28th Apr2017

ລາວ-ກຳປູເຈຍ ສືບຕໍ່ຮ່ວມມືວຽກງານ ປ້ອງກັນ ຄວາມສະຫງົບ

by somchan

ຄະນະ​ຜູ້​ແທນ​ຂັ້ນ​ສູງ ກະຊວງ​ປ້ອງ​ກັນ​ຄວາມ​ສະຫງົບ ສປປ ລາວ ​ໄດ້​ເຂົ້າ​ຮ່ວມ​ກອງ​ປະຊຸມ ວ່າ​ດ້ວຍ​ການ​ຮ່ວມ​ມື ​ແລະ ພິທີ​ລົງ​ນາມ​ບົດ​ບັນທຶກ ວ່າ​ດ້ວຍ​ການ​ຮ່ວມ​ມື ປະຈຳ​ປີ 2017 ກັບ​ກະຊວງ​ພາຍ​ໃນ ​ແຫ່ງຣາຊະ​ອານາຈັກ ກຳປູ​ເຈຍ ຢູ່​ທີ່​ນະຄອນຫຼວງ​ພະນົມ​ເປັນ ​ໃນ​ວັນ​ທີ 25 ​ເມສາ ນີ້ ​ເຊິ່ງກອງ​ປະຊຸມ​ໄດ້​ດຳ​ເນີນ ​ໂດຍ​ການ​ເປັນ​ປະທານ​ຮ່ວມ​ຂອງ ສົມ​ເດັດ ​ໂກລາ​ໂຮມ​ຊໍ​ເຄັງ ຮອງ​ນາຍ​ຍົກ​ລັດຖະມົນຕີ ລັດຖະມົນຕີ​ກະຊວງ​ພາຍ​ໃນ ກຳປູ​ເຈຍ ​ແລະ ພົຕ ສົມ​ແກ້ວ ສີ​ລາ​ວົງ ລັດຖະມົນຕີ​ກະຊວງ ປກສ ລາວ ພ້ອມ​ດ້ວຍ​ຄະນະ​ຜູ້​ແທນ​ທັງ​ສອງ​ກະຊວງ​ເຂົ້າ​ຮ່ວມ.

​ໃນ​ກອງ​ປະຊຸມ​ໄດ້​ມີ​ການ​ຕີ​ລາຄາ ສະພາບ​ການ​ຂອງ​ສາກົນ, ພາກ​ພື້ນ ​ແລະ ພາຍ​ໃນ ສອງ​ປະ​ເທດ ທີ່​ສົ່ງ​ຜົນ​ກະທົບຕໍ່​ການ​ປົກ​ປັກ​ຮັກສາ​ຄວາມ​ສະຫງົບ ຄວາ​ມ​ເປັນ​ລະບຽບ​ຮຽບຮ້ອຍ​ຂອງ​ສັງຄົມ ​ໃນ​ໄລຍະ​ຜ່ານ​ມາ ​ແລະ ຄາດ​ກະສະພາບການ​ໃນ​ຕໍ່ໜ້າ, ກອງ​ປະ​ຊຸ​​ມ​ໄດ້​ທົບ​ທວນຄືນ ບັນດາ​ຜົນສຳ​ເລັດ ​ໄດ້​ຄົ້ນ​ຄ້ວາ​ຕົກລົງ ​ເຫັນ​ດີ​ເປັນ​ເອກະ​ພາບ​ກັນ ກ່ຽວ​ກັບ​ການ​ສືບ​ຕໍ່​ຮ່ວມ​ມື ​ໃນ​ຂົງ​ເຂດ​ວຽກ​ງານ​ປ້ອງ​ກັນ​ຄວາມ​ສະຫງົບ​ໃນ​ຕໍ່ໜ້າ ​ເປັນ​ຕົ້ນ​ແມ່ນ ກາ​ນຮ່ວມ​ມື​ຮັກສາ​ຄວາມ​ສະຫງົບ ຄວາມ​ເປັນ​ລະບຽບ​ຮຽບຮ້ອຍ​ຕາມ​ຊາຍ​ແດນ, ການ​ປ້ອງ​ກັນ ສະກັດ​ກັ້ນ ປາບ​ປາມ​ການ​ເຄື່ອນ​ໄຫວ​ກໍ່​ການ​ຮ້າຍ ​ແລະ ອາ​ຊະ​ຍາ​ກຳ​ຂ້າມ​ຊາດ, ການ​ກວດກາ​ການ​ເຂົ້າ-​ອອກ​ເມືອງ, ການ​ອຳນວຍ​ຄວາມ​ສະດວກ-​ຄວາມ​ປອດ​ໄພ ​ໃຫ້​ແກ່​ປະຊາຊົນ​ທັງ​ສອງ​ປະ​ເທດ ທີ່​ເຄື່ອນ​ໄຫວ​ຢູ່​ປະ​ເທດ​ຂອງ​ຕົນ, ການ​ປ້ອງ​ກັນ​ປາບ​ປາມ​ຢາ​ເສບ​ຕິດ, ການ​ຕ້ານ​ການ​ຄ້າ​ມະນຸດ, ການ​ແລກປ່ຽນ​ຢ້ຽມ​ຢາມ​ຂອງ​ຄະນະ​ຜູ້​ແທນ ​ແລະ ອຶຶ່ນໆ.

ພ້ອມ​ກັນ​ນີ້ ພົຕ ສົມ​ແກ້ວ ສີ​ລາ​ວົງ ຕາງໜ້າ​ຝ່າຍ​ລາວ ​ແລະ ສົມ​ເດັດ ​ໂກລາ​ໂຮມ​ຊໍ​​ເຄັງ ຕາງໜ້າ​ຝ່າຍ ກຳປູ​ເຈຍ ຍັງ​ໄດ້​ຮ່ວມ​ກັນ​ລົງ​ນາມ ບົດ​ບັນທຶກ ວ່າ​ດ້ວຍ​ການ​ຮ່ວມ​ມື ປະຈຳ​ປີ 2017 ລະຫວ່າງ​ກະຊວງ​ປ້ອງ​ກັນ​ຄວາມ​ສະຫງົບ ສປປ ລາວ ​ແລະ ກະຊວງ​ພາຍ​ໃນ ​ແຫ່ງຣາຊາ​ອານາຈັກ ກຳປູ​ເຈຍ ຕື່ມ​ອີກ.

Off

Comments are closed.