສ​ອງຝ່າຍ ປະຈຳ​ປີ 2016 ກັບ​ກະຊວງ​ຕຳຫຼວດ ສສ ຫວຽດນາມ ຢູ່​ທີ່​ນະຄອນຫຼວງ​ຮ່າ​ໂນ້ຍ ​ໃນ​ລະຫວ່າງ​ວັນ​ທີ 15-17 ມີນາ 2017 ນີ້ ​ເຊິ່ງ​ໃຫ້​ກຽດ​ຕ້ອນຮັບ​ໂດຍ ພົທ ​ໂຕ​ເລິ​ມ ລັດຖະມົນຕີ​ກະຊວງ ຕຳຫຼວດ​ຫວຽດນາມ ພ້ອມ​ຄະນະ,

ກອງ​ປະຊຸມ ວ່າ​ດ້ວຍ​ການ​ຮ່ວມ​ມື​​ສ​ອງຝ່າຍ ປະຈຳ​ປີ 2016 ລະຫວ່າງ​ກະຊວງ ປກສ ລາວ ​ແລະ ກະຊວງ​ຕຳຫຼວດ​ ຫວຽດນາມ ຜູ້​ແທນ​ຂັ້ນ​ສູງ​ທັງ​ສອງ​ກະຊວງ ​ໄດ້​ຮ່ວມ​ກັນ​ສະຫຼຸບ​ຕີ​ລາຄາ ສະພາບ​ການ​ຂອງ​ໂລກ ​ແລະ ພາກ​ພື້ນ ພ້ອມ​ທັງ​ທົບ​ທວນຄືນ ການ​ຮ່ວມ​ມືວຽກ​ງານ​ປ້ອງ​ກັນ​ຄວາມ​ສະຫງົບ ​ແລະ ການ​ຮັກສາ​ຄວາມ​ເປັນ​ລະບຽບ​ຮຽບຮ້ອຍ​ທາ​ງສັງຄົມ ລະຫວ່າງ​ສ​ອງກະຊວງ ກໍ່ຄື​ບັນ​ດາ​ກົມ​ກອງ​ວິຊາ​ສະ​ເພາະ, ບັນດາ​ແຂວງ​ທີ່​ມີ​ຊາຍ​ແດນ​ຕິດ​ຈອດ​ ​ແລ​ະ ​ແຂວງ​ແຮກສ່ຽວ ​ໃນ 1 ປີຜ່ານມາ ​ເປັນ​ຕົ້ນ​ແມ່ນ​ການ​ພົວພັນ​ຮ່ວມ​ມື​ຕ້ານ, ສະກັດ​ກັ້ນອາ​ຊະ​ຍາ​ກຳ ຫຼື ປະກົດ​ການ​ຫຍໍ້​ທໍ້ ​ໃນ​ສັງຄົມ, ການ​ແລກປ່ຽນ​ຂໍ້​ມູນ​ຂ່າວສານ ​ແລະ ການ​ຮ່ວມ​ມື​ຊ່ວຍ​ເຫຼືອ​ເຊິ່ງກັນ ​ແລະ ກັນ ຂອງ​ສອງ​ກະຊວງ ຄື​ກະຊວງ​ປ້ອງ​ກັນ​ຄວາມ​ສະຫງົບ​ລາວ ​ແລະ ກະຊວງ​ຕຳຫຼວດ​ຫວຽດນາມ ສາມາດ​ຮັບ​ປະກັນ​ເຮັດ​ໃຫ້​ທັງ​ສອງ​ປະ​ເທດ ມີ​ສະຖຽນ​ລະ​ພາບ, ມີ​ຄວາມ​ສະຫງົບ​ທາງ​ດ້ານ​ການ​ເມືອງ ​ແລະ ມີ​ຄວາມ​ເປັນ​ລະບຽບ​ຮຽບຮ້ອຍ​ທາງ​ສັງຄົມ​ຢ່າ​ງໜັກ​ແໜ້ນ.

ພ້ອມ​ກັນ​ນີ້ ພົຕ ສົມ​ແກ້ວ ສີ​ລາວົງ ລັດຖະມົນຕີ​ກະຊວງ ປກສ ລາວ ​ແລະ ພົທ ​ໂຕ​ເລິ​ມ ລັດຖະມົນຕີ​ກະຊວງ ຕຳຫຼວດ​ຫວຽດນາມ ຍັງ​ໄດ້​ຮ່ວມ​ກັນ​ລົງ​ນາມ​ແຜນການ​ຮ່ວມ​ມື ປະຈຳ​ປີ 2017; ນອກ​ນີ້ ພົຕ ສົມ​ແກ້ວ ສີ​ລາ​ວົງ ຍັງ​ໄດ້​ຕາງໜ້າ ລັດຖະບານ ສປປ ລາວ ມອບ​ຫຼຽນ​ໄຊ, ຫຼຽນ​ກາ​ແຮງ​ງານ ​ເພື່ອ​ຍ້ອງຍໍ​ສັນທະ​ເສີມ ຄຸນງາມຄວາມດີ ຕໍ່​ກຳລັງ​ຕຳຫຼວດ​ຫວຽດນາມ ທີ່​ໄດ້​ປະກອບສ່ວນ​ປະຕິບັດ​ວຽກ​ງານ ປ້ອງ​ກັນ​ຄວາມ​ສະຫງົບ ຮ່ວມ​ກັບ​ກຳລັງ ປກສ ລາວ​ໃນ​ໄລຍະ​ຜ່ານ​ມາ ​ເຊິ່ງ​ໃນ​ນີ້ ມີ​ຫຼຽນ​ໄຊ​ແຮງ​ງານ ຊັ້​ນ I, 1 ສະຫາຍ, ຊັ້ນ II 1 ສະຫາຍ, ຊັ້ນ III 9 ສະຫາຍ ​ແລະ ຫຼຽນ​ກາ​ແຮ​ງງານ 32 ສະຫາຍ; ພ້ອມ​ນັ້ນ​ວິທະຍາຄານ​ຕຳຫຼວດ ປະຊາຊົນ ຫວຽດນາມ ກໍ່​ໄດ້​ມອບ​ປະກາສະ​ນິຍະ​ບັດ ​ປະລິນຍາ​ເອກ ກິດ​ຕິ​ມະ​ສັກ ​ໃຫ້​ພົຕ ສົມ​ແກ້ວ ສີ​ລາ​ວົງ ​ແລະ ​ໂອກາດ​ດຽວ​ກັນ ພົຕ ສົມ​ແກ້ວ ສີ​ລາ​ວົງ ພ້ອມ​ຄະນະ​ຍັງ​ໄດ້ ​ເຂົ້າ​ຢ້ຽມ​ຂ່ຳນັບ ພົອ ສຈ ປອ ​ເຈິ​ນດາຍ​ກວາງ ປະທານ​ປະ​ເທດ ​ແລະ ທ່ານ ຫວຽນ​ຊວນ​ພຸກ ນາຍ​ຍົກ​ລັດຖະມົນຕີ​ແຫ່ງ ສສ ຫວຽດນາມ ຕື່ມ​ອີກ.

Off

Comments are closed.