ກະຊວງ ປກສ ສຳເລັດໂຄງການ ກໍ່ສ້າງອາຄານ ສູນຄຸ້ມຄອງ ອິນເຕີເນັດ

ການຈັດ​ຕັ້ງປະຕິບັດ​ໂຄງການ ກໍ່ສ້າງ​ອາຄານ ສູນ​ຄຸ້ມ​ຄອງ​ອິນ​ເຕີ​ເນັດ ມູນ​ຄ່າ 2 ລ້ານ​ກວ່າ ​ໂດ​ລາ​ສະຫະລັດ ​ໂດຍ​ແມ່ນ​ກົມ​ໃຫ່ຍ 502 ກະຊວງ​ປ້ອງ​ກັນ​ຄວາມ​ສະຫງົບ ​ເປັນ​ເຈົ້າ​ຂອງ​ໂຄງການ ​ແລະ ບໍລິສັດ ສິນ​ພະ​ວົງກຣຸບຈຳກັດ​ຜູ້​ດຽວ ​ເປັນ​ຜູ້​ຮັບ​​ເໜົາກໍ່ສ້າງ ​ໄດ້​ສຳ​ເລັດ​ການ​ກໍ່ສ້າງ ຕາມ​ສັນຍາ 100% ​ແລະ ​ໄດ້​ຈັດ​ພິທີ​ມອບ-​ຮັບ ຢ່າງ​ເປັນ​ທາງ​ການ ​ໃນ​ວັນ​ທີ 4 ພຶດສະພາ 2017 ນີ້ ​ໂດຍ​ເປັນ​ກຽດ​​ເຂົ້າ​ຮ່ວມ​ຂອງ ພົຕ ກົງ​ທອງ ພົງ​ວິຈິດ ຮອງ​ລັດຖະມົນຕີ​ກະຊວງ ປກສ ພ້ອມ​ດ້ວຍ​ບັນດາ​ຄະນະ​ນຳ​ກະຊວງ, ກົມ​ໃຫ່ຍ, ຕາງໜ້າ​ບໍລິສັດ​ຮັບ​ເໜົາກໍ່ສ້າງ ​ແລະ ​ແຂກ​ຖືກ​ເຊີນ​ເຂົ້າ​ຮ່ວມ.

ສູນ​ຄຸ້ມ​ຄອງ​ອິນ​ເຕີ​ເນັດ ​ແມ່ນ​ສູນ​ທີ່​ເຮັດ​ໜ້າ​ທີ່ ​ໃນ​ການ​ຄຸ້ມ​ຄອງ​ບັນຊາ ​ແລະ ສະກັດ​ກັ້ນ​ແກ້​ໄຂ​ປະກົດ​ການ​ຫຍໍ້​ທໍ້ ຫຼື ບັນຫາ​ອາ​ຊະ​ຍາ​ກຳ​ທາງ ລະບົບ​ຄອມ​ພິວ​ເຕີ ​ແລະ ​ເປັນ​ສູນ​ວຽກ​ງານ​ວິຊາ​ສະ​ເພາະ​ໜື່ງ ທີ່​ຂື້ນ​ກັບ​ກົມ​ໃຫ່ຍ 502 ກະຊວງ ປກສ, ສຳລັບ​ການຈັດ​ຕັ້ງ​ປະຕິບັດ​ໂຄງການ​ກໍ່ສ້າງ ອາຄານ​ຂອງ​ສູນ​ດັ່ງກ່າວ ​ແມ່ນ​ໄດ້​ເລີ່​ມ​ແຕ່​ປີ 2016 ​ເປັນ​ຕົ້ນ​ມາ ​ເຊິ່ງປະກອບ​ດ້ວຍ​ໜ້າ​ວຽກ​ຄື ການ​ຖົມ​ດິນ, ການ​ກໍ່ສ້າງ​ກຳ​ແພງ ​ແລະ ການ​ກໍ່ສ້າງ​ອາຄານ​ທີ່​ມີ​ລະບົບ​ໄຟຟ້າ, ນ້ຳ​ປະປາ, ລະບົບ​ມອດ​ໄຟ, ຫ້ອງ​ປະຈຳການ, ຫ້ອງ​ປະຊຸມ, ຫ້ອງ​ຝຶກ​ອົບຮົມ ​ແລະ ອື່ນໆ ຢ່າງ​ຄົບ​ຊຸດ ​ເຊິ່ງມີ​ມູນ​ຄ່າ​ການ​ກໍ່ສ້າງ​ທັງ​ໝົດ 2,848,000 ໂດ​ລາ​ສະຫະລັດ.