04th May2017

ຮອງລັດຖະມົນຕີ ກະຊວງ ປກສ ເນັ້ນກຳລັງ ປກສ ແຂວງ ຊຽງຂວາງ ກຽມຄວາມພ້ອມ ຮອບດ້ານ ໃຫ້ແກ່ບັ້ນ ປ້ອງກັນ ງານມະຫາກຳ ກິລາແຫ່ງຊາດ

by somchan

​ໃນວັນ​ທີ 2 ພຶດສາ​ພາ 2017 ນີ້ ພົຕ ສິນ​ທະ​ວົງ ​ໄຊ​ຍະ​ກອນ ກຳມະການ​ສູນ​ກາງ​ພັກ ຮອງ​ລັດຖະມົນຕີ​ກະຊວງ ປກສ ​ໄດ້​ເຄື່ອນ​ໄຫວ​ຢ້ຽມຢາມ ​ແລະ ຊີ້​ນຳ​ວຽກ​ງານ ປ້ອງ​ກັນ​ຄວາມ​ສະຫງົບ ​ແລະ ການ​ກະກຽມ​ຄວາມ​ພ້ອມ ​ໃຫ້​ແກ່​ບັ້ນ​ປ້ອງ​ກັນ ​ງານ​ມະຫາ​ກຳ​ກິລາ​ແຫ່ງ​ຊາດ ຢູ່​ທີ່​ກອງ​ບັນຊາ​ການ ປກສ ​ແຂວງ​ຊຽງ​ຂວາງ.

ພັທ ບຸນ​ເລີດ ວງົລຳ​ໄພ ຮອງ​ຫົວ​ໜ້າ​ກອງ​ບັນຊາ​ການ ປກສ ​ແຂວງ​ຊຽງ​ຂວາງ ​ໄດ້​ລາຍ​ງານ​ສະພາບ ​ແລະ ການຈັດ​ຕັ້ງ​ປະຕິບັດ​ວຽກ​ງານ​ປ້ອງ​ກັນ​ຄວາມ​ສະຫງົບ, ການ​ຮັກສາ​ຄວາມ​ເປັນ​ລະບຽບ​ຮຽບຮ້ອຍ​ໃນ​ສັງຄົມ ​ໂດຍ​ສະ​ເພາະ​ການ​ສະ​ກັດ​ກັ້ນ ​ແກ້​ໄຂ​ປະກົດ​ການ​ຫຍໍ້​ທໍ້ ​ໃນ​ໄລຍະ 4 ​ເດືອນ​ຜ່ານ​ມາ ຂອງ​ປີ 2017 ຂອງ​ ແຂວງ​ຊຽງ​ຂວາງ ​ເຊິ່ງມີ​ຄະດີ​ເກີດ​ຂື້ນ 107 ລາຍ ມີ​ຜູ້​ກະທຳ​ຜິດ 40 ຄົນ ​ເຊິ່ງ​ໃນ​ນີ້ ມີ​ຄະດີ​ອາຍາ 81 ລາຍ, ຄະດີ​ຢາ​ເສບ​ຕິ​ດ 22 ລາຍ, ຄະດີ​ອຸປະຕິ​ເຫດ 43 ລາຍ ​ແລະ ອັກຄີ 5 ລາຍ.

​ໂ​ອກາດ​ດຽວ​ກັນ ພົຕ ສິນ​ທະ​ວົງ ​ໄຊ​ຍະ​ກອນ ກໍ່​ໄດ້​ຍ້ອງຍໍ​ຊົມ​ເຊີຍ ຜົນສຳ​ເລັດ​ໃນ​ການ​ປະຕິບັດ ໜ້າ​ທີ່​ວຽກ​ງານ ຂອງ​ຄະນະ​ບັນຊາ​ແຕ່ລະ​ຂັ້ນ ​ແລະ ພະນັກງານ​ຫຼັກ​ແຫຼ່ງ, ພະນັກງານ-​ນັກຮົບ ກອງ​ບັນຊາ​ການ ປກສ ​ແຂວງ​ຊຽງ​ຂວາງ ​ໃນ​ໄລຍະ​ຜ່ານ​ມາ ພ້ອມ​ທັງ​ໃຫ້​ທິດ​ຊີ້​ນຳ ​ແລະ ​ເນັ້ນ​ໜັກ​ໃຫ້​ສືບ​ຕໍ່​ເອົາ​ໃຈ​ໃສ່ ວຽກ​ງານ​ສຶກສາ​ອົບຮົມ​ການ​ເມືອງ​ນຳພາ​ແນວ​ຄິດ, ການ​ຝຶກ​ຝົນ​ຫຼໍ່​ຫຼອມ​ທາງ​ດ້ານ​ຄຸນ​ທາດ​ການ​ເມືອງ, ຄຸນສົມບັດ​ສິນ​ທຳ​ປະຕິວັດ, ​ເອົາ​ໃຈ​ໃສ່​ປັບປຸງ​ກໍ່ສ້າງ​ກົມ​ກອງ​ໃຫ້​ເຕີບ​ໃຫ່ຍ​ເຂັ່ມ​ແຂງ, ກໍ່ສ້າງ​ກຳລັງ​ໃຫ້​ມີ​ຄວາມ​ຮູ້, ຄວາມ​ສາມາດ ​ແລະ ຄວາມ​ຊຳນິ​ຊຳນານ ທາງ​ດ້ານ​ວຽກ​ງານ​ວິຊາ​ສະ​ເພາະ ພ້ອມ​ທັງ​ເປັນ​ເຈົ້າ​ການ ​ໃນ​ການ​ສະ​ກັດກັ້ນ ​ແກ້​ໄຂ​ປະກົດ​ການ​ຫຍໍ້​ທໍ້​ໃນ​ສັງຄົມ ​ໃຫ້​ວ່ອງ​ໄວ​ທັນ​ການ ​ແລະ ນັບ​ມື້​ຫຼຸດ​ລົງ, ທັງ​ນີ້​ເພື່ອ​ເປັນ​ການ​ກະກຽມ​ຄວາມ​ພ້ອມ​ຮອບດ້ານ​ໃຫ້​ແກ່​ການ​ປ້ອງ​ກັນ ງານ​ມະຫາ​ກຳ​ກິລາ​ແຫ່ງ​ຊາດ ທີ່​ແຂວງ​ຊຽງ​ຂວາງ ​ເປັນ​ເຈົ້າພາບ ​ໃນ​ປີ 2018 ກໍ່​ຄື​ການ​ຮັບປະກັນ ​ເຮັດ​ໃຫ້​ທົ່ວ​​ແຂວງ​ຊຽງ​ຂວາງ ມີ​ຄວາມ​ສະຫງົບ ​ແລະ ​ເປັນ​ລະບຽບ​ຮຽບຮ້ອຍ​ດີ

Off

Comments are closed.